InfoHub Logo

Sońǵy jumysqa aýysyp kelýim — jaı qyzmet emes. Ataǵyn at ázer kótererdeı bólim meńgerýshisi bolyp kelýim ómirimdi kúrt ózgertip jiberdi.

Qyryqqa taıap qalǵan qyrqyljyń boıdaqqa ylǵı órimdeı quralaı kóz jas qyzdar men bir kabınette otyrý baqyty buıyrǵanyna taǵdyryma myń márte alǵys jaýdyryp júrmin kúnine.

— Aǵa bilesiz be, men siz turǵan aýylda turamyn ǵoı, — deıdi Aına degen aqquba qyz qıylyp.

Qýanyp qaldym.

— Tamasha boldy ǵoı, birge kelip, birge qaıtyp turamyz, — deppin qýanyshymdy jasyra almaı.

Qyzdardyń dý ete qalǵan kúlkisinen soń, ózimniń baıqamaı sóılep qalǵanymdy ańǵardym. Dese de, sazbettenip ony onsha elemegen keıip tanyttym.

Burynnan jınalyp qalǵan biraz sharýany ústel basynda-aq sheship tastaýǵa tyrystym.

Kórkine kóz súrindirgen jeti birdeı aı kelbetti arýdyń arasynda jalǵyz erkek kindiktiniń bolýy — bir jaǵynan qyzyq bolsa, endi bir jaǵynan asa aýyr mindet-tuǵyn, árıne.

Birden isker basshy ekenimdi sezdirgim keldi. Ári qol astymdaǵylardyń desin basyp almaqqa:

— Menimen birge jumys jasaǵysy kelmeıtinderiń bolsa aıtyńdar, búginnen bastap bosatam, —dep óz tabıǵatyma jat bir qataldyqqa qaraı bet burdym.

Jańa bastyqtan mundaı qataldyqty kútpegen bolar, áıelder jaǵy jym-jalas bola qaldy. Tek kózderiniń qıyǵymen ǵana bir-birine únsiz til qatyp, erinderin sylp etkizisip alysty.

Árqaısysyn janyma shaqyryp alyp, jeke-jeke tapsyrma berip jatyrmyn. Sońǵysy bolyp aldyma Aına keldi.

Ózine júktelgen tapsyrmany bir qaıtalap ózime aıtyp bergen ádemi qyz:

— Aǵaı, sizdiń jeke kóligińiz bar ma? — dep surady.

— Iá, qalqam, but artar birdeńem bar.

— Meni ala ketesiz be?

— Qýana-qýana.

Jumystan shyǵatyn ýaqyt bolǵan. Qyzmetkerlerdiń bári meniń ruqsatymmen úıdi-úılerine qaıtyp jatyr. Aldymdaǵy álde bir paraq qaǵazǵa esh maqsatsyz úńilip men otyrmyn. Qarsy jaqtaǵy ústelde Aına otyr men jaqqa urlana qarap.

Eldiń bári ketip boldy. Tek Aına ekeýmiz. Uzaq otyrdyq. Aqyry Aına:

— Aǵaı úıdegi jeńgeı izdemeı me? — dep surady.

— Joq, — dedim men birden. Daýysym qatty shyǵyp ketti. Ár kez qoıylatyn osy suraq meniń boıdaq ekendigimdi betime basatyndaı seziletin.

— Keshirińiz, men bilmedim, — qyz beıkúna qalypqa túsken.

— Oqasy joq qalqam, — dedim men de birden daýysymdy jaımashýaqtap, óz ishki esebimdi túgendep aldym. Qyz uzaq únsiz qaldy. Biraz ýaqyttan soń baryp:

— Sonda siz úılenbegensiz be?

Qyz daýsy osy suraqty barynsha sabyrly, barynsha sypaıy etip qoıǵandaı boldy.

— Sol týraly endi oılanyp júrmin.

— Jumys basty boldyńyz ba?

— Úılenbeýge sebep bolardaı emes.

