InfoHub Logo

1 qyrkúıekten bastap 1-11 synyp aralyǵyndaǵy oqýshylar qashyqtan oqıdy. Bul týraly Ortalyq komýnıkasıalar qyzmetinde onlaın ótken brıfıńte QR Bilim jáne ǵylym mınıstri Ashat Aımaǵambetov aıtty.

«Memleket basshysy Qasym-Jomart Toqaev Úkimetke, Bilim jáne ǵylym mınıstrligine, ákimdikterge jańa oqý jylyn uıymdastyrý boıynsha birneshe tapsyrma bergen bolatyn. Osy tapsyrmalar aıasynda jumys qarqyndy júrip jatyr. Jańa ǵana Úkimet otyrysynda osy máseleni bólek qarap, tıisti sheshim qabyldandy», — dedi Bilim jáne ǵylym mınıstri Ashat Aımaǵambetov.

Onyń aıtýynsha, basty másele — balalar men pedagogtardyń qaýipsizdigi, olardyń densaýlyǵy.

«Qazir ahýal qıyn. Densaýlyq saqtaý mınıstrligi bergen málimetti qaraıtyn bolsaq, qyrkúıek, kúz aılarynda jylda bolatyn JRVI ınfeksıasy da taralady. Barlyq máseleni qarastyra otyryp, búgin tıisti sheshim qabyldadyq. 1 qyrkúıekten bastap elimizdegi barlyq mektepter qashyqtan oqý formatyna kqshedi. Árıne, bul óte kúrdeli sheshim. Qazirgi ýaqytta qoǵamda osy máselege qatysty birneshe oı, usynym bar. Osy sheshimdi qabyldamas buryn sarapshylarmen sóılesip, pikirlerin tyńdadyq. Ata-analardyń da pikirin tyńdap, halyqaralyq tájirıbeni zerdeledik. Eń bastysy - búgingi kúngi ahýal. Bizge keregi — balalardyń, ata-analardyń, pedagogtardyń densaýlyǵy, sondyqtan osyndaı sheshim qabyldap otyrmyz. 1 qyrkúıekten bastap 1-11 synyp aralyǵyndaǵy oqýshylar qashyqtan oqıdy. Olarǵa barlyq tıisti jaǵdaıdy jasap berýimiz kerek», — dedi ol.

---