InfoHub Logo

Syrym batyr bala kúninde on tórt jasynda-aq joryqqa attanatyn bolypty. Sonan on segiz jasqa keledi. On segiz jasynda joldasty kóbeıtip, manǵuldan tańdap-tańdap alpys segiz atty aıdap qaıtady. Astynda tulpardan týǵan tory tóbel aty bar. Joldastarynyń sońynan ózi jalǵyz keledi. Jylqynyń tústenip ketken jerine ózi keshke qonýǵa keledi. Bir kúni jylqynyń tústenip ketken jerine qonyp shyǵyp, jalǵyz ózi júrip kele jatsa, sáske túste Jaıyqtyń arǵy tusynda Taısoıǵan búırektiginde ań aýlaıtyn sala bar eken. Sol salanyń barlyǵynda, arǵy betinde Nuraly han qusbegileri, bıleri, ańshylarymen seıildikte ań aýlap júr eken. Belgili ǵoı ań aýlap júrgen adamdardyń árbir jerlerde bytyrap, jaıylyp júretindigi. Syrym osylardy kórgen soń óziniń aqylymen oılap: «Dáýde bolsa, bul júrgender Nuraly hannyń ańshylary bolar», — dep shamalap, «Nuralyny kóreıinshi, reti kelse tildeseıinshi dep (buryn tanymaıdy eken) joldan burylyńqyrap kelip, Nuralyny osy bolar-aý dep kelse, durysynda sol shamalap kelgen adamy Nuraly bolyp shyǵady. Nuralyny oıymen tanyp, sálem beredi. Sol kúnde Syrym batyr on segiz jasynda eken. Tákappar han qazaqtyń bir bozbalasynyń sálemin ońdylyqpen ala qoısyn ba?

— Sen qaı tuqymsyń? — depti Nuraly Syrymǵa. Sonda Syrym:

— Qydyrqojanyń balasy — Sultansıyq, onan týǵan — Baıbaqty, Baıbaqtydan týǵan — Sholym, Sholymnyń balasy — Dat, Dattyń balasymyn, atym — Syrym, — depti. Sonda Nuraly turyp:

— E, Qydyrdyń kóp tenteginiń biri ekensiń ǵoı, — depti. Sonda Syrym:

— Saqbardyń sýynyń boıynda oǵym ozar ma eken, boǵym ozar ma eken dep, oǵy men boǵyn jarystyrǵan Toǵym tóreniń tuqymy ediń, — depti.

---