InfoHub Logo

- Ýaqyt bolsa jedel ózgerip bara jatyr, - dedi ata-ana. Ol kishkentaı qyzdyń ákesi eken.

- Al biz bolsaq, keńestik mektepte bilim alǵanbyz. Keıde joldastar degen sózdi tilimde kóp qoldanatynym bar. Múmkin osynyń áseri shyǵar. Osy jıynda otyrǵan bárińiz de ata-anasyzdar ǵoı. Ul-qyz ósirip otyrsyzdar. Sondyqtan meni durys túsinedi dep oılaımyn. Meniń de kishkentaı qyzym bar. Ózi qurtaqandaı ǵana. Sizder ony tipti kóz aldaryńyzǵa elestete de alasyzdar. Mundaıda qýyrshaqtaı ǵana deýshi me edi. Qyzym mektep tabaldyryǵyn attady. Munyń ne ekenin túsinesizder ǵoı, árıne. Bárińiz de ata-ata bolǵannan keıin túsinesizder. Qýanasyń, taǵy sol sıaqty degendeı ǵoı. Balamen araqatynasta qıyndyqtyqtar bolmaı turmaıdy. Al qıyndyqty eńsere bilý kerek. Bul - árbir ata-atanyń mindeti. Minekı, sizder meni qýattap otyrsyzdar. Óıtkeni ata-ananyń janyn ata-ana ǵana túsinedi nemese muǵalim degendeı. Sizder de balamen araqatynasta qıyndyqqa dýshar boldyńyzdar ǵoı. Sózderińizge senemin. Dálelderińiz ılanarlyq. Al biz bolsaq, qıyndyqqa salǵan jerden kezdestik. Aıtýǵa yńǵaısyz endi. Degenmen sizderge bastaǵan ekenmin, aıaǵyna deıin aıtyp bereıin.

Sonymen qyzymyz mektepten oraldy. Onyń bizge ne degenin bilesizder me? Jo-joq, sizder oılaǵandaı jaǵymsyz sóz emes. Nemese ata-anaǵa qurmet kórsetpeý degen uǵymdy bul jerde oılaryńyzǵa da almaı-aq qoıyńyzdar. Sózimniń basynda aıttym ǵoı, zaman ilgeri ketip bara jatyr dep. Ol bizge aǵylshyn tilinde áldene dedi. Ózi qurtaqandaı ǵana jáne súp-súıkimdi. Biz, jubaıymyz ekeýmiz, bir-birimizge qaradyq. Onyń ne aıtyp turǵanyn túsinsek buıyrmasyn. Tek onyń anasy ekeýmiz bir-birimizge qarap kúlimsireı bergenimizdi ishterińiz sezip otyrǵan shyǵar. Jymıǵandaryńyzdan sony baıqap otyrmyn. Sonymen qyzymyz bizge aǵylshynsha áldene deıdi. Al jubaıymyz ekeýmizde yńǵaısyzdaný jáne kúlimsireý. Mundaıda meniń Ermekbaı dosymnyń "onyń ne aıtyp turǵanyn saıtan bilsin be?" deıtini bar edi. Bul ózi keńestik kezeńde bolǵan oqıǵa. Onda biz, Ermekbaı ekeýmiz, aýyldan qalaǵa kelgen bala edik. Bizge kóshede áldeqandaı eńgezerdeı orys áldene dedi. Al biz bolsaq, bir-birimizge qaraımyz. Bul - Ermekbaıdyń sonda aıtyp júrgen sózi. Sóıtsek, orys bizden saǵattyń neshe bolǵandyǵyn surap tur eken. Minekı, ómirde osyndaı da bolady, joldastar. Keıin biz mundaı suraqtarǵa ýaqyttyń qansha bolǵandyǵyn orys tilinde aıtyp jaýap berýdi úırendik. Qaıtse de ýaqyt aǵymyna ilesýge týra keledi ǵoı. Al myna jaǵdaı múlde basqasha edi. Aldyńyzda ózińizdiń qurtaqandaı ǵana qyzyńyz tur. Ózi jáne súp-súıkimdi-aq. Mundaıda tek abyrjý men kúlimsireı berý ǵana qalǵandyǵyn túsinip otyrǵan shyǵarsyzdar. Uıat ta bolsa aıtaıyn, joldastar, bizge onyń aǵylshyn tili páni muǵalimine qońyraý shalýǵa týra keldi. Sóıtsek, qyzymyz bizden "tamaq daıyn ba?" dep surap tur eken. Al kerek bolsa. Daıyn bolmaǵanda she. Biz anasy ekeýmiz onyń tamaǵyn daıyndap qoımaýshy ma edik. Biz, ekeýmiz, eki jaqtan júgirdik. Al qyzymyz asqa otyra berip, bizge aǵylshyn tilinde taǵy da áldene dedi. Aǵylshyn tiliniń muǵalimine de qaıta-qaıta qońyraý shala berý uıat, árıne. Biraq bizge basqa amal joq edi. Sóıtsek, qyzymyz bizge "tamaq ishýge qasyq bermeısińder me?" dep otyr eken. Biz asyp-sasyp júrip oǵan qasyq ta bermeppiz. Mine, balamen osyndaı araqatynasta yńǵaısyz jaǵdaılar da bolyp qalyp jatady. Ózińniń urpaǵyńmen túsinispeýshilik degendeı ǵoı. Zaman bolsa, ilgeri ketip bara jatyr. Múmkin bizge, ata-analarǵa, ýaqyttyń aǵymyna jedel ilese alý qajettiligi týyp otyrǵan shyǵar. Bizge qaıtkende de qasyq nemese tamaq degen sózderdiń aǵylshyn tilinde qalaı aıtylatyndyǵyn meńgerip alý qajettigi týyp otyrǵandyǵyn sizder túsinip otyrsyzdar dep oılaımyn. Sizderge aǵymnan jarylyp aıtaıyn, joldastar, bizge bir orynda toqyrap qalýǵa bolmaıdy. Sizder meni durys túsinińizder, bizge bolashaqta bári de kerek.

---