InfoHub Logo

Qatysýshylar:
Qaǵan – bas qolbasshy
1-saqshy
2-saqshy
Otan-Ana
1-sarbaz
2-sarbaz
1-2-3-4-áskerbasylar
Qolbasshy
1-2-3-4-balalar
1-2-dıktorlar

Balalardyń neǵurlym kóp qatynasqany jón. Sahna ashylǵanda Qaraýyltóbeniń tóbesinde qolyna naıza ustaǵan qos ǵun sarbazy kórinedi. Ary-beri shapqylap júrgen sarbazdar. Qolynda sadaǵy, naızasy, shoqpary, qalqany, keıbireýiniń qylyshy bar.

1-saqshy (júgirip jaqyndap keledi). Bas sardar Túrgesh qor-ǵany dabyldy qabyldady. Qaraýylynan tútin órledi.

2-saqshy(jaqyndap keledi). Qolbasshym! Qarluqtardyń da qaraýylynan ot kórindi.

1-saqshy. Qaraqan men Qımaq ta habar aldy.

2-saqshy. Oǵyzdar men qańlylarǵa da jaý kelgeni málim.

Qaǵan. Jaraısyńdar, ǵundar! Ot sónbesin, tý jyǵylmasyn!

Sahnaǵa top balany aldyna salyp alyp kele jatqan aq jaýlyqty Otan-Ana kórinedi.

Otan-Ana. Uldarym, bylaı júrińder! Anaý tusqa jasyry-nyńdar. Ordyń betin adyraspanmen japtym. Balalyq jasap, jaý qolyna túsip qalmańdar.

Qaǵan (júre berip qalt toqtaıdy). Otan-Ana, marhabat! Bul tirligińizge túsinbedim ǵoı.

Otan-Ana. Soǵystyń qurbany az bolmaıdy, balam. Qasireti de mol. Dushpan eshkimdi aıamaıdy.

Qaǵan (Otan-Ananyń sózin bólip). Otan-Ana, balalardy nege jasyrdyńyz?

Otan-Ana. Áı, batyr-aı, ańǵalsyńdar-aý, erlikteriń eren bolsa da.

Bul sábıler kúni erteń at jalyn tartyp óspeı me, qolyna naıza, qylyshyn bekem ustap, elge oıran salǵan jaýdyń basyn kespeı me?!

Qaǵan. (Ketip bara jatyp ary qaraı daýystaıdy.) Áı, sarbazdar! Estidińder me, ananyń sheshimin? Kettik eldi qorǵaýǵa, jan saýǵa!

Soǵystyń bolyp jatqanyn bildirgen daýystar, uran salý. Sahna birtindep jabylady. Paýza. Sahnanyń syrtynan aqyn jyry beriledi, kórinister kórsetiledi. Eger vıdeo arqyly tómendegi kórinister berilse, nur ústine nur.

1-dıktor.

Ótedi jyldar, ketedi jyldar ǵaıypqa,
Ótedi kúnder ýaqytpenen saıysta.

Eskertý: arasyna úzilis salyp oqylady.

2-dıktor.

Babasy – ǵun, anasy – ǵun, qazaǵym,
Basyńnan asty-aý, basyńnan asty-aý azabyń.

1-dıktor.

Mońǵoldan qashtyń, Shyńǵystyń kórdiń azabyn.
Shejire solaı, sherimdi aıtyp jazamyn.

Shyńǵys han beınesindegi adam tobyrymen daýystap ótedi.

2-dıktor.

Jońǵardan qaldy kókirekke qaıǵy-muń,
Júrekte mazdap azattyq degen qaısar ún.

Bosyǵan jurtty jońǵardyń áskeri aldyǵa salyp aıdap barady.

Ashtyq ta kórdiń, soǵys ta senen qalmady,
Bozdaǵyn ashtyq – sum ajal bolyp jalmady.
Ash adamdar «Bir úzim nan» dep daýystap ótedi.

1-dıktor.

Týǵan jerdi aq patsha aldy bodan qyp,
Tilińdi umyttyń, saltyńdy qurttyń qurban qyp.

Orys pomeshıgi qazaq sharýasyn qamshymen uryp ótedi.

2-dıktor.

Fashısiń órtin sóndirdiń máńgi joq qylyp,
Kógildir alaý janady tórde máńgilik.
Aldaýǵa tústiń KPSS-tiń toryna,
Aıtpasqa bolmas, urpaq qoryna.

«Maıdanǵa» ánin shyrqaǵan top ótedi.

1-dıktor.

Sonda da qazaq Abaıyn áste umytpady,
Mahambet jyryn rýhy etip bıik ustady.
«Azattyq» degen kıeli uran seksen altyda
Kókirekte mazdap, eldigin qazaq umytpady.

Paýza. Sahna ashylady.

Artqy betten Qazaqstan memleketiniń kartasy kórinedi. Qazaqstannyń kók týy jelbirep tur. Eltańba kórinedi. Týdyń janynda áskerı kıimdegi qos sarbaz. Myltyqtaryn janyna ustap qımylsyz qalǵan.

1-sarbaz (qozǵalmastan). Búgin Táýelsizdik kúni. Jaqsylyqtyń habarshysy bolyp, kún de jarqyrap tur.

2-sarbaz. Durys aıtasyń. Merekeni toılaýǵa el-jurtymyz túgel daıyndyq ústinde. Shetelden de delegasıalar kelip jatyr. Tamasha ǵoı, á. Beıbit kún, kógildir aspan, aqqý bulttar, kúmis kúlki, kúlimdegen sábıler...

