InfoHub Logo

Konsertke bılet taba almaǵandyǵy úshin, súıiktisiniń sonshama renjigeni jigittiń janyna batty. "Osy konsertke baramyn dep, neshe kúnnen beri úmit etip edim... Saǵan sengendigim osy ma?.." - dep, qyzynyń ashý shaqyrǵandyǵyna da, ózine renjip urysqandyǵyna da jigit lám-mım deı almady. Ras, kináli edi. Úsh kúndik konserttiń birde-birine de bılet taba alǵan joq. Bılet joq edi. Kúniburyn satylyp ketken. Qoldan-qolǵa tıgizbegen.

Bárinen de buryn jigitke súıiktisiniń dál qazir osyǵan bola jylaǵandyǵy qıyn tıdi. Ne dep jubataryn bilmedi. Sóıtse de, ózin birjaǵynan jábirlengen jandaı sezinip otyr. Qolynan kelgenniń bárin jasady ǵoı. Konserttiń bıleti onsyz da qymbat edi. Sonyń ózinde de, eger bılet qolda satylyp jatsa, birneshe ese baǵasyna da satyp alýǵa keliser edi. Baǵana ǵana sondaı baǵaǵa satyp jatyr eken dep júgirgen qalyń dúrmektiń arasynda ózi de bolmap pa edi. Biraq jym-jylas. Bılet joq.

Endi mine osy úshin súıiktisi jylap otyr. Jigittiń janyna batyp otyrǵany da osynysy boldy. Eshýaqytta mundaı minez kórsetpegen edi. "Erke ǵoı, - dep jymıdy jigit. - Bireýdiń erke-totaıy. Tym qymbat kıinedi. Qymbat mektepten ótken. Birneshe shet tilin meńgergen. Sonysyna qarap básin arttyrady-daǵy". Baǵana ǵana ózi satyp ápergen baǵaly zattaryn ózine qaraı laqtyryp: "Osynyń barlyǵynyń maǵan keregi ne?! Osylar osy konserttiń bir bıletine de tatıdy ma?!" degeni qıyn boldy. Ony ózi de biledi.

"Osy konserti bolǵaly jatqan ánshilerdiń bási nege tym joǵary?" dep oılady jigit.

Keshki qarańǵylyq túsip, kóz baılana bastady. Eki ǵashyq bir-birine toń-teris qalypta otyr. Qyz manaǵydaı emes, jylaýyn qoıypty. Biraq jigitine arqasyn bergen kúıi únsiz otyr. Maǵan áli de ókpeli dep oılady jigit. Qyzyna birdeńe dep sóıleýden jasqandy. Óziniń ashýy basylar sátin kútti.

Bul kezde konsert bastalyp jatyr edi. Konsert ótip jatqan saraı jaqtan shuǵyla sáýle tógiledi. "Osy saraıdy nege osyndaı qylyp saldy eken? - dep oılady jigit. - Qalanyń qaı buryshynan kóz salsań da, osy saraıdan shuǵyla sáýle tógilip turady. Ózin osy ánshiler úshin ǵana arnaıy salypty deıdi".

Arada tym-tyrys tynyshtyq ornap tur edi. Jigit kenet qalǵyp ketip bara jatqandaı bolyp, selk ete túsip, kózin ashyp aldy... Osy sát óziniń úıinde, óziniń tóseginde jatqandyǵyn bir-aq ańǵardy. Manaǵysynyń bári tús eken. Kórgen túsin oılanyp biraz jatty. Sonan soń  telefonyna qol sozdy. Súıiktisine qońyraý shalmaq boldy. Óziniń kórgen túsin aıtqysy keldi. Telefondy ile-shala kótergen qyzǵa jigit:

- Túsimde ózimizdiń dástúrli baǵyttaǵy án salatyn ánshilerdiń konsertine alyp barmadyń dep, qıǵylyq minez tanytyp jatyr ekensiń, - dep kúldi. - Tipti osyǵan bola senen ajyrap qalamyn ba dep qoryqqanym.

Qyz jigittiń sózine syńǵyrlaı kúldi.

- Bul múmkin bola qoıar ma eken? - dedi qyz kúlip. - Meniń talǵamym tek shetel estrada juldyzdarynyń konsertin ǵana qalaıdy ǵoı.

- Ózim de solaı oılap edim, - dedi jigit. - Biraq naq osyndaı jaǵdaı seniń basyńda aldaǵy ýaqytta qaıtalanyp qalmasyna kim kepil? Adam tústi beker kórmeıdi ǵoı.

- Múmkin! - dedi qyz oınaqylanyp. - Dál solaı dep qıǵylyq minez tanytyp jatýym da ǵajap emes. Sondyqtan da bárine de daıyn bol, jigitim!

Jigit kúldi:

- Nesi bar, sen úshin bárine de daıynbyz ǵoı!

---