— Álde?

— Buryn úılengen be ediń dep suraǵyń kelip otyr ma?

— Joq, ıá, endi qalaı aıtsam eken, ıá, solaı.

Qyz qaradaı óz sózinen jańylyp jatyr.

— Shynyn aıtsam, búginge deıin soǵan laıyq eshkimdi keziktire almadym.

— Qyzyq eken.

— Túk te qyzyǵy joq, osy kúnge deıin keziktire almadym, degenmen búgin… Sózimniń aıaǵyn jutyp qaldym.

Qyz beti dý ete túskendeı boldy. Aqsha beti qyzara alaýlap baryp mıǵyndaǵy shuńqyrǵa baryp uıalap qaldy. Júregim dir ete qaldy. Denemnen álde bir tylsym dúnıe dúr etip óte shyqqandaı boldy. Aınanyń aqquba júzinen kóz aıyra alar emespin. Qyz janary tike qaraýǵa batyly jetpeı jerden áldebir tabylmasyn izdeı bastady.

— Qaıtpaısyń ba,- dep suradym.

— A, aǵaı, ıá qazir, qaıtam — ol taǵy sózin shashyp aldy.

— Jınal onda kettik.

— Ala ketesiz be?

— Sol úshin otyrmyn.

— Rahmet, dese de yńǵaısyz emes pe?

Qyz endi óp-ótirik múláıimsı qaldy. Qaladan shyǵa boıymdy bir jelik býa bastady. Janymdaǵy qyzdyń ásem kelbeti jan dúnıemdi qytyqtap mazalaı bastaǵan-dy. Aqyry áıel qaýymy aldyndaǵy alǵashqy batyldyǵymdy jasadym.

— Aına.

— Iá.

— Ýaqytyń bar ma? Birge tamaqtanýǵa?

— Bilmeımin aǵaı.

— Onda kettik birge tamaqtanamyz.

— Yńǵaısyz emes pe? Qyz taǵy qylymsı qaldy.

— Eshqandaı.

Kólikti jol boıyndaǵy dámhanaǵa tiredim.

Eki adamnyń qajettiliginen áldeqaıda kóp tamaqqa tapsyrys berip tastadym qoıarda-qoımaı.

Tap bir ózimniń er ekenimdi, áıel zatyna tuńǵysh ret kezdesip otyrǵandaı jan-dúnıemdi álde bir saıtan sezim jelpindirip barady.

— Aǵaı, —deıdi qyz qıylyp.

— Iá, — deımin men de emirenip.

— Meni jumystan shyǵaryp jibermeıtin shyǵarsyz.

— Atama! Qalqam, sendeı ádemi arýdyń aldymda otyrǵanynyń ózi men úshin úlken baqyt qoı. Osy sózdiń aýzymnan qalaı shyǵyp ketkenin ózim de ańǵarmaı qaldym.

Dastarhan jıylyp, qaıtadan kólikke mindik. Janyma kelip jaıǵasqan Aınany ózim oılaǵan batyldyqtan álde qaıda bıik erlikpen oń qolymmen ıyǵynan ózime qaraı tarttym. Qyzda esh qarsylyq joq. Tek shyn-ótirigi belgisiz az ǵana qymsyný bar.

Emirene appaq júzinen óptim. Sosyn bal erni. Tipti ekeýimiz bir tutas tánge aınalǵandaımyz.

Esh únsiz men Aınany kólikten túsirdim de jańa ǵana ózimiz tamaqtanǵan dámhananyń ústińgi qabatyndaǵy qonaq úıge ertip kirdim.

Qylshyldaǵan jastyqtyń dáýreni aıaqtalǵan bolar. Kóńilim kóterilip, júregim órekpigenimen qatty qaljyrap shyqtym. Maǵan salsa, sonda tańǵa deıin qala berer em. Aına nege ekeni belgisiz «qaıtpasam bolmaıdy» dep ótinip qoımady.

Aınany úıine jetkizip salyp óz úıime kelgende tún ortasyna taıap qalǵan edi.

