InfoHub Logo

«Alyp ta, dana da anadan týady» dep halyq beker aıtpaǵan ǵoı. Ertede Syr boıynda Báıdibek degen baı ómir súrgen kórinedi. Onyń eki áıeli bolypty. Toqalynyń boıy alasa, ózi tolyq bolǵandyqtan jurt ony «Domalaq» dep atap ketken, shyn aty Búbijar eken. Búbijardy bertin kele aqyl-parasatyna qaraı el qurmettep «Domalaq ene» atandyrǵan.

Báıbishe turǵanda kishi áıelge kún bar ma? Úlken áıel kúndestigin jasaıdy. Báıbishe túnde Domalaqtyń úıine túıe bolyp kelip súıkenedi. Sonda báıbishe ekenin bilip, Domalaq ene jatqan jerinen turmaı:

— Atshý-atshý, janýar, túıemisiń, myńǵa jetkin, qastyq etken adam bolsań, jaman nıetiń ózińdi atsyn! — deıdi eken.

Bir kúni aýyl kóshedi. Báıdibek baı balalaryn ertip, erterek qonatyn jurt tańdaýǵa ketedi. Sary báıbishe Domalaqty úıime jurtqa tastaıdy. Biraz ýaqyt ótkende aýyldy shabýǵa kele jatqan jaýdyń qarasy kórinedi. Jurtta jalǵyz qalǵan Domalaqtan álgiler jón suraıdy. Ol shapqynshylarǵa jónin aıtpasa da, jaý kóshtiń izine túsip, aýyldy shaýyp, barlyq jylqylaryn aıdap áketedi.

Qaıtarda eski jurttyń qasynan ótedi. Kóńili tasyǵan jaýdyń basshysy Domalaqqa aıaýshylyq bildirip:

— Myna olja jylqydan qalaǵanyńyzdy alyńyz, — dep usynys jasaıdy.

Sonda Domalaq ene:

— Endeshe, ana jal-quıryǵy uıysqan kári aryq, sary bıeni jelige baılap ketińder, basqasynyń keregi joq, — deıdi.

Shapqynshylar sol ekeýin qaldyryp ketedi. Sol kúni tús aýa Báıdibek uldarymen jaýdyń artynan qýyp keledi. Domalaqtan jón suraıdy.

— Sender jaýdy qýmańdar, olar kóp, bosqa mert bolasyńdar! Myna sary bıe turǵanda jylqy eshqaıda ketpeıdi. Ózderi keshke qaraı qaıtyp keledi, — deıdi.

Bular Domalaqtyń aıtqanyn tyńdamaı, jaýdyń sońynan qýyp baryp, urysta birqatary qaza tabady. Al jylqylar jaýdyń aıdaýyna kónbeı, tym-tyraqaı qashyp, sol kúni keshke sary bıege kelip shurqyraı jınalady.

Mine, osyndaı kóptegen tapqyr da aqyldy isteri arqasynda Domalaq halyq arasynda ańyzǵa aınalyp, úlken bedelge, syı-qurmetke ıe bolypty.

---