InfoHub Logo

«Bolashaq» qaýymdastyǵynyń qurylǵanyna 20 jyl toldy.

Qazaqstan táýelsizdik alǵan sátten bastap, el damýyna baǵyttalǵan jańa reformalardy iske asyrý jáne halyqaralyq sahnada memleketimizdi laıyqty deńgeıde tanytý úshin joǵary bilikti kadrlar qajet boldy. Osy maqsatta 1993 jyly Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń bastamasymen «Bolashaq» halyqaralyq stıpendıasy qurylyp, básekege qabiletti ult qalyptastyrýdy kózdegen eń mańyzdy jobalardyń birine aınaldy.

«Táýelsizdiktiń bastapqy aýyr jyldarynda bizdiń kemel keleshegimizdi kóre bilý árkimge buıyra qoıǵan joq. Men jańa bilim alyp, elimizdi alǵa súıresin dep alǵashqy stıpendıattardy attandyrdym. Bul bizdiń senimdi strategıalyq tańdaýymyz edi», – dep Halyqaralyq «Bolashaq» stıpendıasynyń mereıtoılyq forýmynda Elbasy baǵdarlamanyń zor mánin erekshe atap ótken bolatyn.

Ýaqyt óte kele barlyq túlektiń basyn qosyp, olardyń problemasyn sheshýdi qolǵa alatyn, qoǵamdyq ınstıtýttardyń ártúrli deńgeıinde olardyń múddesin bildiretin, sondaı-aq «bolashaqtyqtardyń» áleýetin san alýan qoǵamdyq mindetti talqylaýǵa jáne sheshýge baǵyttaıtyn uıym qurý qajettiligi týdy.

Osylaısha 2001 jyldyń 30 naýryzynda «Qazaqstan Respýblıkasy Prezıdentiniń Halyqaralyq «Bolashaq» stıpendıasy túlekteriniń qaýymdastyǵy» quryldy. Uıymnyń negizgi qozǵaýshy kúshi elimizdegi progresıvti jáne keleshegi zor jas mamandardyń qoǵamdastyǵy bolyp sanalatyn baǵdarlama túlekteri boldy. Memlekettik strategıalardy iske asyrýǵa járdemdesý, kadrlar sabaqtastyǵyn qamtamasyz etý, jasampazdyq jáne ınovasıa arqyly baıyrǵy dástúrlerdi saqtaý Qaýymdastyq jumysynyń basty qaǵıdattaryna aınaldy.

Búginde 13 myńnan astam qazaqstandyq jas baǵdarlama stıpendıaty atansa, 2000-ǵa jýyq shetelde bilimin jetildirýde. Baǵdarlama túlegi jáne Qaýymdastyq keńesiniń tóraǵasy Baqtıar Máken atalmysh uıym jaıynda bylaı deıdi:

«Qaýymdastyqtyń negizgi maqsaty – respýblıkanyń túkpir-túkpirindegi «Bolashaq» stıpendıasynyń túlekteri men olardyń áleýetin biriktirý, sondaı-aq elimizdiń áleýmettik damýyna úles qosý.

20 jyl ishinde «Bolashaq» qaýymdastyǵy 100 myńnan astam adamdy tarta otyryp, 500-den asa joba men is-sharany elimizdiń barlyq óńirinde iske asyrdy. Qaýymdastyqtyń korporatıvtik qorlary Qazaqstannyń 8 óńirinde jumys isteýde.

Qaýymdastyq elimizdiń joǵary bilimdi patrıot jastaryn kóbeıtýge yqpal etý maqsatynda jastardyń áleýetin ashatyn jáne damytatyn túrli jobany iske asyrýda. Máselen, «Jastar uıymdarynyń netvorkıngi jáne tájirıbe almasý» jobasy – Jastar jyly aıasynda júzege asyrylǵan iri jobalardyń biri. Jobaǵa 1100-den asa jas býyn ókili atsalysyp, yntymaqtastyq baılanys ornatyp, jastar uıymdaryn qoldaý men damytýǵa arnalǵan sheberlik synyptar men konferensıalarǵa qatysty.

Qaýymdastyq jastar arasynda kásipkerlik pen bıznesti damytýǵa, ınovasıalyq tyń jobalardy qoldaýǵa úlken kóńil bóledi. «Bolashaq Business Competition» zıatkerlik oıynynyń uıymdastyrylýy, «Bolashaq business cases» bıznes-keıster jınaǵynyń jaryqqa shyǵýy, «Startup «Bolashaq» realıtı-shoý formatyndaǵy bıznes-ıdeıalar baıqaýynyń sátti ótkizilýi – sonyń dáleli. 2020 jyly «Bolashaq» qaýymdastyǵy ınovasıalyq sheshimder men usynystardy, bıznes júrgizýdiń úzdik strategıalary men praktıkýmdaryn jınaqtaǵan «Jastar jáne ınovasıalar» onlaın-forýmyn ótkizdi. Forým Zoom, Facebook jáne YouTube platformalarynda 25 spıker men 500-ge jýyq qatysýshyny, al Facebook jelisinde 3000-nan asa kórermendi jınady. Spıkerler jańa tehnologıa, saıasat, bıznes jáne áleýmettik medıa salalaryndaǵy bilimimen bólisti.