Únemi jınalmaı ılektenip jatatyn tósekke birden gúrs etip qulaı kettim. Uıqyly-oıaý, meń-zeń bolyp uzaq jattym. Aqyry ornymnan turyp as úıge bardym da áli aýzy ashylmaǵan araqty alyp úlken kesege birjola biraq tóńkerdim de, sýsap qalǵandaı-aq salqyldatyp juta saldym da jatyn ornyma qaıta kelip jantaıdym. Kózim ilinip ketipti. Shoshyp oıandym. Jer kóship jatqandaı syrtta áldene dúrkireıdi.

Ornymnan atyp turyp syrtqa shyqtym. Aýyldyń bas jaǵynan jer baýyrlap shubatylyp aqsharby bult kóship barady. Kózimdi ýqalap qaıta qaradym. Bult emes. Shubyrǵan kósh. Kóshtiń ıeleri buldyryp kózge shalynbaıdy, sońy týra meniń úıimniń aldynda ǵana ketip barady eken.

Syńǵyr-syńǵyr etken bir ásem kúlki kelgendeı boldy. Soǵan elitip alǵa qaraı asyǵys attap qalǵanymda keshe alysqa tókkenge erinip esik aldyna tóńkere salǵan kúlge oń aıaǵymdy batyryp aldym. Dál osy kezde kóshtiń sońynda appaq jelmaıaǵa mingen aq kıimdi appaq qyz jarq ete qaldy da, manaǵy ásem kúlki pyshaq keskendeı úzilip, bir ashshy shyńǵyrǵan daýys keldi.

Ashshy daýys qulaq tundyrady. Kúlden aıaǵymdy julyp alǵanda manaǵy kósh izim-ǵaıym joq bolyp ketti. Tańǵa deıin kóz ile almaı shyqtym. Kózime áldene elestedi ma deıin desem, bárin anyq kórgenim men qosa shyńǵyrǵan ashshy daýys qulaǵymnan ketpeı tur.

Jumysqa del-sal bolyp ázer jettim. Áýeli júzi bal-bul jaınaǵan Aına kútip aldy meni.

Endi ornyma otyra bergende syrt jaqtan áldebir áıeldiń zekı sóılegen tanys daýsy estildi. Sonyń arasynsha syrtqy esikte turatyn qaraýyl jigit kelip: «Sizge bir áıel kezdesem dep qoımaı tur. Jibereıik desek, qalaı aıtsam eken, ózi birtúrli, kıimi de», — dep kúmiljip baryp toqtady.

— Nesi bar? Kirgize ber, — dedim men áldenege aınalsoqtap.

Esikten kıimi alba-julba, appaq shashy qobyrap ketken kempir kirip keldi.

Ózim tań qalyp qaldym. Ne sharýa aıtady dep kútip otyrmyn. Maǵan ejireıe qarap biraz turdy. Bir jerden kórgendeımin. Degenmen jyǵa tanı almadym.

Aradaǵy únsizdikti qarsy jaq buzdy.

— Eh! Tanymadyń á! Qý sheshek, kórmeıtin nárseni kórgen soń, apaıyńdy tanymaısyń, kúnáǵa belsheden batqasyn.

Osy kezde baryp esime tústi. Burynǵy jumysymda birge istegen Jámish apaı. Men alǵash sol jumysqa kelgesin bir kabınette jeti jyl birge jumys istegenbiz. Tamasha adam edi. Bir kúni aıaq astynan kóterilip aýyryp, sol qalpy ońala almaı ketken.

— Jámish apaı! Qudaıym-aý. Qaıdan júrsiz? Meni qaıdan taptyńyz? Kelińiz, otyryńyz. Qyzmettesterimniń aldynda yńǵaısyzdansam da jalbaqtap jatyrmyn.

— Jeter! Zýyldama! Men seniń myna aram oryndyǵyńa otyrmaımyn!

Apam sharq ete qaldy.

