InfoHub Logo

Bir jyly el jazylyp jaılaýǵa shyǵyp, tórt túlik mal Arqanyń apaı tósine tuıaq iliktirgen kezde Túsipbektiń úıine ádettegideı Áýpik pen Naqyp bastaǵan Dáýlettiń aǵaıyndary keledi. Qadirli qonaqtaryna Túsipbektiń úı ishi jaıylyp jastyq, ıilip tósek bolyp, jandary qalmaı kútedi. Túsipbek qobyzyn sırek ustaıtyn adam eken. Biraq syıly qonaqtarynyń kóńili úshin qobyzyn aldyryp, ádettegideı inisi Aqynbaıǵa qulaq kúıin keltirtedi, shaıyryn jaqqyzyp baptatyp alady.

Túsipbek qobyz aldyrtqannan-aq úı tóńiregindegi bala-shaǵanyń dabyryn tyıyp, úı ishindegiler tıisti oryndaryna jaıǵasyp tynyshtyq saqtaıdy. Tek qana bosaǵa jaqta tuǵyrda otyrǵan búrkit «qıaq-qıaq» dep shaqyryp, tynyshtyqty buzǵandaı bolady. Aqynbaı kirjiń etip: «Qolbala emes, túzden alǵan qus edi, qaıyrýǵa kónbeı qoıdy, qaısar eken», — dep, qonaqtardyń aldynda aqtalǵandaı shyraı tanytady.

Úıdiń shı jaǵynda Túsipbektiń Shámshıadan týǵan Shyryn degen qyzy shı túbindegi qara sabanyń syldyrmaqty pispegin qyzyqtap turady. Jańa qaz basýǵa jarap qalǵan Shyrynnyń ústinde qyzyl kóılegi bolsa kerek.

Sodan, Túsipbektiń qobyzdy qolyna alǵany sol eken, bosaǵadaǵy búrkit dúr silkingende tuǵyr basyna oraı salǵan balaq baýy bosap ketedi. Aıaǵynyń bosaǵanyn sezgen asaý búrkit tuıaǵymen sart-sart uryp, tomaǵasyn sypyryp túsiredi. Tomaǵa túsisimen janary jarq-jurq etip, úıdiń ishindegilerdi jutyp jibererdeı bir sholyp shyǵady da, kózin saba túbinde seltıip turǵan qyzyl kóılekti Shyrynǵa qadaıdy. İle lyp etip tuǵyrdan qarǵyp túsken búrkit balpań-balpań basyp teris qarap syldyrmaqpen oınap turǵan Shyrynǵa qaraı júredi.

Úı ishindegiler siltideı tynyp, ańyryp qalady. Sebebi, túz taǵysynyń minezi aıan, dál qazir tosyn qımyldy sezse boldy, kóz aldyndaǵy qyzyldy qyzǵanyp tuıaq jumsaýy múmkin. Búrkittiń shalt qımyly jaı oǵyndaı jyldam ekenin, sol jerde jat qımylmen jarysyp tuıaq jumsasa, balany maıyp qylatynyn ásirese qusbegi Túsipbek jaqsy biledi. Jaqsy bilgendikten de, Túsipbek tyǵyryqtan shyǵar sheshimdi ózi tabady.

Úı ishindegiler «endi qaıttik!» dep býlyǵyp otyrǵanda Túsipbek qolyndaǵy qara qobyzyn syza jóneledi. Qıan dala, qıyr shetten talyp jetkendeı bir tosyn saryn úzdige suńqyl- dap kelip, shıryǵa shyryldaıdy.

Sonda, qyzyl kóılekti balanyń tý syrtyna tónip kelgen búrkit moınyn qylqyńdatyp, ashyq turǵan túndikten zeńgir kókke kózin tóńkere qadap turyp qalyp edi deıdi. Búrkittiń qobyz únine alańdaǵan sátin paıdalanǵan Aqynbaı lyp etip ornynan turyp, túz taǵysyn tik kóterip ákep tuǵyryna qondyrady.

---