Men basymnan qorqamyn atom ba dep,
Bir álemet jasalyp jatyr ma dep.
Mundaı-daǵy surapyl tap bolar ma,
Ózi bolǵan ózimen paqyrǵa kep.
Men basymnan qorqamyn atom ba dep.
Belgisiz elementter mıymda oınap,
Mıym qaınap barady, mıym qaınap.
Belgisiz ǵalymdarǵa meken bolyp,
Óz deneme óz basym buıyrmaı ma?!
Bul ǵalamnyń túbine jetetindeı,
Sumdyq-sumdyq synaýlar ótetindeı.
Men basymnan qorqamyn, men bolmasam,
Atom - mıym jarylyp ketetindeı.
Júrgen jan em baıymaı; tapshysynbaı,
Sarsań boldym ertegi baqsysyndaı.
Basym qaldy jasyryn polıgon bop,
Ózim turmyn maqtaýly saqshysyndaı.
Men basymdy jasyram, jasyram kep;
Mıymdaǵy synaýlar basylar dep.
Men mıyma senemin ajal bolmaı,
Dúnıege shýaq bop shashylar dep!

---