InfoHub Logo

Aqshahardyń kedeıi joldan bir qatqan nan taýyp alady da, ony amalyn taýyp jumsatyp jemek bolady. Bir naýaıhananyń aldyna keledi. Tonardaǵy ystyq nannyń jaǵymdy ıisi onyń keńsirigin jarady, jaqyndap kelip, qatqan nanyn tonardyń býyna qoıyp jibitip jeıdi.

Naýaıhana qojaıyny álgi kedeıge tańyrqaı qarap turady. Kedeı qatqan nanyn jep bolyp, júre bergende naýaıhana qojaıyny onan aqsha suraıdy. Kedeı:

— Seniń eshnárseńdi jemesem, qalaısha aqsha berem? — deıdi.

— Sen meniń tonarymnyń býyn jediń, árıne, aqsha tóleýge tıistisiń, — deıdi naýaıhana qojaıyny.

Aqyry ekeýi talasa-talasa, sol shahardyń qazysy Juqaǵa keledi. Juqa bul ekeýiniń daýyn tyńdap bolǵannan keıin, bir dorba teńge aqshany alyp naýaıhana qojaıynynyń qulaǵynyń tusyna aparyp arly-berli shaıqaıdy. Dorbadan aqshanyń shyryldaǵan daýysy estiledi. Sosyn ol naýaıhana qojaıynyna:

— Estidiń be, osy aqshanyń daýysyn áket! — deıdi. Naýaıhana qojaıyny muny túsinbeı:

— Qazy taqsyr, bul qandaı úkim boldy? — dep suraıdy.

Sonda Juqa:

— Bul, óte ádil, aqylǵa sıymdy úkim boldy. Kimde-kim nannyń býyn satsa, sol adam aqshanyń shyldyrlaǵan daýysyn alǵany jón, — deıdi.

---