InfoHub Logo

Zamanaýı talaptarǵa sáıkes, búgingi bala, erteńgi maman básekege qabiletti bolýy úshin barlyq mektepter jańartylǵan bilim mazmunyna kóshedi. Bul týraly búgin Ortalyq komýnıkasıalar qyzmeti óńirlik fılıalynda BQO bilim basqarmasynyń basshysy Aıgúl Myńbaeva málim etti.

Onyń aıtýynsha, 12 jyldyq bilimge kóshý ıdeıasyn Elbasy 2001 jyly bilim jáne ǵylym qyzmetkerleriniń sezinde alǵan usyndy. 2002 jyly osyǵan kóshý jóninde tájirıbe jumystary bastalyp, tıisti normatıvtik-quqyqtyq baza jasaldy. 2003-2004 oqý jyly oblystyń tórt mektebi tájirıbege qatysyp, osy bilim ordasynyń túlekteri UBT qorytyndysy boıynsha ortasha 92,6 bal jınady. UBT-ǵa qatysqan 33 oqýshynyń 18-i nemese 54,5 paıyzy memlekettik grant ıegeri atandy.

Memleket basshysy 2011 jyly Qazaqstan halqyna Joldaýynda 2020 jyly 12 jyldyq mektep tolyqtaı qyzmet etýi qajettigin atap ótse, «100 naqty qadam» Ult josparyna sáıkes 2016-2017 oqý jylynan bastap elimizde jańartylǵan bilim mazmunyna kóshý jumystary qolǵa alyndy.

12 jyldyq bilim berýge kóshýdiń negizgi maqsaty - 5-6 jastaǵy balalardy 0-inshi synypta oqytý jáne mektepaldy daıarlyqtyń biryńǵaı úlgi baǵdarlamasyn engizý. 12 jyldyq bilimniń syzbasy 0 synyp + 11 synyp qaǵıdasyna sáıkes quryldy.

Jańartylǵan bilim berý baǵdarlamasy kestege sáıkes kezeń-kezeńmen engiziledi:

2016 jyly - 1 synyptar;

2017 jyly  - 1,2, 5,7 synyptar;

2018 jyly  - 1,2,3,6,7,8,10 synyptar;

2019 jyly  - barlyq 1-11 synyptar.

2015-2016 oqý jylynda jańartylǵan bilim baǵdarlamasy respýblıka kóleminde 30 pılottyq mektepte, tek qala ǵana emes, aýyldardaǵy bilim ordalarynda da synaqtan ótti. Sonyń ishinde BQO-dan Oral qalasyndaǵy M.Yqsanov atyndaǵy №36 jáne Terekti aýdanyndaǵy Shaǵan orta mektepterinde aprobasıaǵa 7 synypta bilim alatyn 146 oqýshy (131 oqýshy qazaq tilinde, 15 oqýshy orys tilinde bilim aldy) qatysty. Bilim berýdi 7 bastaýysh synyp jáne 16 pán muǵalimderi júzege asyrdy.

Jańartylǵan bilim mazmunyn engizýdiń sáttiligin muǵalimderdiń, oqýshylardyń, ata-analardyń beıimdelgen baǵdarlamany jaqsy qabyldaýynan  kórýge bolady. Sondyqtan atalmysh baǵdarlama 2016 jyldyń 1 qyrkúıeginen bastap elimizdiń barlyq mektebine engizildi. 

Oblys boıynsha 1 synypqa 11373 oqýshy qabyldansa, sonyń 7426-sy qazaqsha, 3947-si oryssha bilim alady. Bastaýysh mekteptiń úlgilik oqý josparyna 14 pán, onyń ishinde úsheýi jańadan: «Jaratylystaný», «Aqparattyq-kommýnıkasıalyq tehnologıalar (AKT)» 3 synyptan bastalady,  «Kórkem eńbek» («Beıneleý óneri» men «Eńbekke baýlý» pánderi mazmunynyń kiriktirilýi esebinen) engizildi. Aǵylshyn tilin oqytý saǵattary kóbeıip, alǵash ret qazaq tildi mektepterde 1 synypqa «Orys tili» páni engizildi.

Jańartylǵan bilim mazmunymen qatar 5 kúndik oqý aptasyna kóshý kezeń-kezeńmen engiziledi.

Jańartylǵan bilim mazmunyna kóshýde  dástúrli oqýlyqpen qatar sıfrlyq oqytý resýrstaryn (SOR) qoldanýdyn mańyzy zor. SOR - oqytý barysynda qoldanylatyn beınematerıaldar men ınteraktıvti sabaqtar. Árıne, olar pedagogty oqytý isinen shettetpeıdi. Ustaz synyptaǵy basty tulǵa bolyp qala bermek. Alaıda, beınematerıaldar men ınteraktıvti sabaqtar muǵalimniń balalarǵa qajetti aqparatty jetkizý mindetin aıtarlyqtaı jeńildeteri sózsiz.

Bilim berý úrdisi barysynda sıfrlyq oqytý resýrstaryn qoldaný maqsatynda 2016 jyldyń kúzinen bastap shaǵyn jınaqty mektepterdi quraldarmen (ekran, proektor, kompúter, prosesor) tehnıkalyq jabdyqtaý bastaldy. Bul baǵytta 2016 jyly 106 shaǵyn jınaqty mektepke mýltımedıalyq jabdyqtar satyp alýǵa respýblıkalyq búdjetten 105 mln. teńge bólindi. Sonymen qatar oblystyń 157 mektebinde  Bilimland.kz bilim berý tuǵyrnamasynyń múmkindikteri oqý prosesinde qoldanylýda, bul ınteraktıvti sabaqtarǵa qatysýǵa múmkindik beredi, sonymen qatar mektep baǵdarlamasy negizinde jasaqtalǵan qazaq, orys, aǵylshyn tilindegi oqytý resýrstarymen jabdyqtalǵan.

«Nazarbaev zıatkerlik mektebi» derbes bilim berý uıymynyń «Pedagogıkalyq sheberlik ortalyǵy» jáne «Órleý» biliktilikti arttyrý ulttyq ortalyǵy» bazasynda jańartylǵan bilim berý mazmuny aıasynda biliktilik arttyrý kýrstary uıymdastyryldy.   Oqytý barysynda 2500-den astam bastaýysh synyp, qazaq tili men orys tili, aǵylshyn tili pániniń muǵalimderi, beıleneý óneri men tehnologıa, mýzyka jáne dene shynyqtyrý pániniń muǵalimderi qamtyldy.

«Bilim basqarmasynyń buıryǵy negizinde pedagogıkalyq sheberlik ortalyǵymen birlese otyryp, ár aýdanda jańartylǵan bilim mazmunyna qoldaý kórsetetin 44 jetekshi mektep bekitildi, olarǵa 345 magnıttik mektep tirkeldi. Osyǵan baılanysty bilim basqarmasy janynan úılestirý keńesi qurylyp, jetekshi mektepterdiń jumys jospary jasaqtalyp, naqty ister atqarylýda», - dedi «QazAqparat» tilshisine Aıgúl Myńbaeva. 

---