InfoHub Logo

Áıgili kúıshi Saǵyrbaıuly Qurmanǵazy bir daýdyń saldarynan isti bolyp, sol kezdegi Bókeı ordasynyń ákim sultany Shyǵaıuly Dáýletkereıdiń aldyna kelipti deıdi. Qurmanǵazynyń kúıshilik dańqyna Dáýletkereı syrtynan qanyq eken, yqylaspen qarsy alady. Aýyl-eldiń amandyǵy suralyp, syı-qurmet kórsetilgen soń, Qurmanǵazy kelgen sharýasyn aıtady. Sonda Dáýletkereı: «Qurman aǵa, bir ǵana bazyna shartym bar. Teris daý bolsa da paıdasyn sizge shesheıin, tek bir-birimizge aıtar sózimizdi kúımen jetkizip kórsek qaıtedi», — dep, ashyq shyraımen kútpegen qolqa salady.

Qurmanǵazy úshin kókiregin kernep kelgen muń-syryn kúımen jetkizý jeńil. Sondyqtan da, irkilmesten kelisim beredi.

Dáýletkereı: «olaı bolsa, siz qonaqsyz ǵoı, kúıdi men bastaıyn», — dep, bir kúı tartady. Birden sergek bastalǵan kúı Qurmanǵazynyń júregin baýrap, ish-baýyryna enip, býyn-býynyna túskendeı janyna jaǵady. Kúı bitkende Qurmanǵazy: «Apyraı, mynaýyń buryn estimegen tamasha kúı eken, bul ne kúı?» — dep suraıdy. Dáýletkereı bolsa sál jymıyp alyp, «Biz kúı tilimen sóılesýge toqtadyq emes pe, eger kúıim shynymen- aq sizge unasa, onda munyń aty «Bulbul» bolsyn», — deıdi.

Sonda Qurmanǵazy da dombyraǵa qol sozyp, az-kem tolǵanystan keıin bir kúıdi bastaı jóneledi. Álginde ǵana júregin sharpyǵan ystyq sezimdi óksheleı qýyp, izin sýytqysy kelmegendeı dombyrany lekite qaǵady. Tyń saryn qat-qatymen túsip, qyrannyń qaýyrsynyndaı jymdasyp, múdirmeı tógiledi. Bir mezgilde dombyra saǵaǵyn qaqtaı saýyp, tańdaıy taqyldap, ólip-óship, áldeneni qadalyp aıtqandaı bolady da, ile keri serpilip, sabasyna túskendeı, sybyrlap-syńqyldap baryp tynady.

Dáýletkereı de áserin jasyra almaıdy: «Tamasha eken, bul ne kúı?!» — dep suraıdy. Endi Qurmanǵazy jymıa kúlip til qatady: «Tildiń emes, kúıdiń aıtqyshyn bulbulǵa teńegen óziń emes pe, meniń kúıimniń de aty «Bulbul», — deıdi.

---