InfoHub Logo

Tómengi synypta oqıtyn ul bala edi. Jurt qatarly synyptan synypqa kóshirilgen. Biraq sabaǵy óte nashar. Ákesi bulardy áldeqashan tastap ketipti. Bul jórgekte jatqanda bolǵan deıdi. Ol jóninde ózi mardymdy eshteńe de bilmeıdi.

Anasy munyń sabaq úlgerimine qatty renjıdi. Namystanady. Seniń bolashaǵyń bolý kerek edi deıdi. Úmit kútip otyrǵanda deıdi. Mundaıda kózin tómen salatyn edi. Ózin kináli sanaıdy.

Anasyna kómekteskisi-aq keledi. Anasy sońǵy kezderi jıi aýyratyn bolyp aldy. Bala osyny ýaıymdaıdy.

Anasy keıde munyń qaıratty qara shashynan sıpap otyryp, sen bestik alǵan kúni jazylamyn deıdi. Osyny sendirip aıtady. Bala osyǵan ılandy.

Daıyndyq, ózin-ózi qınaý, qystaý esh nátıje bermedi. Muǵalimnen besti surap ala almaısyń ǵoı. Kózi qaraýytty. Ózine artyq salmaq salǵanyn ǵana biledi. Janushyryp, alasuryp qaıta kirisedi. Umtylǵan bıiktikti báribir ala almady. Bıiktikti alý úshin múmkin áldebir aıla-sharǵylar da kerek shyǵar. Ondaı nárselerdi balanyń jan-dúnıesi oılap ta jata almas edi. Mundaǵy bar kúsh tek anasyna
degen janashyrlyq sezimi ǵana.

Búgin jeńdi. Dápterine tuńǵysh ret "5"-tik baǵa tústi. Sol kúni sabaq bitisimen ý-shý bolyp jatqan joldastaryna da burylyp qaraýǵa murshasy kelmedi. Óńiri ashylyp ketken kishkentaı kostúminiń etegi jelge jelbiregen kúıi, sómkesin qoltyǵyǵyna qysyp alyp úıine qaraı bar pármenimen júgirdi-aı kelip.

Aýlasyna kire bergende qalt toqtady. Jedel járdem kóligi tur edi. Anasy... Taǵy da aýyrypty. Kórshisi Tamara apaı shaqyrǵan eken.

Bala umsynyp qalǵanda, kólik syrǵı júrip ketti. Tamara apaı balaǵa óziniń úıine júrýin ótindi.

Kórshisiniń úıine yqylassyz kirdi. Tamara apaı tamaq daıyndaýǵa kiriskende, bala sómkesinen "5"-tik baǵa qoıylǵan dápterin alyp aldy.
Dápterine qarap otyryp qystyǵyp jylady.

Daıyndalǵan tamaqqa da zaýqy soqpady.

Salyp bergen tósekke jatpas buryn sómkesin ashyp "5"-tik baǵa qoıylǵan dápterin uqyptap sýyrdy. Jastyǵynyń astyna saldy.

Tús kóripti. Túsinde anasy sondaı bir rıza keıippen kúlimsireı qaraıdy eken. Qulan-taza aıyǵypty.

---