InfoHub Logo

Kez kelgen adam: qarapaıym malshy da, ulaǵatty ustaz da, el basqarǵan ákim de, kishkentaı bala da, eńkeıgen qarıa da baqytty ómir súrgendi qalaıdy. Biraq árkim baqyt degendi ár túrli túsinedi. Bireý úshin baqyt joǵary qyzmet bolsa, endi bireý úshin dúnıe-múlik, asqan baılyq bolýy múmkin. Taǵy bireýler úshin baqyt - deniniń saýlyǵy, otbasy músheleriniń amandyǵy, eliniń tynyshtyǵy. 

Adamdar baqytty bolǵysy keledi: bir-birine "baıandy baqyt" tileıdi, ǵumyr boıy baqytqa jetý jolynda izdenedi, tynymsyz eńbek etedi. Alaıda árkim shynaıy baqyttyń qadirin sezine bile me?

Keıde shalqyp-tasyp ómir súrip jatqan adamdardy kórip: "Ne degen baqytty!"- dep, aýyr turmystyń zardabynan qınalǵandyqtan, dáýletti bolsaq, qıynshylyqtan qutylyp, jaqsy ómir súrip ketemiz degen úmitpen qyzyǵyp qaraıtyn kezderimiz de bolady. Densaýlyǵymyz syr bere bastaǵanda, qol-aıaǵy bútin, densaýlyǵy myqty adamdardy kórip: "baqyttyń qadirin túsinse eken", - dep oılaımyz. Bıik belesterdi baǵyndyryp, jetistikke jetken, el qurmetine bólengen jandardy "qandaı baqytty" dep esepteımiz. 

Baqytty alystan izdeýdiń qajeti joq. Óıtkeni ómirge on eki músheń saý, aqyl-esiń durys bolyp kelýińniń ózi baqyt emes pe? Álpeshtep ósirgen áke-shesheńniń qýanyshyń men kúıinishińe ortaqtasyp, áli de tileýińdi tilep, qasyńda júrgeni - ol da baqyt emes pe? Qazaq eliniń aspanynda táýelsizdiktiń kók týynyń jelbirep turǵany da - barsha qazaq úshin zor baqyt. 

Shyǵys ǵulamasy Ábý Nasyr ál-Farabı: "Baqyttyń máni - parasattylyqta, árkimniń óz aldynda ıgilikti maqsat qoıa bilýinde... adamnyń óz minez-qulqyn, is-áreketin erikti túrde ózgertip, ıgilikke baǵyttap otyrýynda",- degen. Ras, eger biz baqytqa jetý jolynda jaman minez-qulqymyzdy qurbandyqqa shalyp, bar isimizdi izgi jolǵa arnasaq, sol kezde baqyttyń máni de artady. 

Men úshin baqyt - óziń úshin, óz paıdań úshin ǵana emes, ózińe jaqyn ne kómegińe muqtaj ózge jandarǵa qol ushyn soza alatyndaı dárejede bolsam, baqyt - sol. Óıtkeni bireýge jaqsylyq jasap, onyń júzinen rızalyq pen qýanyshtyń belgisin kórý zor ǵanıbet qoı. Baqyttyń balyn tattym dep osyny aıtýǵa bolady.

Al keń maǵynada naǵyz baqyt bul - ana tilińde oıyńdy jetkize alý, ekinshi bir adammen bóten tildi aralastyrmaı, qazaq tilinde áńgime qurý. Naǵyz baqyt bul - elińe, onyń damýyna paıdańdy tıgize alý.

Baqyt árkim úshin ár túrli, alaıda qandaı bolsa da, ol ómirge tek izgilik ákeledi, tek qana ony sezine bilýimiz kerek. Barsha qazaqqa baıandy baqyt tileımin. 

---