InfoHub Logo

Mektebimiz qalyń aýyldyń ortasynda, qyrańdaý bıik jerde. Syrt jaǵynan aq balshyqpen sylanǵan. Eki bólmede klasymyz bolady, bir bólmede sheshinemiz. Qalǵan eki bólmede oqytýshylarymyz ben qyzmetshi turady. Ár bólmede úsh terezeden, eki bólmege bir peshten. Ár klasta eki bólim, eki bólimge eki oqytýshydan. Bizdiń klasymyzda jıyrma parta bar. Bir partada eki baladan otyramyz. Partalar qatar-qatar qoıylǵan, ár qatardyń arasynan kisi júrerlik jer qalynǵan. Partada otyrǵanda jaryq sol jaǵymyzdan túsedi. Partalardyń aldynda oqytýshyǵa qoıylǵan stol men oryndyq bar. Oqytýshynyń sol jaǵynda qara taqta turady. Taqtanyń bir jaǵy syzýsyz, ekinshi jaǵy qyzylmen syzýly. Taqtaǵa biz bormen jazamyz. Taqtanyń artynda shkaf turady. Shkaftyń ishinde kitap, qaǵaz, qaryndash, sıa saqtalady. Bizdiń qarsy aldymyzda jarda kóbeıtý men ólsheýler satysy ilýli turady.

Biz tórtinshi bólimde oqyp júrmiz. Endigi jyly ekinshi basqysh mektepke kirmekpiz. Osy kúni esep ǵylymyn, jaǵrapıany, qoǵam qurylysyn, jaratylys ǵylymyn, ana tilin oqyp júrmiz. Bulardan basqa súgiret (sýret) salyp úırenemiz. Oqytýshymyz bıyl aýyl adamdarynan jer surap alyp, bizge baqsha salǵyzdy. Jazdaı baqshamyzdy ózimiz sýardyq. Kúz bolǵanda ózimiz jınadyq. Mekteptegi balalar jınalyp eki jetilik jornal shyǵaramyz. Jornalymyzdy shákirtterden basqa ata-analarymyz da oqıdy. Keıbir kúnderi oqytýshylarymyz bizdi jınap alyp, kitap oqyp, túsindiredi. Ia ózimiz jınalyp oqyp, oqylǵan kitap jaıynda sóz qylamyz. Jazdy kúni oqytýshylarymyz ertip júrip jerdiń quıqasy, shóbi, jandyqtarmen tanystyrady. Eginshiler saban aıdap jatqan jerge alyp baryp, jerdi qalaı, qashan jyrtýyn, qalaı tuqym seýip, qalaı tyrmalaýyn kórsetedi. Bıyl Marqabaı degen joldasymyzdyń ózi bir jerge tuqym seýip shyqty.

Sabaǵymyzdy bilmeı qalsaq, oqytýshymyz qaıtadan túsindiredi. Keıip, jazalandyrmaıdy, keıde qasyndaǵy joldasyna maza bermeı, tentek bolǵan balany ońasha otyrǵyzyp qoıady. Ata-analarymyz ben oqytýshylarymyzdy renjitpelik dep sabaǵymyzdy durys oqımyz.

---