InfoHub Logo

Júktilik kezinde áıeldiń barlyq dene aǵzalarynda úlken ózgerister bolady. Aǵza jatyrdaǵy uryqtyń ósip-jetilýine baılanysty jańa jaǵdaıǵa beıimdeledi. Barlyq aǵzalar qalypty jaǵdaıda bolady, biraq júktilikke deıingi jaǵdaımen salystyrǵanda artyq aýyrtpalyqpen jumys jasaıdy. Durys tamaqtanyp, demalys tártibin durys saqtap, zıandy ádetterden (temeki shegý, spırtti ishimdikter ishý) aýlaq bolǵan jaǵdaıda júkti áıel aǵzalary qalypty jaǵdaıda jumys jasaı alady.

Júkti áıeldiń dene shynyqtyrýmen aınalysýynyń júktilik, bosaný, bosanýdan keıingi kezeńderdiń durys ótýimen qatar dúnıege deni saý náreste ákelýde mańyzy zor. Tájirıbelik baıqaýlardyń nátıjesine júginsek, dene shynyqtyrýmen jáne sportpen shuǵyldanǵan áıelderdiń bosanýy jeńil ári eshbir qaýipsiz ótetin kórinedi. Dene shynyqtyrýdyń arqasynda júkti áıelderdiń tynys alý, júrek-qan tamyr jáne júıke júıeleriniń jumysy jaqsaryp, jynys jáne ishki aǵzalarynyń bulshyq etteri shynyǵyp, bosaný kezinde eriksiz sozylýyna, belgili bir ýaqyttan soń qaıta qalpyna kelýine múmkindik týady. Ártúrli dene shynyqtyrý jattyǵýlary qynaptyń jáne omyrtqanyń tómengi bóligindegi bulshyq etterdi shynyqtyrady, júktilik kezinde ish qatýǵa, etekkir kezindegi aýyrsynýǵa, jatyr bezderiniń qabynýyna jol bermeıdi. Shynyqqan áıelderde bosaný kezinde qynaptyń jyrtylýy, taǵy basqa asqynýlar sırek. Sondyqtan júktilikke deıin de, júktilik kezinde de, bosanǵannan keıin de dene shynyqtyrýmen aınalysqan jón. Júkti áıeldiń dene shynyqtyrýdyń qandaı túrimen, qansha mólsherde aınalysý kerektigin dáriger anyqtap beredi.

Tómende kórsetilgen jaǵdaılarda júkti áıelderge dene shynyqtyrýmen aınalysýǵa bolmaıdy:

1. Qan aınalymy ózgerisi bar júrek-qan tamyry aýrýlarynyń bolýy;

2. Bala joldasynyń teris ornalasýy;

3. Júktilik ýyttanýynyń (toksıkoz) aýyr túri kezinde;

4. Túsik qaýpi bolǵanda;

5. Sý-egiz;

6. Egiz júktilik;

7. Jatyrdaǵy balanyń teris ornalasýy;

8. Aldyńǵy júktilik kezinde áıel otalaý arqyly bosandyrylǵan bolsa.

32 aptalyq júktilikke deıin dene shynyqtyrýdyń 2 túrli jolymen aınalysýǵa bolady:

1. Maman dárigerlerdiń baqylaýymen júkti áıelderge keńes berý oryndarynda toptalyp aınalysý;

2. Árbir júkti áıel óz erkimen úıde aınalysa alady.

Dene shynyqtyrý uzaqtyǵy 15-20-30 mınýt. Jattyǵýdyń jeńil túrinen aýyr túrine aýysyp otyrady.

Dene shynyqtyrý kezeńderi:

1. 16 aptalyq júktilikke deıin;

2. 16-21 aptalyq júktilik;

3. 27-32 aptalyq júktilik;

4. 32-36 aptalyq júktilik kezinde.

N. B. LI, joǵary sanatty dáriger

---