Áıelderdiń aldynda ózimdi kúnáli sezingendeı qysyldym.

Syrqa súırep shyǵaryp salmaq bolyp umtylyp kele jatqan qyzmettes eki áıeldi ymmen toqattatym da:

— Aý, apataı, óltirseń de aıtyp óltirseńshi. Ne boldy sizge, qaradaı adamǵa tıisip? Men de mantyraı bastadym.

— Saıtandar, shyǵyńdar, jeke aıtatyn sózim bar. Jámish apaıdyń sózin elemegen áıelderdi men qolymmen ısharattap syrtqa jiberdim. Tek Aına sál tosylyp baryp keıin shyqty.

Jámish apaı julym-julym bolǵan peshpetiniń ishki qaltasynan áldeneni sýryp alyp shyǵyp:

— Aı tolǵanda dalaǵa shyǵýshy bolma! Alda-jalda shyǵýǵa týra kelse, myna tumardy moınyńnan tastaýshy bolma! Saqtan, myna tumardy bóten áıel qolyna almasyn. Bar asylyńnan biraq aıyrylasyń. Men kettim. Endi kelmeıtin jaqqa ketip baramyn. Bul saǵan arnalǵan tumar. Bereıin desem taba almaı júrgen em, keshe túnde taptym. Saǵan sodan kelgenim. Abaı bol ózińe, — dep shyǵa jóneldi.

Men qaıyryp eshnárse suraı almaı qaldym. Artynan esikke úmtyldym. Shyqsam úrkerdeı bolyp uılyǵysyp turǵan áıelder ǵana. Jámish apaı izim-ǵaıym joq.

Aınaldyra ary-beri qarap tumardy aqyry moınyma taǵyp aldym.

Keshke deıin jumysqa qulyqsyz boldym. Jumystan eldiń sońynan shyqtym. Kóligimniń qasynda Aına kútip tur eken. Keshegi alyp-ushqan sezimniń jurnaǵy da joq búgin. Qalamasam da birge kettik. Tamaqtandyq. Taǵy sol qonaqúıge kóterildik. Keshegideı albaryndy áreket joq. Bári baısaldy, bári sabyrly qalypta. Tek tánim qaljyraǵan. Jámish apaıdyń áreketin túsine almaı tóbege tesilip jatqam. Meniń sol qolymdy jastanyp emirene denemdi jalanyp jatqan Aına moınymdaǵy tumardy ustap:

— Keshe kórmegen edim ǵoı, — dep surady.

Bóten áıeldiń qoly tımesin degen sóz qulaǵyma taǵy bir marte sańq ete qalǵandaı boldy. Aınanyń qolyn oqys qaǵyp jiberdim.

Qolyn aýyrsynyp qaldy ma, álde basqa ma Aına ýatýǵa kónbeı uzaq jylady egilip turyp.

— Eshqaıda barmaı-aq osynda túneı salaıyq, — dep edim Aına shoq basqandaı yrshyp ketti.

— Joq! Bolmaıdy!

— Nege?

— Úıde balam jalǵyz.

Tula boıym dir etip túrshigip kettim. Aınanyń balasy bar degendi tipti oılamappyn da. Áli úılenbegen dep oılap júrgenime, ashyp suramaǵanyma opyndym.

— Kúıeýiń she, — deppin abdyrap.

— Qaıtys bolǵan.

— Qaı kezde?

— Jarty jyldyń aldynda.

— Kúıeýiniń jyl ýaǵy tolmaı ózimmen tósekte birge jatqan áıeldi tuńǵysh ret barynsha jek kórip kettim. Ózimdi de sonshalyqty jıirkenishti sezindim.

— Keshir aǵataı,— deıdi Aına kemseńdep.

— Keshe jumystan aıyrylyp qalmaý úshin kelgem. Siz birden jumystan adamdardy shyǵaram degende shyǵarǵa janym qalmady. Bul jumystan aıyrylsam balam ekeýmiz qalaı kún kóremiz dep oıladym. Sol úshin kelgem. Al, búgin basqa. Tań atqansha kóz ilmedim. Ári bir sheshimge keldim.

