InfoHub Logo

HİH ǵasyrda Uly júz Alban-Qyzylbórik elinde Qojamqulatty ishi tar, kúıgelek, shyr minezdi sarań baı ómir súripti. Onyń Uly júzge belgili «Kókqasqa» degen báıgi atyn baı el aralap ketkende, erke-sholjań, alańǵasar uly Masǵut:

— Ákeńniń Qudaıdan tilep alǵan jalǵyzy da, erkesi de, serkesi de sensiń. Bir atqa bıligińdi júrgize almaǵanyń ba? —  dep bireýdiń azǵyrýyna túsip, óziniń kóńiljeter adamyna berip jiberedi.

Masǵut sol shaqta on bes-on altylardaǵy úılenbegen bozbala eken. Sapardan oralyp, balasynyń keleńsiz qylyǵyna  ishi kúıgen, ashýy asyp-tasqan baı Masǵutty taıaq alyp jaıaý qýady. Uly jetkizbeı entiktirip, dymy quryp, sharshaıdy. Áli bitip-sharshap jerge otyra ketken Qojamqul balasyna basqa ister amaly qalmaǵan soń, jer tyrnap, kók julyp, bir qolmen qulaǵynyń ushynan ustap turyp, ekinshi qolyndaǵy kezdikpen óz qulaǵyn ózi oryp jiberipti. Laqtyryp jibergen qulaqtyń ushyn bir kúshik ala qashady.

El qulaǵy elý emes pe? Baı óz aýylyn qansha tyıam degenmen bul habar elge jaıylyp ketipti.

Qulaqtaǵy jara qara qotyrlanǵan kezde baıdyń úıine serikterimen Súıimbaı aqyn túsedi. Baı jaraly qulaǵyn basynyń astyna keltirip, jastyqty qalyńdatyp aýyrǵan bolyp jata qalady. Qojamqul Súıimbaılarǵa basyn kótermesten, kóńilsiz sálemdesip, báıbishesine:

— Myna kisiler qymyz iship ketsin, qymyz qoı dastarhanǵa, — dep qýzap, Súıimbaılar tezdetip attanyp ketse degendeı nıet bildiredi. Baıdyń pasyq nıetin, aram oıyn sezip otyrǵan alǵyr aqyn Súıimbaı:

— Dýlat degen bir el bar,
Úlken pishken tondaı-dy.
Shapyrashty degen bir el bar,
Bireýge qońsy qonbaıdy.
Sarúısin degen bir el bar,
Qarǵys aıtyp Domalaq,
Eki bolystan ozbaıdy.
Qyzylbórik degen bir el bar
El ishinde neler bar,
Óz qulaǵyn ózi kesip,
Qojamqul sirá ońbaıdy, —

degende, Qojamqul baı jastyqtan basyn julyp alyp, Súıimbaılardan keshirim ótinip, «syıly qonaǵym bop ketińizder dep» aıaǵyna jyǵylǵan eken.

Sóıtip, dúnıeqońyz, sarań baı týra sóılep, tilimen oryp túsetin alǵyr aqynnan daýasyz jaza tartypty.

---