InfoHub Logo

Nemereler — maqtanym, ashyq bolsyn aspanyń
Osylaısha, balalar, jyrdan shashý shashqanym.
Birtalaı jumys tapsyrdym, bilimińdi arttyrǵyn.
Ákeń menen shesheńe jemisińdi tattyrǵyn!

*** *** *** ***

Urpaǵymnyń jalǵasy,
Shópshegimniń tól basy,
......... týyp qýandym,
Bolar ma eken el basy.
Áke-sheshe jasyńnan,
Tabylyp árkez qasyńnan,
Danalyqty úıretsin,
Qus ushyrmaı basyńnan.
 
Sendersińder tiregim,
Adal soqqan júregim.
Tatý-tátti ósińder,
Osy meniń tilegim!

*** *** *** ***

Barys-kelis kóp bolsyn, dushpandaryń joq bolsyn,
Qydyr daryp, baq qonyp, dastarqanyń mol bolsyn!

*** *** *** ***

Sózimniń joq dúr qatasy,
Ǵumyrly bol, botasy.
Qabyl bolar áleýmet,
Erdiń bizdeı batasy.
Áýmın

*** *** *** ***

Ata sózi daryp mol,
Aq ýyzǵa jaryp bol!
Abylaıdaı alyp bol,
Shoqan syndy jaryq bol,
Atyń shyqsyn alashqa – aı!
Abaıǵa uqsap mıly bol,
Qurmanǵazydaı kúıli bol.
Qamyn oılap halqynyń,
Sultanmahmuttaı syıly bol!
Shójedeıin jyrshy bol,
Birjan saldaı ánshi bol.
Qajymuqandaı eldiń eri bol,
Aqandaıyn  seri bol.
Álekeńdeı zańǵar bol,
Aqańdaıyn abzal bol.
Mirjaqyptaı syrbaz bol,
Maǵjandaıyn mańǵaz bol.
Sákeń syndy suńqar bol,
Tutat tektes tulpar bol.
Jambyldaıyn dúldúl bol,
Kúláshtaıyn bulbul bol,
Qanyshqa uqsap kemel bol.
Baýyrjandaı batyr bol,
Raqymjandaı batyl bol.
Marǵulandaı shejire,
Qasymdaıyn aqyn bol.
Baǵyń janyp, árdáıym
Jaqsylarǵa jaqyn bol!
Áýmın

*** *** *** ***

Farabıdiń basyn bersin,
Jambyldyń jasyn bersin.
Abylaıdyń júregin bersin,
Áziret Áliniń bilegin bersin.
Iassaýıdyń tilegin bersin,
Júziń nurly bolsyn,
Júregiń syrly bolsyn.
Tiliń jyrly bolsyn,
Jigittiń syrttany atanyp,
Óneriń segiz qyrly bolsyn.
Áýmın

*** *** *** ***

Jaǵyń túspeı jamandyq kórme, balam,
Qısyq tóre kisige berme, balam.
Eki dúnıeniń qyzyǵyn birdeı bersin,
Qolyńdy adaldyqqa serme, balam.
Baǵyń joǵary órlesin, balam,
Dushpanyń shenińe kelmesin balam.
Abyroıyń taımasyn, balam,
Basyńa dáýlet qusy ornasyn balam!
Áýmın

*** *** *** ***

Dárejesi beıne han,
Er bolyp óssin bala.
At qoı deseń balaǵa,
Esimi bolsyn — Imanjan.
 
Jigit bolsyn ónerli,
El-jurtyna bedeldi.
Qamqory bolsyn halqynyń,
Aqylǵa darhan kemeldi.
Áýmın

*** *** *** ***

Asan Qaıǵy babadaı sanaly bol,
Ǵaripte áz Jánibekteı panaly bol.
Kereıde Dástem saldaı baǵaly bol,
Ataqty Kelden bıdeı sanaly bol.

Er Dáýlendeı halqyńnyń batyry bol,
Mahambetteı jurtyńnyń aqyny bol.
Daý-janjal boldyrmasqa at salysqan
Qaramende sheshendeı maquldy bol.

Maraldaı kópke tısin sharapatyń,
Shóńkedeı arta bersin saltanatyń.
Jetim-jesir jarlyǵa pana bolǵan,
Jolandaı elge tısin shapaǵatyń.

Tobyqty Ánet bıdeı bataly bol,
Kishi júz Áıtekedeı ataly bol.
Bekerdeı qamqa kıgen oqalatyp,
Emenáli Jabadaı opaly bol.