Men eshnarse demesten ornymnan turyp kıine bastadym. Aına da kıindi. Ony óz úıine jekizip salyp óz úıime qaıttym.

Úıge kele as úıge kirip as stolynyń astynda turǵan qorapty súırep aldym da ishindegi araqty sol orynda qulap qalǵansha ishtim.

Bir zamatta áldebireýdiń julqylaýymen oıanyp kettim.

Jaltaqtap jan-jaǵyma qaraǵanymen eshnárse kóriner emes.

— Sen maǵan kereksiń.

Qulaǵymnyń túbinen Jamish apaıdyń daýsy shyqty.

— Jámish apaı!

— Joq, men Jámish emespin.

Men qoryqqanymnan qaltyraı bastadym. Manadan sylqıta ishken araqtyń mastyǵy ilezde tarap ketken.

— Onda?

— Peri!

— Ne kerek?

— Óziń.

— Kimge?

Áıel daýsy endi jalaý aralas shyqty.

— Peri degen jaratylystanbyz. Keshe osy mańnan kóship bara jatyp qyzym aıyqpas dertke dýshar boldy. Sol derttiń jalǵyz emi sen ǵanasyń. Osy kezde keshegi túngi eles keldi kóz aldyma. Syńǵyrlaǵan áıel zatynyń sıqyrly kúlkisi. Sońynan jan tózgisiz shyńǵyrǵan ashshy daýsy.

— Júr menimen balam. Qyzymdy qutqaryp ber. Onyń jany tek seniń ǵana qolyńda. Eles meniń ornymnan turǵyzyp syrtqa qaraı jeteleı jóneldi. Esikti ashyp kep qalǵanda týra qarsyda qasqaıyp turǵan, tolyqsyp tolǵan aıdy kórip, kúndizgi Jámish apaıdyń aıtqany esime túsip, qaıta úıge qaraı qashtym.

Syrttaǵy áıel daýsy bar zar-muńyn shaǵyp, jan-dúnıemdi ezip barady.

Alda-jalda aı tolǵanda shyǵar bolsań, tumardy janyńnan tastama, — degen daýys qulaǵyma qaıta jańǵyrǵandaı boldy.

Aqyry bar batyldyǵymdy boıyma jınap syrtqa shyqtym.

Týra keshegi ózim basyp ketken kúldiń ústine ákelip turǵyzǵan áıel daýysy “Endi kózińdi jum! Men qashan ash degenimshe ashýshy bolma”,- dep eskertti. Men aıtqanyn eki etpeı oryndadym.

Qulaq tundyra zýyldaǵan daýystan ózimniń keńistikte zaýlap ushyp kele jatqanymdy sezindim.

Aqyry qalyqtap baryp áldeneniń ústine tikeden tik tústim.

— Apataıym-aı, keldi me,- degen álsiz, álsiz bolsa da sonshama sazdy áıel úni estildi.

— Keldik, keldik. Sý isheriń bar eken qyzym. Keshe jan ushyryp Jámishti taýyp em, sol kómektesti. Keldi,- degen áıel daýsy maǵan:

— Endi kózińdi ash, — dep buıyrdy.

Tóbesine kóz jetpeıtin Sáýletti saraı. Tór jaǵynda men ómiri kórmegen súıek tektes buıymnan jasalǵan aq tósek. Tósektiń ústinde appaq jamylǵy jamylyp jatqan Appaq qyz.

Eki kózi tars jabylyp erni bozara alas uryp qınalyp jatyr. Keń saraıdyń esigi ózdiginen ashylyp jabyldy da manaǵy áıel daýsy joq boldy. Kórmesem de onyń syrtqa shyǵyp ketkenin sezdim.

— Jaqyn kelshi, janyma jaqyndashy, — deıdi úzigip.

Aıaǵymdy sanaı basyp janyna bardym.

