InfoHub Logo

Tilderdi damytý jáne qoǵamdyq-saıası jumys komıteti «Balalar álemi» memlekettik portaldy ashýǵa daıyndalyp jatyr.

«Búginde balalar kóretin mýltfılderge, olar oqyp júrgen ádebıetterge qatysty biraz máseleler kóterilip jatyr. Bizdiń mınıstrlikke tıisti tapsyrma da berildi. Atalǵan baǵyttarda jumystar bastalyp ketti. Máselen, qazir «Balalar álemi» atty elimizdegi alǵash memlekettik úlken portaldy ashý úshin jumystar jasap jatyrmyz», - dedi Sh. Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektory Erbol Tileshov búgin QR Joǵarǵy sotta ótken dóńgelek ústel otyrysynda.

Ortalyq basshynyń pikirinshe, rýhanı jańǵyrý aıasyndaǵy «Qazaq tilindegi 100 oqýlyq» jobasynyń birneshe eńbegin aldymen ádistemege arnaý qajet. Onsyz oqýlyq jazý qıynǵa túsedi. Sosyn AQSH pen Eýropaǵa kóp áýestenbeı, Shyǵystyń baı mádenı murasyn da umytpaý qajet.

«Biz Batysty da, Shyǵysty da birdeı ustaýymyz oryndy. Ol qos qanatymyz bolýy tıis. Máselen, Amerıkadan ekonomıka jaǵynan biraz nárseni alsaq, etıka men estetıkany Shyǵys bere alady. Osyndaı saraptaý jumystaryn júrgizgen jón», - dep atap kórsetti E. Tileshov.

Aıta keteıik, búgin QR Joǵarǵy sotynda «Rýhanı jańǵyrý - máńgilik el bolýdyń kepili» taqyrybynda dóńgelek ústel otyrysy ótti. Alqaly jıynǵa tarıhshylar, til mamandary, ádebıetshiler men sýdıalar qatysyp, «Bolashaqqa baǵdar: rýhanı jańǵyrý» maqalasyna, sondaı-aq «Týǵan jer», «Qazaq tilindegi 100 oqýlyq», «Qazaqstannyń kıeli jerler geografıasy» sıaqty jobalarǵa qatysty óz oılaryn ortaǵa saldy.   

---