InfoHub Logo

«Qaýyn jaryqtyq táttiligin qoısa, biz de Asan atanyń baqshasyna túsýimizdi qoıar edik». Áne, anaý jaıqalyp jatqan Asan atanyń qaýyn-qarbyzy. Biz balalar olaı-bylaı ótken saıyn baqylap júremiz. Endi eki-úsh kún shydasaq, qaýyn da pisip qalady.

Baqshanyń qaq ortasynda Asan ataǵa uqsaıtyn qaraqshy tur. Odan búgingi kúnniń qý qustary da qoryqpaıtyn bolyp alǵan. Atany mazaq qylǵandaı bir torǵaı qaraqshynyń bas kıimine qonyp alypty.

Mine, biz asyǵa kútken kún de jetti. Búgin túnde Asan atanyń qaýynyn urlamaqshymyz. Ol bizdiń urlaǵanymyzdy báribir biledi. Al bizge qaýyn jesek boldy. Meniń ákem de baqsha egedi. Baqshamyzda bári bar. Qaýyn da, qarbyz da. Biraq nege ekenin kim bilsin, jylda Asan atanyń qaýyny erte pisedi.

Biz kózge túspeýge tyrysyp júrip, baıqamappyz: búgin Asan ata baqshasynyń qaq tórinde tósek salyp jatypty. Baqshanyń tórt buryshynan aıaǵymyzdy mysyqsha basyp tórt bala kire bergenimiz sol edi, bizdiń úı jaqtaǵy buryshtan kirgen Erboldyń «baq» etken daýsynan selk ete tústik. Sóıtsek, ol aıaǵyn ańdap basyp kele jatsa, uıyqtap jatqan atanyń ústinen túsip, shoshyp ketedi. Qoryqqanynan daýsy da shyǵyp ketip, barlyq jospardy qurtty. Boıymdaǵy úreıdi ashý qýyp shyǵyp, osynshama eńbektengennen keıin qalaı bos ketem dep alǵa umtyla berip edim, aıaǵym dop-domalaq qarbyz ba, álde qaýyn ba, bilmeımin, áıteýir bir nársege tıdi. Dáý domalaqty sabaq-mabaǵymen kótere qashtym. Ábden pisken bolý kerek, ózi qara zil eken. Entikken qalpym qolymdaǵy oljamdy dereý qoradaǵy maıanyń ishine tyǵa saldym.

Erbol baqyryp jibergende qalǵan dostarymyz da zyta jónelipti. Abyroı bolǵanda, aıaq astynan shyqqan ashshy daýystan shal eseńgirep, jan-jaǵynan tas pa, taıaq pa áıteýir birdeńe izdep qarmanyp jatqanda Erbol da qashyp úlgeripti.

Mine, tórteýmiz kelisken jerde kezdesip otyrmyz. Úsheýiniń bastary salbyrap ketken. Aralarynda eńsesin bıik ustap otyrǵan men ǵana. Óıtkeni, men oljalymyn. Qazir mynalar basqa bir aıla tapqannan keıin meniń «tátti qaýynymdy» qorada otyryp alyp jemekshimiz. Dostarym erteń mindetti túrde Asan atanyń pisken qaýyndaryn urlap alatyn bolyp kelisti.

Endi, mine tórteýmiz bizdiń qorada otyrmyz. Aqtós biz ekenimizdi bilgennen keıin sháý etti de, qoıa qoıdy. Baǵana as úıden dáý qara pyshaqty bildirtpeı ala ketkenmin. Shóptiń arasynan zildeı dáý «qara qaýyndy» alyp shyǵyp keseıin desem dáý qara pyshaǵymnyń tisi batpady. Mine, keremet! Ári tyǵam, beri tyǵam, pyshaq ótpeıdi. Bir kezde Erbol:

— Tfý! Mynaýyń asqabaq qoı! — dep aıqaılap jibergende basym zyń ete qaldy. Sol mınýttan bastap dúnıedegi asqabaq ataýlyny ábden jek kórip kettim. Atyp turyp dáý asqabaqty jerge alyp uryp, ortasynan qaq bóldim. Endi kórmegenim asqabaq bolsyn!

Osynshama bar jan-tánińmen daıyndalyp kelip, tátti qaýyn dep jeı bergenińde ol kók asqabaq bolyp shyqsa, sen de ashýlanbaı kór.

---