— Jastyǵymnyń astyndaǵy tumardy alyp ashshy, — dedi endi qyz.

Men qorǵalaı qımyldap appaq jastyqtyń astyna qol júgirttim. Qolyma ilingen zatty alyp shyqqanda biraq bildim. Týra meniń moınymdaǵy tumardan aınymaıdy.

— Tósektiń basyndaǵy anaý aq perdini al!Meniń betime jap, tumardy ash, birinshi betin oqy.

Men esh jaýap qatpastan aıtqanyn oryndadym.

Tumardy ashqanymda ózim kórmegen hatqa kózim tústi. Ańyrap biraz qarap turyp baryp ózim bilmeıtin, ómiri sóılemek túgili estimegen bir tilde zaýlatyp oqı jóneldim. Men oqyp bola bere esik syqyr etip ashyldy da:

— Kóp rahmet, balam. Endi seni jer mekenińe jekizip salaıyn. Bul tumar jeti paraqtan turady, bizge rahym qylyp ár aı tolǵan saıyn kelip oqyp berip tursań, jeti aıdan soń qyzym qulan-taza jazylady. Kózińdi jum, endi kettik, -dedi.

Tańerteń ornymnan turyp túndeginiń túsim ne óńim ekenin aıyra almaı dilgirip biraz jattym da, kenet syrttaǵy kúl esime túsip, jerden jeti qoıan tapqandaı syrtqa umtyldym.

Kúldiń betinde batpıyp meniń eki jalańaıaq tabanymnyń izi tur. Kóz aldyma betine perde japtyryp óleýsirep jatqan qyz keldi.

Tabanymnyń izi qalǵan kúlge melshıip qarap biraz turdym da aqyry jumysqa kettim.

Jumysqa kele aldymnan sylańdap shyǵa kelgen Aınany kórip áldebir asylymdy joǵaltyp alǵandaı jabyrqap qaldym. Keshti ázer batyryp jumystan tústim. Aına búginde kútip tur eken. Eshqaıda burylmastan týra úıine jetkizip saldym.

Sóıtip kún artynan kún ótip jatty. Ortada Aı úsh ret toldy, men úsh ret sol ǵajaıyp mekenge, syrly arýǵa baryp qaıttym. Aına da alǵan betinen qaıtar emes, kúnige jolymdy kútip turady. Bir kúni tyńnan bir jańalyq aıtty.

— Balamyz bolady, endi qashanǵy osylaı júre beremiz, — dep.

Men oılanyp qaldym. Biraq eshnárse aıtpadym.

— Balasy bar áıelge úılengiń kelmeı júr me? — dep surady birde. Men taǵy eshnárse aıtpadym.

Men altynshy ret baryp qaıtyp endi jetinshi retki aıdyń tolýyn asyǵa kútip júrgem. Aınanyń qursaǵy úlkeıip jumysqa ázer kelip júr. Eńbek demalysyńdy alyp úıińde demal desem kónbeıdi.

— Balamdy shesheme berip jiberdim. Endi jalǵyzbyn. Jaqyn arada sábıimiz dúnıege keledi, endi birge turatyn shyǵarmyz, — dedi taǵy birde. Men taǵy sózin estisem de estimegenge salyndym. Aına jylap ta, qarǵap-silep te maǵan esh sózin ótkere almaı-aq qoıdy.

Men qabyldamaǵanmen jumystaǵylardyń bári bul týraly biletin-di. Aınaǵa bastyqtyń áıeli retinde qurmet jasap jatady. Bul endi óz balasy bar áıelden qashyp qaıda barar deıtin bolsa kerek.

Nege ekenin qaıdam osy kezde men Aınadan ábden sýyp qalǵam. Sol birinshi ret barǵanda betine jamylǵan aq perdeniń astyndaǵy appaq qyzǵa degen qushtarlyǵym dúnıeniń bárin umytqyzǵan.

