InfoHub Logo

Ǵylymı jumysty qorǵaý prosedýrasy ınternet jelisi arqyly tikeleı efırde júrgiziledi. Bul jaıynda QR Bilim jáne ǵylym mınıstri Ashat Aımaǵambetov Facebook paraqshasynda jazdy.

«Ǵylymı jumysty qorǵaý prosedýrasy ınternet jelisi arqyly tikeleı efırde júrgiziledi. Iaǵnı dısertasıany qorǵaý rásimi tolyǵymen ashyq formatta ótedi. Endigi kezekte ǵylymı jáne akademıalyq qaýymdastyqty belsendi bolýǵa shaqyramyn. Endi kez kelgen ǵylymı zertteýlermen tanysyp, doktoranttardyń jumysyna ashyq pikir qaldyra alasyzdar», - dedi ol.

Mınıstrdiń atap ótýinshe, doktoranttyń dısertasıasy tolyq daıyn bolǵan kezde kafedranyń keńeıtilgen otyrysynda ǵylymı jumys bir ret talqylaýdan ótedi. Negizgi talqylaý jumystary dısertasıany qorǵaý kezinde júrgiziledi. Osylaısha qorǵaý sapasy jaqsaryp, dısertasıalyq keńesterdiń jaýapkershiligi artady.

«Erekshe mártebesi bar joǵary oqý oryndary úshinshi jyl qatarynan PhD dárejesin ózderi taǵaıyndap, jeke úlgidegi dıplomdar berip jatyr. Endi ulttyq joǵary oqý oryndary doktoranttardyń jarıalanymdaryna óz sheshimderi boıynsha qosymsha, joǵary talaptar qoıa alady», - dedi Ashat Aımaǵambetov.

Onyń aıtýynsha, el azamattary dısertasıany onlaın formatta qorǵaı alady.

«Bul – álem boıynsha keńinen paıdalanylyp jatqan tájirıbe. Pandemıa kezinde Kalıfornıadaǵy Berklı ýnıversıteti, Oksford, Kembrıdj, Garvard, Sıngapýr Ulttyq ýnıversıteti jáne basqa da oqý oryndary alǵashqylardyń biri bolyp dısertasıany qorǵaýdy onlaın formatta ótkizgen edi», - dedi mınıstr.

---