InfoHub Logo

Alataýdyń arǵy jaǵynan jaý qoly qaptap kele jatady. Jalaıyr qarıalary jan-jaqtaǵy elge at shaptyrady. Bul habardy esitip Qarataýdan Báıdibek batyr qol jınap attanady. Eki jaq Altyn emel jotasynda toqaılasady. Áýeli jekpe-jekke shyǵady. Túıedeı qara atqa mingen bir shoıyn qara ortaǵa shyǵady. Bul qalmaqtyń Dóde batyry eken. Oǵan jalaıyrdyń Alshynbaı batyry qarsy júredi. Ekeýi naızalasady. Alshynbaıdyń qylyshy qaq bólinip, Dódemen arpalysyp júrip mert bop ketedi. Báıdibek batyr:

— Endi kim shyǵady? — dep aıqaı salady. Naımannyń Shektibaı batyry kók atyn oıqastatyp Dódege jetip barady. Taǵy aıqas, taǵy naızalas. Shektibaı da dúleı Dódege tótep bere almaı aýyr jaralanyp qalady.

— Taǵy kim bar? — degende, jaýǵa qarama-qarsy qaptap turǵan sarbazdar arasynan eshkim «men shyǵamyn» deı qoımaıdy. Álden ýaqta namysqa tyrysyp, taı mingen taldyrmash sary jigit:

— Men shyǵar edim, biraq minetin jaramdy atym joq, —  deıdi. Báıdibek batyr:

— Min meniń atyma, — dep astyndaǵy Aqboz aıǵyryn túsip beredi de, ol Dódege:

— Al, batyr, bizdiń balamen shaıqasýǵa qalaısyń? — dep ony keketedi. Dóde:

Men balamen kúreske shyǵatyn bala emespin! óziń kel! —  dep gúr ete qalady. Báıdibek:

— Kelseń kel, ózim de sol sózińdi kútip tur edim, — dep óziniń Aqboz aıǵyryna minip, oǵan qarsy shyǵady. Sarbazdary: «Iá, Qudaı, arýaq qoldaı gór!» dep tilep, shýlasady. Ekeýi áýeli qylyshtasady. Dódeniń qara kúshi basym bolǵanymen, aıla-tásili shamaly eken. Ol Báıdibektiń
shapqan ábjil qımylyna tótep bere almaı ábden qan sorpaǵa túsedi. Dóde bar kúshin jınap alyp, endi naızasyn kezenedi. Báıdibek te naızasyn yńǵaılaıdy. Onyń jastaıynan jylqy baǵyp júrgende, qart jylqyshylardan úırengen daǵdyly bir ádisi — quryqqa uqsatyp naızasynyń ushyna shylbyrdan qyl tuzaq baılap alatyn-dy. Ol endi Dódege sol tásilin qoldanbaq. Muny Dóde de, jaý jaǵy da eleı
qoımaıdy, onsha mán bermeıdi. Ekeýi ary-beri atoılap shaýyp, naızalasyp júredi. Bir ýaqta Dóde oǵan oqtala bergende Báıdibek onyń buǵydaı moınyna qyl tuzaqty shalyp alyp, at-matymen súıreı jóneledi. Dóde qolyndaǵy naızasyn tastaı salyp, eki qolymen býynyp bara jatqan moınyn bosatyp almaq bop jantalasady. Báıdibek batyrdyń temirdeı tegeýrindi qoly qoıa ma, áne-mine degenshe Dódeniń attan aý-
darylyp túsken aıýdaı denesin jerge súıretip eki aınaldyryp tastaıdy da, jaıyna júre beredi. Sóıtip, Dóde azappen qylqynyp jan tásilim qylady: Báıdibek qoly jaýdy túre qýyp, tas-talqan etip jeńip shyǵady.

---