Jetinshi ret aı tolatyn kúni men jumysqa barmaı qaldym. Keshti ázer batyryp, syryn áli asha almaǵan aq perishteme qaraı zaýladym.

Jetinshi paraqty oqyp bolyp, betindegi aq perdege qolymdy tıgize bergende perde ózdiginen sýsyp jerge túsip qaldy.

Aıdynda appaq aq qyzdyń nurly dıdaryna qarap esimnen tanyp qala jazdadym. Aq qyzdyń kórkin qandaı ataqty sýretshiniń boıaýy beıneleı almaıtyn, qandaı aqyn-jazýshyń da sýretteı almas edi.

Aıdaı dóńgelek aq júzi, Botanyń kózindeı móldiregen kózi janymdy shyǵaryp jiberetindeı bir sezimge, áldebir túbine jetkizbes asqaq armanǵa jeteleı jóneldi kóz aldyma aq qyzdyń ásem dıdarynan ózge eshnárse elester emes. Oıymdy aq qyzdyń:

— Qaıyryn bersin, qaıyryn bersin, janymdy alyp qalǵanyńa máńgi qaryzbyn, meniń janym ózimdiki emes, endi tek ózińdiki ǵana, endi máńgi tek óz ıeliginde. Máńgige osy jumaq mekende birge qalar edik, átteń, aq janyńdy kirletip alǵanyń. Bul jerden sizge oryn joq, kelesi aıdyń tolǵanyn kút, men ózim baramyn. Endi ary qalýǵa ýaqytyń joq, — dep meni shyǵaryp saldy. Qınala-qınala qımasymdy qaldyryp keri qaıttym.

Ertesi jumysqa bardym da óz erkimmen jumystan shyǵatynymdy aıtyp aryz qaldyrdym da úıge qaıttym, kelesi aıdyń tolýyn saryla kúttim.

Arada Aına san márte kelip meni kóndire almaı áýre. Meniń bar esil-dertim aq qyzda. Asyǵa sony kútip júrmin.

Aqyry asyǵa kútken aı ortasy da jetti. Shyǵystan jarqyraı shyqqan dóp-dóńgelek aıdy kórgende janymdy qoıarǵa jer tappadym. Asyǵyma qolym jetpeı qalmasyn dep esik aldyna kúldi taý maıa qylyp úıip tastaǵam.

Úıilgen kúldiń tóbesine shyqtym. Bopyraǵan bos kúlge belýarymnan battym. Aı týra qasqa mańdaıyma kelgende týra aıdyń astynan maǵan qaraı asyǵa ushyp kele jatqan aq sáýleni kórip júregim qýanyshtan jarylyp ketýge shaq qaldy.

Týra osy kezde maǵan qaraı qınala basyp kúni taıap qalǵan Aına kele jatyr eken. Qolynda býynshaǵy bar.

Maǵan jeter-jetpesten:

— Janym qınalyp ketti. Qalasań da, qalamasań da seniń úıińe birjola kelgenim. Kúnim-aý, esiń durys pa? Kúlge maltyǵyp nege tursyń? — dep meni turǵan ornymnan julqylaı bastady.

Aı astynan kele jatqan aq qyz endi anyq kórindi. Basyna aq oramalyn baılaýsyz jaba salǵan. Aq dıdary aıdan da appaq. Maǵan qaraı qushaǵyn ashyp qalyqtap keledi.

Aınadan birjola qutylmaqqa, appaq qyzdyń qasyna birden kete qalmaqqa, moınymdaǵy tumarymdy julyp alyp kókke qaraı qolymdy soza bergende Aına kóz ilespes jyldamdyqpen qolymdaǵy tumardy julyp aldy.

Týra osy kezde Aspannan shyńǵyrǵan aq qyzdyń ashshy daýysy jetti qulaǵyma. Men Aınaǵa qaraı umtyldym. Tumardy qaıtaryp almaqqa.

Sharasynan shyǵa tolǵan aı. Appaq qyz. Aınanyń qolyndaǵy aq tumar.

---