InfoHub Logo

Keshirim suraýdyń eń úlken jáne kishireıýdiń eń aýyr túri «aıaǵyna jyǵylý» dep atalady. Munda aıypty adam janyna bedeldi adamdardy ertip, kináli adamynan jurt aldynda keshirim suraıdy, kúnási tym aýyr bolǵan jaǵdaıda aıaǵyna jyǵylady.

«Aldyńa kelse atańnyń qunyn kesh» degendeı mundaıda keshirim etiledi. «Aıaǵyna jyǵylý» da jazamen birdeı bolyp esepteledi. Aıaqqa jyǵylýdyń ekinshi bir túri eki jastyń kóńil qosý kezinde ata-ana kelisimin attaý barysynda qoldanylady. Keıde birin-biri unatqan jigit pen qyz ata-ananyń kelisimine qaramastan (ásirese qazirgi kezde) bas qosady, otaý qurady. Mundaıda «qyzdy qashyp ketti» deıdi. Qyzdyń áke-sheshesi renjip, keıde qatty ashýǵa basady, kórmesteı bolady. Osy kezde jigit jaǵynan jigit ákesi bas bolyp «elshiler» kelip, qudalarynyń «aıaǵyna jyǵylady», ıaǵnı keshirim ótinedi, bitim suraıdy. Onyń aıaǵy tatýlyqqa ulasady.

---