InfoHub Logo

S.Beısetaev 1922 jyly týǵan. Aıakóz qalasy «Astyq daıyndaý» bóliminde uzaq jyldar boıy jumys istep, qurmetti demalysqa shyqqan eken. Sóz qadirin biletin Seıitqazy áýelgi sózin:

— Jaqsy ǵoı, quda, kelgeniń,
El aralap júrgeniń.
Bilimdiniń aýzynan
Qazyna terip júrgeniń.
Ár ultta aqyn kóp,
Aıtady ǵoı bilgenin, —

dep óleńdete bastady.

— Abaı ári dos, ári atqosshysy Erboldy, — dep jalǵastyrdy áńgimesin Seıitqazy, — kereı jaqqa el sharýasymen jumsaıdy. İsin tyndyryp, qaıtarǵa bettegen Erbol ógiz minip, qoıyn erte órgizip bara jatqan toqsandaǵy kárıaǵa kez bolyp, sálem beredi. Jón surasady.

— Sizden estip edim dep elge aıtyp júreıin, este qalatyn bir esti sóz aıtpas pa ekensiz? — dep taqaýyrlaı túsedi Erbol kárıaǵa. Qoıy uzap, alańdap turǵan kárıa:

— Jasynan baıdyń qoıyn baqqan mendeı kedeıden ne sóz shyǵýshy edi, qaraǵym. Qoıym ketip qalady, bógeme, —  dep kóldeneń kez bolǵannan qutylǵysy keledi. Erbol tipti taqymdap bolmaǵan soń kárıa:

— «Ógizge mingen kisiniń eki ókshesi ı bolady, jaman bala óz tórinde jatyp óz úıine bı bolady», — dep ógizin tebinip, qoıyna qaraı betteı beripti.

Erbol úıine kelse, balasy malǵa shyqpaı, eki qolyn tóbesine aıqastyra tórde shaljıyp jatqan eken. Balasynyń myna qylyǵyna ashýlanǵan Erboldyń oıyna kárıanyń sózi túse ketip, balasyna:

— Shaljıyp jatysyn! Mal qaıda? Túzde qoı baǵyp júrgen kereıdiń bir shaly, seniń úıde búıtip jatqanyńdy qaıdan bildi eken? — depti qatýlana túsip. Qoı baqqan kárıanyń eki-aq aýyz sóziniń áseri Erbolǵa qandaı bop tıgeni oqyrmanǵa oı salatyndaı.

---