Baltada Itikedeı qarýly bol,
Qanjyǵaly Jantaıdaı azýly bol,
Kishi arǵyn Jánibekteı er atanyp,
Óleńde, dastanda da jazýly bol.

Qazybekteı halqyńnyń danasy bol,
Qarabastaı jurtyńnyń balasy bol.
Eliń qorǵap, dushpanǵa soqqy bergen,
Úsh júzdiń Bógenbaıdaı panasy bol.

Qazaqta áz Táýkedeı taqytty bol,
Kereıde Eseneıdeı baqytty bol.
Top bolsaq qobyz tartyp, óleń aıtyp,
Án shyrqap Salqaradaı shabytty bol.

Úsh júzdiń Abylaıdaı tilegi bol,
Marabaıdaı aqyny – júregi bol,
Tóre, bıge tizginin bermeı ótken,
Naımanda Barlybaıdaı salmaqty bol.

Súıindik Oljabaıdaı kelbetti bol,
Táttiqara jyraýdaı zeınetti bol,
Syban Shondaı eliniń sen uıshysy,
Táttimbetteı halqyńnyń kúıshisi bol.

Belgibaı, Kúlekeıdeı bilekti bol,
Berishte Isataıdaı júrekti bol.
Halqynyń qamyn jegen erteli-kesh,
Qaraýyl Qanaı bıdeı tilekti bol.

Toqsan bıdeı kóp jasa júzge kelshi,
Zilqaradaı mal-basyń ósip-ónip,
Ketpes baılyq, taýsylmas qarjyly eter,
Túsińde kónek bersin qydyr kelip.

Jyraýdyń Buqar syndy óreni bol.
Aldy-artyn oılap kelip, pishetuǵyn
Adamnyń Qarabıdeı zeregi bol.

Kóshebede Tábeıdeı bedeldi bol,
Súıindikte Kóshetaı ónerli bol.
Kishi Arǵynda Janaqtaı jaýyryndy,
Úmbetedeı jyrǵa baı, kemeldi bol.

Nashandaı qan-maıdanda aıbatty bol,
Er Ashattaı shaıqasta qaıratty bol.
Qabanbaıdaı jigittiń bereni bol,
Sardardyń Er Tarǵyndaı Ereni bol.

Er Sary men Baıandaı áýletti bol,
Edige bı babandaı sáýletti bol.
Ǵaskeri at, túıemen jabdyqtalǵan,
Kereıde Turypberdideı dáýletti bol.

Orynbaıdaı elińniń shesheni bol,
Er Syrymdaı halqyńnyń kósemi bol.
Kóshebe Maıly bıdeı tym kóregen,
Daýly iste sózge usta, kósheli bol.
Kishi Arǵyn Shoqaı bıdeı alymdy bol,
Atyǵaı Shal aqyndaı shalymdy bol.
Shektide Arystandaı bıazy bol,
Taýzarda Jankisideı daryndy bol.

Qursary Áldıbekteı sheshimdi bol,
Ashamaıly Tileshideı kesimdi bol.
Quısa tolmaı, tolǵanda aspaıtuǵyn,
Jańbyrshy Maldybaıdaı esimdi bol.

Kórsetken buqaraǵa  úlgili jol,
Tolybaı synshydaıyn jolbasshy bol.
Jaýlarǵa qarsy shyǵyp, bastaıtyn qol,
Kereıde Aqpanbetteı qolbasshy bol.

Uly júz Tólebıdeı aılaly bol,
Kishi Arǵyn Bógenbaıdaı paıdaly bol.
Qıyn, qystaý kezeńde qorshaý buzǵan,
Taraqty Baıqozydaı aıbarly bol.

Kereıde Turlybekteı tabandy bol,
Sháýkerde Baıdalydaı amaldy bol.
Qınalǵanda erlerge qaırat bergen,
Malaısary batyrdaı jaıdarly bol.

Tóle bı babańdaı zeınetti bol,
Tamada er Esetteı kelbetti bol.
Bıkede Manaqadaı aıaýly bol,
Máýeli báıterekteı saıaly bol.

Tiline ǵazázildiń ermeıtin bol,
Dushpanǵa tizginińdi bermeıtin bol.
Ónerge óse kele qushtarlanyp,
Qıaǵa qulashyńdy sermeıtin bol.
Áýmın

 

 

 

---