InfoHub Logo

Berishtiń urany — «Aǵataı!». Aǵataı atamyz jasynda Qaıdaýyl degen batyrynyń qyzyna úılenedi. Onan Buqaı degen bir bala týady. Buqaı jıyrmaǵa jetkesin-aq Aǵataıǵa ilesip joryqqa júredi. Aǵataı da Buqaıym ózimniń týymdy ustar-aý dep oılap júredi.

Qaıdaýyl jasy jetip qartaıyp, ólim tóseginde otyryp artyna ósıet aıtady. «Meniń saýyt-saımanymdy, qarý-jaraǵymdy óz balalarymnan ıe bolatyn balam joq. Meniń saýyt-jaraǵyma jıenim Buqaıjan ıe bola alady. Meniń kózim jumylǵasyn Buqaıjanǵa berińder», — dep aıtyp dúnıeden ótedi.

Buqaıǵa habar jiberiledi. Kelip naǵashysynyń saýytyn alyp ketsin deıdi. Buqaı kádesin berip, qalyńdyq oınap júrgen kez eken, barýǵa jınalady.

Aǵataı: «Shyraǵym, Buqaıjan, tilimdi alsań, barǵan joly qashyq, túrikpende Qaıdaýyldyń saımanyna kóz alartyp júrgen ór qaraqshy kóp bolar, bir belgisiz adamynan kerýenshilerge qosyp berip jiberip aldyrtalyq», — deıdi. Buqaı turyp qalady, barmaıtyn bolady.

Aǵataı bir zaman ózi sapar shyǵyp ketedi, sol mezgilde Buqaı atam kelgenshe baryp qaıtaıyn dep ketip qalady. Baryp biraz jatyp saýyt-saımandy alyp qaıtady. Jol boıy bir jaıly jerge túsip qalady, atyn uzyn shylbyrmenen aıaǵyna baılap, qorjyndy basynyń astyna salyp uıyqtap qalady. Túnde uryqaraqshy basyn shaýyp óltirip ketedi. Dúnıesin oljalap, ózin jalańash tastap ketedi. Artynan kerýenshiler kelip, Buqaıdyń júzin jasyryp «qarǵa-quzǵyn jemesin» dep ýaqytsha amanat esebinde kómip ketedi. Sóıtip, Aǵataı batyrǵa habar etedi. Aǵataı baryp Buqaıdyń súıegin alyp kelip, jýyp arýlap kómedi de, sóıtip baıaǵy aı kúninde muń bolyp otyrǵan kelinge ruqsat berip, malyn qaıyryp alady. Kelin uzatylyp, barǵan jerinde úsh-tórt aıdan soń bir ul bala týady. Aǵataıdyń báıbishesi: «Bala bizdiń Buqaıjannyń balasy, balany alyp kel, ózimiz asyraımyz», — deıdi. Aǵataı baryp balany quttyqtap, alyp kelip asyraıdy. Atyn Begaly qoıady, Begalydan Taıman týady, Taımannan Isataı týady.

Isataı ósip ár jerde joldyqqa talasyp, jol bermeı júrgende, Isataıǵa qazaqtyń aqsaqal bıleri joldyqqa talasqanda: «Isataı-aı, saǵan joldyq tımeıdi, sen nekesiz týǵansyń, Buqaı ólip, shesheń basqa kisige nekelengesin, atańa belgili basqa kisiniń nekesinde týdy», — dep betine basady. Shora kep:

— E, Ǵylman aqyn Isataı, Mahambettiń tarıhyn bastaǵanda bas jaǵynda myndaı kúmiljigen sózdi estirtip ketedi.

Aǵataıdyń Buqaıyn túrikpennen bu da ólgenge deıin qalyńdyq oınap júrgende, Begalydaı batyrdyń nekeden buryn boldy dep jabylǵan jurttyń jalasy, — deıdi.

---