InfoHub Logo

Jaýlyǵynyń shetine úsh tıyndyq qara baqyr túıip, Baıjandy ertip, sheshesi Jaqyptikindegi moldaǵa apardy.

Balalar ý-shý oqyp jatyr.

Kóse, aryqtaý qara kisi otyr. Baıjan úıge kirgende ne bolǵanyn bilmedi... Býyny bosady, kisige qaraýǵa júzi shydamady, tómen qarady, ájesiniń tasasyna jasyrynyp turdy. Bolbyraǵan jas júregi eljirep, býyny dirildep, aıaǵyn basyp turýǵa shamasy áreń keldi. Balalardyń kózi Baıjanda. Baıjan uıalyp tómen qaraıdy. Molda basyn kóterip qarady da:

— Joǵary shyǵyńyz, báıbishe! — dedi, molda.

Baıjan moldanyń sóılegenine tań qaldy. Molda adamsha sóılemeıtin, oqýsha sóıleıtin bir túrli basqa zat dep biletin edi. Onyń oıynsha molda degen ol zor dárejeli jáne adamnyń oıyndaǵysyn biletin bir kisi edi.

Nurly kún uıasynan jańa bas kóterip, álemge sáýlesin túsirdi. Eldiń kóbi qalyń uıqyda jatyr. Jazǵy qysqa tańǵa uıqysy qana almaı, erteńgi qońyr salqyn mezgilde jurt rahat pen tynyshtyqta. Aýyldan oqshaýyraq tigilgen kishkene qosta on shaqty bala tynyshtyqtyń sánin buzyp, yń-jyń shýlap otyr.

Balalar kózderi jasaýrap, jaǵynyń júni úrpıip, esinep-esinep yzyńdap, yńyldaıdy, áıteýir daýys shyǵaryp, án qosqanyna máz. Sózinen jańylyp, qalǵyp bara jatqan balany tórt órme qamshymen moldekeń arqaǵa tartyp qalǵanda shoshyp oıanady. Balalar shý ete qalady. Qasqyrdan úrikken jylqysha, jumyla shyrqyrap, taǵy shýlaıdy. Basynda eltiri bórik, shalbarsyz, uzyn jeleń aıqara jamylyp, sustanyp, jylandaı ysqyryp, shal molda balalardyń záresin alyp otyr. Bir japyraq qaǵazdyń kirden jyltyraǵan betindegi iri jazýǵa qarap, segiz jasar Baıjan ilgeri-keıin shulǵyp, «pı-qaf», «qaf-pı» dep yzyńdaıdy, moldanyń kózi túsip ketkende, uıasynan kenetten ushqan torǵaı sıaqtanyp, qattyraq shyryldaıdy. Anda-sanda molda: «Oqyńdar!» — dep, esinep qoıady.

Uıqy basyp, maýjyrap otyrǵan Baıjan jalyqqannan janyndaǵy balaǵa sybyrlap birdeme deı berip edi, jaqqa shart etkizip molda salyp jiberdi. Iegi kemseńdep jylaıyn dep edi, qamshysyna molda qol sozǵan soń, kózinen jasyn tıyp, «pı-qafqa» sala bastady.

Birazdan soń uıqysyn ashý úshin Baıjan qaǵazyn búktep serigine berdi, esik aldyna baryp, qol qýsyryp: — Moldeke, qajet raýma? — dedi.

— Jańa keldiń, haıýan, otyr! — dedi molda.

Baıjannyń kózi jasaýrap, janyndaǵy úlkenirek serikterine jalt-jalt qarap, ornyna qaıta otyrdy.

Jóneý

---