Bir úıde jıýly eken qazyna mal,
Kórsetti bárin bizge aqsaqal shal:
«Burynǵy atamyzǵa syıǵa bergen,
Bizderde mynadaı bar, mynadaı bar!..»
Ol ras, atalaryń shenge alypty,
Arzan ǵyp, qymbat emes, kemge alypty.
Apyr - aı qalaı buldaǵan satqandaryn,
Oqa, túıme, syldyrlaq, teńge alypty!
Sýretter jáne kórdim júzi jarqyn,
Oıladym: «Ońdyrǵan - aý, baqqan halqyn».
Sonshama quny tolyq buldy túıme,
Artynda qaldyrmas pa jaqsy dańqyn.
Dedim men: «Qutty bolsyn shekpenińiz,
Artqyǵa qandaı egin ekkenińiz?
Jýsaq ta denemizden keter emes,
Sondaǵy tuqym shashyp sepkenińiz».
Kórgende kúmis kese, altyn aıaq,
Bir sózdi tamaǵyma qoıdym taıap.
«Qaı momynnyń maly bar bul aıaqta?»
Demeıinshe bolmady, qarap jaı - aq.
Otyrdym kórsem jekip tastar ma dep,
Shal aıtty: «Kórińizder jasqanba!» dep.
Keseni qolyma alyp qaraı berdim,
İshinde nahaq kózden jas bar ma dep.

---