InfoHub Logo

Búgin Astanada QR Densaýlyq saqtaý jáne áleýmettik damý vıse-mınıstri Eljan Birtanovtyń, JAMK jáne Lahti (Fınlándıa) qoldanbaly ǵylymdar ýnıversıteti basqarmasy basshylarynyń, Qazaqstannyń medısınalyq JOO men kolejderi jetekshileriniń jáne t.b. qatysýymen «Medısınalyq qyzmetter men medısınalyq bilim berýdi jetildirý boıynsha Qazaqstan men Fınlándıa yntymaqtastyǵy» atty dóńgelek stol ótti, dep habarlady vedomstvonyń baspasóz qyzmeti.

Sharaǵa qatysýshylar Qazaqstan men Fınlándıanyń joǵarǵy bilikti medısınalyq kadrlardy daıyndaýdaǵy, olardyń densaýlyq saqtaý salasyndaǵy róli, alǵashqy medısınalyq-sanıtarlyq kómek qyzmetin tıimdi úıymdastyrý salasyndaǵy yntymaqtastyq máselelerin talqylady.

Eljan Birtanov halyqaralyq standarttar negizinde medısınalyq kadrlardy onyń ishinde meıirgerlik is mamandaryn daıarlaý júıesin jetildirý - Qazaqstan halqyna kórsetiletin medısınalyq kómek sapasyn arttyrýǵa múmkindik beretinin atap aıtty.

Dóńgelek stol aıasynda «Orta medısınalyq qyzmetkerler men farmasevterdi daıarlaý men qaıta daıyndaý respýblıkalyq koleji» RMQK dırektory Naılá Rýzdenova, Astana ákimdiginiń «Medısınalyq kolej» MQKQ dırektory Aqbala Sarjanova, JAMK qoldanbaly ǵylymdar ýnıversıteti basqarmasynyń basshysy  Aıla Palonıemı men Lahti qoldanbaly ǵylymdar ýnıversıteti basqarmasynyń basshysy Karı Salmı densaýlyq saqtaý salasy men meıirgerlik isti damytý boıynsha ózara túsinistik pen strategıalyq yntymaqtastyq týraly  Memorandýmǵa qol qoıdy.

Atalǵan qujat taraptardyń kelesi baǵyttar boıynsha yntymaqtastyǵyn qarastyrady: medısınalyq bilim berý uıymdaryndaǵy menejmentti jetildirý; bilim berý baǵdarlamalarynyń tıimdiligi men pedagog kadrlardyń áleýetin arttyrý jáne aqparattyq, materıaldyq-tehnıkalyq resýrstardy jetildirý. 

Buryn habarlanǵandaı, Qazaqstannyń 10 medısınalyq koleji, onyń ishinde 2016 jyly 6, 2017 jyly 4 oqý orny joǵarǵy medısınalyq kolej bolyp qaıta qurylady. Atalǵan oqý oryndarynda fın sarapshylarynyń qatysýymen ázirlengen «Meıirgerlik is» mamandyǵy boıynsha qoldanbaly bakalavrıat baǵdarlamasy engizilmek. 

QR Densaýlyq saqtaý jáne áleýmettik damý mınıstrligi (ári qaraı - QR DSÁDM) «Meıirgerlik is» mamandyǵy boıynsha qoldanbaly bakalavrıatty engizý boıynsha jobany júzege asyrýdy 2014 jyly eksperımentaldy tártipte 6 memlekettik medısınalyq kolej bazasynda (Astana qalasynyń medısınalyq koleji, Kókshetaý medısınalyq koleji, Qyzylorda medısınalyq koleji, Pavlodar medısınalyq koleji, Respýblıkalyq orta medısınalyq jáne farmasevtıka qyzmetkerlerin daıyndaý men qaıta daıarlaý koleji, Batys Qazaqstan medısınalyq koleji) bastady. 

QR Densaýlyq saqtaý salasyn damytýdyń 2016-2019 arnalǵan «Densaýlyq» memlekettik baǵdarlamasyn júzege asyrý aıasynda QR DSÁDM mamandary JAMK jáne Lahti (Fınlándıa) qoldanbaly ǵylymdar ýnıversıtetteriniń áriptesterimen birlese otyryp QR-daǵy meıirgerlik bilim berý júıesin jetildirýdiń 2016-2019 jyldarǵa arnalǵan jol kartasyn jasady.

Qoldanbaly bakalavrıat baǵdarlamasy eýropalyq dırektıvalarǵa saı dýaldy bilim berý qaǵıdalaryn qarastyrady. Onyń ishinde oqý saǵattarynyń 60-70%-dan kem emes (oqý merzimi 3,5 jyl) kóleminde bilikti tálimgerdiiń basshylyǵymen emhanalyq bazada óndiristik praktıkany júzege asyrý da bar. Atalǵan baǵdarlama EýroOdaq elderinde keńinen taralǵan, sonymen qatar, praktıkalyq ázirligi basym joǵary bilikti meıirgerlerdi daıyndaýǵa baǵyttalǵan.

«Meıirgerlik is» mamandyǵy boıynsha qoldanbaly bakalavrıat joǵarǵy medısınalyq kolej túlekteri aýrýlardy dárigerge deıingi tekserý, aldyn ala dıagnoz qoıý, beıindi mamandaryna konsýltasıaǵa baǵyttaý, balalar jáne eresek turǵyndar patronajy, dárigerdiń baqylaýymen dárilik taǵaıyndaýlardy jazý syndy  meıirgerlik qabyldaý úshin kásibı mashyqtardy ıgerip shygady.

Bıyl fın jáne otandyq mamandar «Meıirgerlik is» mamandyǵy boıynsha qoldanbaly bakalavrıattyń biriktirilgen baǵdarlamasyn ázirledi. Atalǵan baǵdarlama boıynsha budan buryn bilim alǵan meıirgerler bir jarym jyldyń ishinde qosymsha oqý arqyly óz kásibı mashyqtaryn damyta alady.

Biriktirilgen baǵdarlama boıynsha oqytý eksperımentaldy tártipte joǵaryda atalǵan 6 medısınalyq kolejde 2016 jylǵy qyrkúıek aıynan bastaldy. Baǵdarlama boıynsha 150 adam (árbir kolejde 25 orynnan) tegin oqytylmaq.

Esterińizge sala keteıik, qazirgi tańda Qazaqstanda 26 memlekettik jáne 37 jeke medısınalyq kolej bar. Olar jyl saıyn orta eseppen 12 myń orta býyn medqyzmetker daıyndaıdy. Búginde orta medpersonal sala qyzmetkerleriniń eń kóp sanatyn quraıdy, oradyń sany shamamen 160 myń maman.

---