InfoHub Logo

Lev Gýmılev atyndaǵy Eýrazıa ulttyq ýnıversıtetiniń prorektory, alashtanýshy ǵalym Dıhan Qamzabekulynyń aıtýynsha, Keńes dáýirindegi oqýlyqtardy jas ári daıyndyǵy joq mamandar jazǵan. Bul úrdis áli kúnge deıin saqtalyp keledi, dep habarlaıdy QazAqparat tilshisi.

«Alash zıalylarynyń barlyǵyn atyp tastaǵannan keıin 50-shi jyldary sol kezdegi Bilim mınıstri 20-25 jastaǵy jigitterdi shaqyryp alyp, oqýlyq jazyńdar dedi. Órimdeı jas jigitter jazǵan oqýlyqtar áli kúnge deıin aınalymda júr. Ondaı oqýlyqtardy zańgerler de, biz sekildi fılologtar da, tarıhshylar da jaza alady. Qazir qarasańyz, jurttyń bári oqýlyq jazǵysh bolyp ketti. Sodan qaıshylyqtar kóbeıdi. Árıne, ol oqýlyqtardy durys adam jazyp jatqan joq. Sol sebepti daý da týyndap otyr. Eger maman jazsa, onda eshqashan qate bolmaıdy. Maman birinshi, ekinshi, úshinshi basylymdar dep oqýlyǵyn shyǵarady da, jiberilgen qatelikterdi túzep otyrady. Qatelik túzetilgennen keıin oqýlyqtyń sapasy da durystalady. Bul - tabıǵı úderis. Sol úderisti kórgimiz keledi», - dedi Dıhan Qamzabekuly búgin Astanda ótken dóńgelek ústel otyrysynda.

Aıta keteıik, búgin QR Joǵarǵy sotynda «Rýhanı jańǵyrý - máńgilik el bolýdyń kepili» taqyrybynda dóńgelek ústel otyrysy ótti. Alqaly jıynǵa tarıhshylar, til mamandary, ádebıetshiler men sýdıalar qatysyp, «Bolashaqqa baǵdar: rýhanı jańǵyrý» maqalasyna, sondaı-aq «Týǵan jer», «Qazaq tilindegi 100 oqýlyq», «Qazaqstannyń kıeli jerler geografıasy» sıaqty jobalarǵa qatysty óz oılaryn ortaǵa saldy. Sol jerde Sh. Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektory Erbol Tileshov oqýlyqtardy aýdarýǵa qatysty óz usynysyn ortaǵa salyp, aldaǵy ýaqytta «Balalar álemi» memlekettik portalynyń ashylatyndyǵyn jetkizdi. Al profesor Dıhan Qamzabekuly qazirgi jańǵyrý Alash zıalylarynyń júrip ótken joly ekenin taǵy bir márte eske saldy.  

---