Qaýymdastyq júzege asyrǵan, tildik kedergilerdi eńserýge jáne shet tildi úırenýge yntalandyrýǵa baǵyttalǵan «English for Jastar» áleýmettik-volonterlik jobasy elimizdegi adamı kapıtaldyń sapasyn jaqsartýǵa múmkindik berdi. Bul jobany «Nur Otan» partıasynyń «Jas Otan» jastar qanaty Qaýymdastyqpen birlesip 2018 jyldan bastap iske asyrdy. Oǵan aǵylshyn tilin jetik meńgergen otandyq jáne sheteldik jastar tartyldy. Osy jobanyń arqasynda aýyl mektepterindegi 5500-den astam bala shet tilin meńgerip shyqty.

«Bolashaq» qaýymdastyǵy Nur-Cultan qalasy ákimdigimen birlese otyryp, jastar men qala turǵyndarynyń kitap oqýǵa degen qyzyǵýshylyǵyn arttyrý úshin «Bolashaq Books» jobasy sheńberinde turaqty túrde býkkrossıng ótkizip turady. 2017 jyldan beri «Bolashaq Books» jobasy aıasynda Qazaqstannyń 20 qalasynda 28 kitap sóresi ornatyldy. 2018 jyly Qaýymdastyq Nur-Cultan qalasy ákimdiginiń jáne «Atameken» QR Ulttyq kásipkerler palatasynyń qoldaýymen «Job Fair 2018» kórmesin ótkizip, alǵash ret elordalyq joǵary oqý oryndarynyń 600-den astam túlegi men magıstrantyn, 100-den astam ozyq ulttyq jáne sheteldik jumys berýshi kompanıany, ekonomıkanyń túrli sektory ókilderin bir alańda biriktirdi.

2021 jyly «Bolashaq Women» klýbynyń aıasynda óskeleń urpaqtyń qundylyqtary, zamanaýı qazaqstandyq qyzdyń beınesin qalyptastyrý, qyz balalarǵa óz jolyn tabýǵa, kásibılikke, tulǵalyq damýǵa kómek kórsetý maqsatynda «Tabysty jáne baqytty qyzdyń zamanaýı beınesi» atty onlaın-forým ótkizildi. Forýmǵa túrli salanyń 250-den astam ókili men 7 spıker qatysyp, qazirgi qoǵamnyń qundylyqtary men áıel ómirindegi ekonomıkalyq, áleýmettik jáne basqa da salalardyń ózekti máselelerin talqylady.

2011 jyly «Bolashaq» baǵdarlamasynyń túlekteri balalar men jastar arasynda memlekettik tildi nasıhattaý jáne qazaq tilinde sapaly ári básekege qabiletti kontent qurý boıynsha qomaqty jumysqa kiristi. Qazaqstannyń memlekettik tilin biletin, jaqsy kóretin jáne qurmetteıtin urpaqty tárbıeleýge kómektesý maqsaty qoıyldy. Bul bastamany elimizdiń Tuńǵysh Prezıdenti – Elbasy Nursultan Ábishuly Nazarbaev qoldady. «Bolashaq» korporatıvtik qory júzege asyrǵan «Ózińnen basta» áleýmettik jobasy otbasylyq jáne balalarǵa arnalǵan kontentti jasaı otyryp, memlekettik tildiń damýyna úlken yqpal etti. Osy joba aıasynda Disney, Sony Pictures, Marvel, Lucasfilms, BAZELEVS jáne Europa Corp stýdıalarynyń 36 fılmi qazaq tiline aýdarylyp, ulttyq ónimniń qataryn kóbeıtti. Qazaq tili Sony Pictures-tiń 7-tiline, al Walt Disney-diń 39-tiline aınaldy jáne búkil álem boıynsha DVD, Blu-ray-da kórýge bolatyn gollıvýdtyq fılmderdiń negizgi jeti tiline endi.

Qaýymdastyq salaýatty ómir saltyn belsendi nasıhattaýda 6 sport túrinen 2 spartakıada men 2 CrossFit saıysyn uıymdastyrdy. Sonymen qatar Qaýymdastyq músheleri «Seniń jańa qyryń» atty respýblıkalyq sport aksıasy men Bi-marathon qaıyrymdylyq marafonyna turaqty qatysyp keledi. 2019 jyly uıymdastyrylǵan «Bolashaq» Qaýymdastyǵynyń II spartakıadasynda shaǵyn fýtbol, voleıbol, ústel tenısi, armrestlıng, shahmat jáne asyq atýdan saıystar uıymdastyrylyp, jarysta 175 adam synǵa tústi.

«Bolashaq» stıpendıasy memleket usynatyn áleýmettik lıftilerdiń eń jarqyn úlgileriniń biri ekeni anyq. Qaýymdastyq músheleri, bolashaqtyqtar el basshylyǵynyń bastamalary men saıasatyn árdaıym qoldaıdy.

Egemen Qazaqstannyń turaqty damýynyń kepili – bilimdi jáne progresıvti jastar. Elbasy Nursultan Nazarbaev pen Memleket Basshysy Qasym-Jomart Toqaev jastarǵa árqashan el bolashaǵynyń kepili retinde qaraıdy. Óziniń 20 jyldyq mereıtoıyn atap ótip jatqan «Bolashaq» qaýymdastyǵy elimiz táýelsizdik alǵan sátten bastap barlyq tarıhı ózgeris pen jańalyqtyń tetigi retinde damyp keledi. Aldaǵy ýaqytta da memleketimizdiń órken jaıýy jolynda aýqymdy isterdi atqara beredi.

---