InfoHub Logo

Shońnyń qartaıǵan kezi eken. Bir jyly Shý qystaýǵa malymen kóshken. Altaı, Karpattyń biraz eli Shý boıynda qys qatty bolyp, maly jutqa ushyrapty. Osy jaǵdaıdy estigen Arqadaǵy Shoń úlken balasy Ospandy shyqyryp, alyp:

— Kóktem taıandy Shý qystaǵan eldiń aldynan shyǵyp, kele jatqan eldiń jaǵdaıyn bilip, úlken-kishi azamattaryna sálem ber. Burynǵylar aıtady eken: «jutaǵan eldiń maly — ósimtal, órt shalǵan jerdiń shóbi — ósimtal» dep, sol aıtqandaı, halyq aman, bolsa jutaǵan maldyń orny áli-aq tolady. El azamaty aman bolsa bolǵany. Menen el aqsaqaly, úlkenderge sálem aıt. Sol elde kópti kórgen, bir kezde eliniń jón biletin shesheni bolǵan, seksennen asqan Bajaq qart bar. Soǵan baryp meniń arnaıy sálemimdi aıt! — depti.

Aıtqandaı Ospan bárine sálem beripti. Sóıtip, ákesi Shońnyń tapsyrýy boıynsha Bajaq qartty surasa, eshkim bilmepti. Sony izdep kele jatsa, keshke qaraı bir aýyl ústinde, bir qora qoı jatyr eken. Qystan ábden aryqtap shyqqan qoı qozysyna, qozy enesine tabysa almaı ý-shý bolyp jatyr eken. Aýyl shetindegi bir qarasha úı esik aldyna turǵan qartqa baryp sálem beredi.

— Bul aýyl kimdiki? — dep suraıdy.

— Shyraǵym, aýyl — Bajaqtyki, mal — Baraqtiki, — degen eken qart.

Sóıtse, aýyl ústindegi jaıylyp jatqan qoı Baraqtiki eken de, Bajaq qart sol baıǵa qosshy eken. Attan túsip, Ospan Bajaq qarttyń qolyn alyp, sálem berip, ákesi Shońnyń arnaıy sálemin aıtqan eken. «Peıili bolsa shettegi turǵan qarasha úı aq ordadan úsh artyq» degen emes pe? Bajaq qart bulardy jalǵyz sıyrynyń buzaýyn soıyp qonaq etýge jik-japar bolady. Biraq bular bir úıli jannyń kún kórip otyrǵan jalǵyz sıyrynyń buzaýyn qalaı soıǵyzsyn? Bajekeńe buzaýyn soıǵyzbaı, kedeımin dep qınalmaı qonaqqa jalǵyz buzaýyn soıam degen aq peıil, jomart nıetine kóp rıza bolyp, qosh aıtysyp, atqa qonbaq bolady. Sonda Bajaq qarttyń Shońǵa aıtqan sálemi:

— Menen Shoń inime sálem dersiń,
Kim dese Bajaq degen aǵań dersiń.
Kárilik kedeılikpen birdeı keldi,
Mal-basy odan basqa aman dersiń, — depti.

Ospan Shýdaǵy el jaǵdaıyn, Bajaq qarttyń sálemin ákesine aıtyp keledi. Sonda Shoń:

— Shirkin, bir kezdegi el ardageri Bajaq, búginde qartaıǵan kezinde kedeılik turmystan qajyǵan eken ǵoı, — dep eki attyń birin jáne bir túıesin berip, balasyn jibergen eken.

---