InfoHub Logo

Sol Syrym batyr bir kúnderde týmalaryna renjip, ne sebep bolsa da mamasyna (anasyna) aıtqan kórinedi:

— Áı, anam, sen meni kimnen týdyń? Bylaıǵy balalaryńnan baıqasa, qulqym ózge kórinedi. Qalaıda mende bir shúbá bar dep oılaýǵa bolady. Durysyńdy aıt, jasyrma! — depti. Sonda anasy:

— Shyraǵym, Syrym, áýeli dáret alyp keleıin, sońynan aıtaıyn, — dep, túregelip quman alyp, dáretin alyp bolyp:

— Al, balam, sen tyńda, men aıtaıyn, seni basqa adamnan týǵanym joq, osy ákeńnen bolǵan adamsyń. Biraq ózgeris mynadaı: saǵan jerik bolyp talǵap júrgenimde, el Saýran aınalyp alysqa kóshti. Eldiń kóptiginen kezdesken qudyqtyń sýy jetpeı, halyq talasyp, daǵdaryp malǵa da, adamǵa da bolmaı, aqyrynda boqtasyp tóbeleser boldy. Sonda astynda kúreń jorǵa aty bar, laıyqty kıimi bar bir orta jastaǵy
adam kelip aıqaılap: «Halqym, tyńdańyz, sizderden bir aýyz sóz tilegim bar», — degen, halyq toqtap: «Al aıt», — degendegi sózi mynaý. Halyqtyń ortasyna kirip, tóbelesti toqtatyp, mynadaı jolbasshylyq aqyl aıtqan: «Qudyqtyń sýyn eń áýeli adam balasyna ishýge alynsyn, talaspaı kezektesip, sonan soń mingen at, jekken kólik sýǵarylsyn, nege deseń, basqa tamaǵy joq bolar, olardyń kóshi toqtamasyn, júrip ketsin. Aldaǵy qudyqtan taǵy baryp sýǵaryp, bularǵa bosatar, sonan soń orta sharýanyń maly iship bolar da kóshsin, qalǵanyn óndirip baılar malyn sýǵarsyn!» degen. «Al solaı etseńder sýǵa muqtaj bolmassyz, shóldemessiz» degen. Bul sózge halyq razy bolyp, urys-talas qoıylyp, «rahmet aıtqan aqylyńnan!» dep halyq kónip solaı etken, sýǵa qanyq bolǵan. Sondaǵy manaǵy adamnyń aqylyna, halyqty toqtatqanyna, sýǵa qandyrǵanyn kórip: «Áı, jaratqan Qudaıym-aı, osyndaı kúıeýi bar áıeldiń armany barma eken, bolmasa osyndaı bala týǵan qatynnyń armany bar ma eken?» dep nalyp edim. Shyraǵym, sol nalyǵanyma Táńirim seni sol adamnan artyq etip berdi, halqyń aýzyńa
qaraıdy. Dosyń kórgen kóńilin ashty, dushpanyń habaryńnan qashty. Sol tilekke seni solaı etip berdi, — depti.

---