InfoHub Logo

Máýlana Jalaladdın Rýmı jomarttyq týraly bylaı degen eken: «Jomarttyqta jáne kómektesýde aǵyp turǵan sýdaı bol. Meıirim men raqymdylyqta kún sıaqty, ózgelerdiń kemshiligin jasyrýda tún sıaqty bol. Ashýshańdyq pen qyzbalyqta óli sıaqty bol. Qarapaıymdylyq pen kishipeıildilikte topyraq sıaqty bol. Jumsaqtyqta teńizdeı bol. Ia qandaı bolsań solaı kórin, ıa qalaı kórinseń, sondaı bol.»

Halyq jadynda qurmetpen óziniń qaıyrymdylyǵy men jomarttyǵyna saı aty jaıylǵan Atymtaı jomarttan ( Hatım-Taı ) dostary «Ózińizden de jomart bireýdi kórgensiz be?» dep suraıdy. Sonda ol: «Iá, kórdim» dep, myna oqıǵany aıtyp beredi:

Bir jetim jas jigitke qonaq bolǵan edim. Maǵan qoı soıyp, dastarhanyn jaıdy, syı-sıapat kórsetti. Qoı etinen bir jeri maǵan qatty unady. Ant etip, «Myna jeri óte dámdi eken» dedim. Jigit birden syrtqa shyǵyp ketti. On qoıy bar eken. Bireýin soıyp qoıǵan, qalǵan toǵyzyn da birden soıyp jiberdi. Maǵan unaǵan jerlerin pisirip, aldyma alyp keldi. Men bolǵan jaıdan habarym joq. Qaıtarda esiktiń aldyndaǵy qandy kórip, mán-jaıdy túsindim de, ursyp:

«On qoıdyń bárin soıǵansyń ba? Munyń ne?» dedim.

Jigit «Onda turǵan nesi bar? Sizge bir nárse unap qalǵan eken. Ol nárse meniń qolymda, sizden aıap qalǵanym durys bola ma?» dedi.

Bul oqıǵany tyńdap otyrǵan dostary:

«Jetim jigittiń syı-sıapatyna siz de oǵan bir nárse bergen shyǵarsyz?» dep surady. Sonda Atymtaı jomart jaýap berip:

— Iá, berdim, biraq asa mańyzdy sanalmaıdy, — dedi.

— Ne berdińiz?

— Úsh júz túıe men bes júz qoı.

— Olaı bolsa, siz odan da jomart ekensiz.

— Joq, ol jigit menen de jomart. Óıtkeni ol malynyń bárin berdi. Al men malymnyń tek azyn ǵana berdim. Kedeı adamnyń jarty nanyn tolyqtaı qonaqqa bergeni mańyzdy ma, álde baı kisiniń úlken tabynynan bir túıesin qonaǵyna soıyp bergeni me?

---