1-sarbaz. (Áskerbasynyń janynda úsh-tórt nókeri bar, ja-qyndap keledi. Sarbaz qolyn shekesine aparyp) Qaraýyl qyzmetke daıyn, joldas qolbasshy!

2-sarbaz. (Bul da alǵashqysynyń áreketin qaıtalap) Qaraýyl qyzmetke daıyn, joldas qolbasshy!

Qolbasshy. Táýelsizdik merekesi qutty bolsyn! Múltiksiz qyz-metterińe alǵys aıtamyn.

1-sarbaz. Qazaqstan Respýblıkasyna adal qyzmet etemin!

2-sarbaz. Qazaqstan Respýblıkasyna adal qyzmet etemin!

Mashına gúrili estilip, áskerı adam jaqyndap keldi.

1-áskerbasy. Qazaqstan Respýblıkasy Batys aımaǵy ásker-leriniń mereke saltanatyna qatysatyn bólimshe sarbazdary sherýge daıyn!

2-áskerbasy. Qazaqstan Respýblıkasy Shyǵys aımaǵy ásker-leriniń mereke saltanatyna qatysatyn bólimshe sarbazdary sherýge daıyn!

3-áskerbasy. Qazaqstan Respýblıkasy Ońtústik aımaǵy ásker-leriniń mereke saltanatyna qatysatyn bólimshe sarbazdary sherýge daıyn!

4-áskerbasy. Qazaqstan Respýblıkasy Soltústik aımaǵy ásker-leriniń mereke saltanatyna qatysatyn bólimshe sarbazdary sherýge daıyn!

Qolbasshy. Sarbazdar! Qazaqstan Respýblıkasy Táýelsizdigi kúni merekesine oraı ótetin sherýge daıyndal!

Ár tustan óz bólimshelerine ámir berip jatqan komandırlerdiń «daıyndal» degeni estiledi. Sart-surt etken dybystar estiledi. Sálden soń saıabyrlaıdy. Paýza.

Qolbasshy. Qymbatty meniń qazaǵym, elim-jurtym! Qasiretten qutylyp, azat bolǵan Otanym! Seniń bir ýys topyraǵyńdy at basyndaı altynǵa aıyrbastar ma edi, myna uldaryń? Eshqashan da! Ánuranyń shyrqalyp, kók týyń jelbiresin! Táýelsizdik me-rekeleriń qutty bolsyn!

Sahnaǵa top balany aldyna salyp kele jatqan Otan-Ana kórinedi.

Otan-Ana. Qarańdar, balalar, mynaý elińe! Keshegi balalar qaldyryp ketken amanat oryndalypty.

Qolbasshy (sózin bólip). Otan-Ana, marhabat! Merekeńiz qutty bolsyn! Nemere, shóberelerińizdi ertip jettiń be?

Otan-Ana. Qaıǵyny umytqan, qýanyshqa kenelgen qazaqty kórsem, kóńilim kóterilip, janym jadyraıdy. Keshegisi beınet bolsa, búgingisi – zeınet. Shat zamandy baýyr eti – balalaryma kórsetýge ákeldim.

Bala. Otan-Ana, biz óziń týraly aqyndardyń jazǵan jyrlaryn da bilemiz.

1-bala.

Alys ketsem elester, jaqut dalam,
Kóz aldymda turady Otan-Anam.
Saǵynyshtyń besigin terbetemin,
Men ózińnen uzasam shetik qadam.

2-bala (ilip áketedi).

Azat bolsyn, qazaǵym, eliń esen,
Dep tileımin, Otan-Ana, oǵan sen.
Ár bosaǵa aman bolsyn árqashan,
Basqalarmen teńeledi terezem.

3-bala.

Jerim baı, qazǵan jeriń tabylǵan ken,
Men nege basqalardan bolamyn kem?
Kóp ultty Qazaqstan – elim meniń,
Dostyqtyń berekesi – quqyǵy teń.

 4-bala.

Qymyzyn sattym bıeniń,
Shubatyn ishtim túıeniń.
Aranyń jınar nár-balyn,
Naryqtyń narqyn bilemin.

1-bala (Otan-Anaǵa qarap).

Armanym kóp, Jan-Ana,
Ǵajaıyp jumbaq aınala.
Saýalym qoıar kóp meniń,
Jaýabyn aıtar – Siz ǵana.

Balalar ár jolǵy suraqtardy bólip aıtady.

Kim salmaqshy joldardy?
Kim baqpaqshy qoılardy?
Kim qorytpaq temirdi?
Kim jyrtpaqshy jerińdi?
Kim qorǵamaq elimdi?
Kim gúl ekpek belimdi?
Kim damytpaq ǵylymdy?

Otan-Ana. Saýal qoıǵandaryń durys, balapandarym! Jaýaby bolsyn, meniń batam, senderge.

Balalardyń ortasyna kelip turady. Qolyn jaıady.

Táýelsizdigiń uzaǵynan bolsyn,
Qýanyshqa qushaqtaryń tolsyn.
El de, jer de senderdiki.
Eńbek tizgini qoldaryńa máńgilik qonsyn!

Betin sıpaıdy. Mýzyka áýeni. Ánuran oryndalady. Paýza. Birtindep sahna jabylady.

Shymyldyq

---