InfoHub Logo

- Óziń jáne otbasyń jaıly aıta ketseń?

- Men - Qumar Oljas. 2004 jyly mamyr aıynda Atyraý qalasynda, Aqjar aýylynda dúnıege keldim. Otbasymda 5 adam: ájem, ákem, anam, aǵam jáne men. Ákem – munaıshy, anam muǵalim bop qyzmet atqarady.

- Sportqa qansha jasyńda keldiń? Alǵash kelgen sátiń esiń de me?

- Sportqa 10 jasymda keldim. 2015 jyldan bastap nyqtap kirisip, daıyndyqty kúsheıttim. Jalpy, “Dzúdo” sportyna qyzyǵýshylyǵym sol sportty kórip, baqylap júrgennen keıin bastaldy. Teledıdardan dúzúdoıstterdiń neshe túrli ádister jasap, eńbektenip, sonyń arqasynda álemdik deńgeıge jetkeni “qatysamyn” degen oıǵa ákeldi. Sodan ákeme aıtyp, ol meniń bastamamdy qoldap, solaı bul sportty da alyp kettik.

- Alǵashqy jeńisiń men jeńilisiń?

- Alǵashqy jeńis te, jeńilis te erekshe este qalady ǵoı. Sebebi, ekeýi de myqtylyǵyńdy shyńdaı túsedi. Alǵashqy jeńisim Atyraý oblysynda ótken týrnırde, 32 kg salmaqta boldy. Kúmis medaldi qanjyǵama baıladym. Jeńilisim Atyraý qalasynda “Chempıonat Qazaqstanǵa” irikteý bolyp jatyrǵan kezde boldy. Birinshi beldesýden utyldym.

- Sportta úlgi tutar kýmıriń kim?

- Ózim qatysatyn sport “Dzúdo” bolǵandyqtan, bar qyzyǵýshylyǵymda osyda. Negizi mende “kýmır sanaımyn” degen adam joq. Men úshin barlyǵy myqty. Alaıda, naqty kúresý ádisinen Eldos Smetovti erekshe aıtýǵa bolady. Kúres sátindegi qoldanatyn tásilderi, úlgisi maqtaýǵa turarlyq.

- Qazaqstannan basqa elderde de beldesip, kók týymyzdy jelbiretip júrsiń. Shet elderdegi kúreste erekshe sezim bola ma?

- Árıne, bolady. Óz elińdegi kúresten aıyrmashylyǵy da bólekqoı. Eger Qazaqstanda kúressem óz qalamdy, oblystyń atyn qorǵaımyn. Basqa elde, kerisinshe, Qazaqstannyń namysyn bermeý kerek. Sondyqtan áldeqaıda úlken jaýapkershilik sezinemin. Ondaı sátterde meniń maqsattarym kúsheıe túsedi, ózimdi birneshe ese jigerlendirip, birneshe ese myqtylaı túsýge tyrysamyn.

- Sporttaǵy dostyq jaıly ne aıta alasyń?

- Sportta da dostyq bolady. Meniń ár óńirden dostarym kóp. Barlyǵymen jarys sátinde tanysyp, aralasyp kettik. Áli de jaqsy qarym-qatynastamyz. Shyn máninde tatamıge deıin barlyǵyda dos bolady, eger kúres alańyna shyqsa qarsylasqa aınalady. Mende de dál solaı. Óz namysyńdy qoldan jibermeý úshin alańda qarsylasta bolasyń. Alaıda, ómirde syılastyǵymyz báribir joǵary.

- Sportshy bolý úshin, sol jolda bıik belesterdi baǵyndyrý úshin qandaı bolý qajet?

- Sport – yjdahattylyq pen eńbekti talap etedi. Sol sebepti, árıne, eńbekqor bolý kerek. “Eńbek etseń erinbeı, Toıady qarnyń tilenbeı” degen maqal beker aıtylmaǵanǵoı. Eńbek etken adamǵa barlyǵyda bolady. Bar kúshińizdi salyp, shydamdylyqpen kúte bilseńiz, kórgen, sezingen qıyn sátterdiń jemisi bolary anyq.

- Osy ýaqytqa deıin ıelengen eń úlken jetistigim dep neni aıtar ediń?

- Ol 2020 jyly Antalıa qalasynda ótken “Eýropa kýboginde” qola júldeger atanǵanym. Osy úlken jetistigim dep bilemin.

- Ashyq áńgime úshin alǵysym sheksiz. Eldiń namysyn jibermeı, kók týyn bıik qalyqtatatyn dzúdoıst bolýyńa tilektespiz! 

Jumabaı Aıymjan

---