InfoHub Logo

Qylqalamnyń sheberi, tanymal sýretshi bir shákirtine batasyn berip, eline jibererde oǵan sońǵy tapsyrmasyn beredi. «Salǵan sýretińdi qalanyń adam eń kóp shoǵyrlanǵan bólinige ornalastyr, qasyna qyzyl qalam qoıyp, halyqtan qate bolǵan, durys shyqpaǵan jerlerine "h" belgisin qoıýyn ótingen jazý il», — deıdi.

Shákirt ustazynyń aıtqanyn buljytpaı oryndap, bir kúnnen keıin qaıtyp kelgende, sýretiniń barlyq jeri qyp-qyzyl "h" belgisine toly ekendigin kóredi. Kóńil-kúıi túsip, ustazyna keledi. Ustazy: «Eńseńdi túsirme balam, taǵy bir sýret sal, ony da taǵy sol baıaǵy jerge aparyp ornalastyr. Biraq, bul joly qasyna túrli-tústi boıaý men qylqalam qoıyp, adamdardan qate bolǵan, durys shyqpaǵan jerlerin túzetýin ótingen jazý il», — deıdi. Shákirt qaıtadan aıtylǵandardy tolyqtaı oryndaıdy. Bir kúnnen keıin kelgende, sýretke eshkim tımegenin kóredi. Sýret baz-baıaǵy qalpynda edi. Qýanyshy ishine syımaı, tezdetip ustazyna keledi. Ustazy: «Alǵashqyda adamdarǵa min izdeýge múmkindik bergenińde, aıaýsyz synǵa ushyraǵan ediń. Ómirinde sýret salyp kórmegen adamdar da qate taýyp, sýretińdi qaralap ketti. Kelesi joly, olardan jasampaz bolýdy suradyń. Al jasampaz bolý — shyǵarmashylyqty, tálim alýdy, úırenýdi qajet etedi. Eshkim bilmeıtin nársesin jasaýǵa bata almady. Saǵan aıtarym, eńbegińniń nátıjesin (ádil baǵasyn), ne istegenińdi bilmeıtinderden ala almaısyń. Jumysyńdy qadirin bilmeıtinderge usynba jáne bilmeıtindermen eshqashan sóz talastyrma!» — degen eken.   

---