InfoHub Logo

Qazaqstanda memlekettik bilim berý jınaqtaý júıesi aıasynda bilim berýdegi jınaqtaýshy saqtandyrý tetigi ázirlendi.

«Bul saqtandyrý ónimi bank depozıtine balama bolyp tabylady. Banktik depozıtke qaraǵanda, bul ónim qosymsha saqtandyrý qorǵaýyn usynady. Ata-anasy qaıtys bolǵan nemese eńbekke qabilettiliginen aıyrylǵan jaǵdaıda saqtandyrý sharty boıynsha jınaqtalǵan somaǵa qaramastan oqý quny tólenedi. Budan basqa, Saqtandyrý tólemderine kepildik berý qory tólemderdiń tolyq somasyna kepildik beredi, al bank salymy boıynsha kepildik 10 mln teńgeden aspaıtyn somany jabady», - dedi QR Qarjy naryǵyn retteý jáne damytý agenttigi tóraǵasynyń orynbasary Marıa Hadjıeva Ortalyq komýnıkasıalar qyzmetinde ótken baspasóz máslıhatynda.

Onyń aıtýynsha, ómirdi saqtandyrý kompanıalarynyń memlekettik bilim berý jınaqtaý júıesine qatysýy osy ónimdi satýdyń balamaly arnasyn qurýǵa jáne halyq arasynda osy júıeniń tanymaldyǵyn arttyrýǵa múmkindik beredi.

M. Hadjıevanyń aıtýynsha, bıylǵy 1 qyrkúıektegi jaǵdaı boıynsha memlekettik bilim berý jınaqtaý júıesi baǵdarlamasyna 4 bank qatysady jáne jalpy somasy shamamen 33,5 mlrd teńgege 22 myń depozıt ashylǵan.

Aıta keteıik, 12 shildede Memleket basshysy «Qazaqstan Respýblıkasynyń keıbir zańnamalyq aktilerine saqtandyrý naryǵyn jáne baǵaly qaǵazdar naryǵyn retteý men damytý boıynsha ózgerister men tolyqtyrýlar engizý týraly» QR Zańyna qol qoıǵan edi.

Zańǵa sáıkes, Qazaqstanda erli-zaıypty zeınetaqy anýıtetin engizý josparlanyp otyr. Ol erli-zaıyptylardyń nemese jaqyn týystardyń zeınetaqy jınaqtaryn biriktirýge jáne olardyń árqaısysyna jeke keste boıynsha ómir boıy tólemder belgileýge múmkindik beredi.

---