InfoHub Logo

Erkin elde ósken urpaqtyń rýhy árdaıym bıik bolýy tıis. Jastary jalyn júrekti, órshil namysty, bıik rýhty bolsa – ol eldiń eńsesi de bıik bolady.

N.Á.Nazarbaev

Nursultan Ábishuly Nazarbaev- Qazaqstan eliniń damyp, jetilýine úlken úles qosqan dara tulǵa. Nursultan Nazarbaev óte kóregen, aqyldy, ádil, ár qadamyn ańdyp basatyn aıbarly adam. Ol 1940 jylǵy 6 shildede Almaty oblysy Qaskeleń aýdany Shamalǵan aýylynda dúnıe esigin ashqan. Al 1991 jyldyń 1 jeltoqsanynda tuńǵysh ret Qazaqstan Respýblıkasynyń Prezıdenti bolyp saılandy.

Nursultan Ábishuly Nazarbaev- elbasy bolyp saılanǵan soń, qazaq halqy táýelsizdik aldy. Elbasy egemendigimizdiń alǵashqy kúninen bastap, jatsa- tursa oılaıtyny da, aıtatyny da elimizdiń tynyshtyǵy men birligin saqtap qalý boldy. Bar ýaıymy, halyqty ashtyqqa, jalańashtyqqa uryndyrmaý boldy. Qazaqstannyń táýelsiz memleketke aınalar jolynda, ne qıly qıyndyqtar kezinde halqyn qoldap, rýh-jigerin kóterdi. Qazaq halqynyń qulaǵan irgesin qaıtadan kóterý ońaı bolǵan joq. Alaıda, elbasymyz bar kúsh-jigerin eliniń aıaǵyna nyq turýyna baǵyttady. Elbasymyzdyń arqasynda biz kóp jetistikterge qol jetkizdik. Mysal keltirer bolsaq, baıtaq elimiz, tuńǵysh Prezıdentimizdiń basshylyǵymen álem moıyndaǵan, jahanǵa aty jetken memleketke aınaldy. Sonymen qatar, elimizdiń ekonomıkasyn jaqsartyp, halqymyzdyń ál aýqatyn kóterdi.

2012 jyldyń 14 jeltoqsanynda Qazaqstan Respýblıkasynyń Prezıdenti – Elbasy N.Á. Nazarbaev «Qazaqstan-2050» Strategıasy qalyptasqan memlekettiń jańa saıası baǵyty» atty Joldaýyn Qazaqstan halqyna arnady. Óziniń Joldaýynda Elbasy ótken 15 jyl boıynsha respýblıka damýynyń negizgi nátıjelerin taldady, qazirgi zamannyń basty úrdisteri men túıinderin belgilep, «Qazaqstan – 2030» Strategıasyndaǵy kóptegen tapsyrmalar sátti oryndaldy, endi eldiń aldynda jańa tapsyrma oryn alyp tur – ol «Qazaqstan – 2050» Strategıasynyń iske asý negizindegi dúnıejúziniń damyǵan 30 memleket qataryna kirý».

Ál-Farabı atyndaǵy Qazaq ulttyq ýnıversıtetinde oqytýshylar jetekshiligimen ótetin kóptegen ǵylymı sharalar men konferensıalar ótedi. Atap aıtar bolsam, t.ǵ.d, profesor Qozybaqova Fatıma apaıdyń  ǵylymı jetekshiligimen «Rýhanı jańǵyrý» jáne «Uly dalanyń jeti qyry» baǵdarlamalarynyń aıasynda fılologıa jáne álem tilderi fakúltetinde «Qazaqstan – 2050» strategıasy: Qalyptasqan memlekettiń jańa saıası baǵyty: Bolashaqqa baǵdarlanǵan damý baǵyttary» atty konferensıasy bolyp ótti. Atalmysh konferensıada «Qazaqstan-2050» strategıasynyń negizgi baǵyttary, onyń máni men mańyzdylyǵy, elimizdiń bolashaǵynyń damýyna ákeler paıdasy týraly talqylaǵan bolatynbyz. Bul shara óz kezeginde jas stýdentterdiń sana-sezimin oıatyp, mádenı ári rýhanı baǵytta damýyna zor yqpalyn tıgizdi.

Tarıhty biregeıler jasaıdy. Olar ýaqyttyń tezinen de oza shaýyp, tipti bolashaqtyń sara jolyn salyp ketedi. Jer ǵalam­sharynyń túkpirinde esimderi máńgi jańǵyrady. Al máńgiliktiń shegi joq. Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaev sol biregeı taǵdyrdy enshilegen tulǵa. Nursultan Ábishuly otyz jyldaı Memleket basshysy bolǵan tusta Qazaqstannyń jahandyq arenadaǵy mártebesiniń bekýine orasan zor eńbek sińirdi.  

2019 jyldyń 19 naýryzynda keshki saǵat 19:00-de Nursultan Nazarbaev Qazaqstan halqyna sońǵy ret málimdeme jasap, óziniń prezıdent ókilettigin toqtatatynyn málimdedi. Osylaısha, Nazarbaev QR prezıdenti retindegi ókilettiligin toqtatyp, otstavkaǵa ketti. Táýelsiz Qazaqstannyń Tuńǵysh prezıdenti Qazaqstan halqynyń júreginde uly adam, dana kóshbasshy, kemeńger dara tulǵa retinde ǵana emes, sondaı-aq 30 jyl boıy óz halqyna tynyshtyq pen beıbitshilik syılaǵan Ult kóshbasshysy retinde tarıhta aty qaldy.

F.A Qozybaqova,
ál-Farabı atyndaǵy QazUÝ Tarıh, arheologıa, etnologıa fakúlteti, tarıh ǵylymdarynyń kandıdaty, profesor;
Dosanova Zarına,
Fılologıa jáne álem tilderi fakúltetiniń 1-kýrs stýdenti

---