InfoHub Logo

«Elbasy - elimniń tiregi»

Elbasymmen men búgin maqtanamyn, 
Ózińizdi álemge aıtyp shattanamyn. 
Qazaǵym jetti búgin armanyna, 
Elbasym, aınalaıyn, atqan tańym. 

Bir qalamnyń ushymen jazylyp, barsha qaýymnyń júregine ornaǵan, bir aýyzdan aıtylyp, keń ólkemdi sharlaǵan osynaý bir ystyq sóz, ystyq kóńil lebizi búgin ǵana emes, bar ýaqytta da qan tamyrymyzdyń lúpil — búlkilindeı estiledi bizge. Iá, bul – búkil qazaq jurtynyń, dúıim Qazaqstan eliniń qyzý qushtarlyqpen, sarqylmas súıispenshilikpen aıtar, ardaq tutar asyl lebizi. Kóńil - kúı serpilisimen syrymdy aqtarsam, onyń esh aıyby joq dep oılaımyn. Meniń kóńilimdi serpip, júregimdi terbep otyrǵan búgingi kúnniń jeńisterine jetkizýshi, elin Abylaı babamnyń aq jolymen, Mahambet babamnyń ór rýhymen basqaryp otyrǵan elimizdiń Tuńǵysh Prezıdenti, Elbasy – Nursultan Ábishuly Nazarbaev.
Osyndaı dana Elbasymen maqtanýdyń ózi, Elbasyna arnap shyǵarma jazýdyń ózi bir baqyt dep bilemin. Búginde búkil eldiń qoldaýymen senimine ıe bolyp, eldi syndarly jolmen bolashaqqa aıqyn bastap kele jatqan Elbasymyz Nursultan Nazarbaevtyń qurmetine toılanatyn — Tuńǵysh Prezıdent kúni biz úshin de óte qadirli mereke. Bul merekeniń toılanýynyń ózindik ultqa bereri mol. Osy mereke arqyly jas urpaq Táýelsiz Qazaqstannyń tarıhyn tanyp, onyń el bolyp qalyptasý jolynda qandaı tulǵanyń aıanbaı eńbek etkenin jadynda saqtaýyna úlesin qosady. 1-jeltoqsan Qazaqstannyń shejiresinde úlken mánge ıe, sondyqtan atalmysh kúnniń Tuńǵysh Prezıdent kúni retinde toılanýy zańdy qubylys. Óz halqyna qolynan kelgen jaqsylyqtyń bárin jasap jatqan Elbasymyzben maqtanamyn. Osyndaı irgeli memleketti basqarý úshin asqan kóregendik, bilim, adamgershilik kerek. Osy qasıetterdiń barlyǵy tal boıyna toǵysqan Elbasymyz – halqymyzdyń eń tańdaýly adamy. Bir danyshpannan: «Dúnıede kim baqytty?» – dep surapty. Sonda danyshpan: «Elin baqytqa keneltken adam baqytty», – degen eken. Halyqtyń damýyna sara jol salǵan, qazaqstandyqtardy baqytqa keneltken qadirli Elbasy, Sizden asqan baqytty adam joq shyǵar  myna dúnıede?

Nursultan atamyz at qulaǵynda oınap, shahmattan «mat» qoıyp, dombyrany kúmbirlete kúı tartyp, ánshilik ónerin de boıyna tundyrǵan. Biz baqytty balalyq shaqty bastan keshtik. Ata - ana­myzǵa erkeledik, dostarymyzben alańsyz oınadyq. Al jas Elbasynyń balalyq shaǵy el ómirindegi qıyn kezeńder­men tuspa - tus keldi. Biraq áje ónegesi, ana tálimi men áke tárbıesi onyń bala jastan shıraq, batyl bolýyna yqpal etti. Qazaq  halqynda úıdiń tiregi áke dep sanalady ǵoı, al Nursultan Ábishuly – eliniń tiregi, halqynyń qorǵany, tynyshtyǵyn saqtaýshy. Áke  balasyna qalaı qamqor bolsa, ol kisi halqyna solaı qamqor, bárimizdiń ákemizdeı.

Jer betinde eliniń táýelsizdigin, halqynyń bostandy­ǵyn oılamaıtyn jurt joq shyǵar?  Bul táýelsizdik – basqa qonǵan baq, astyǵa tıgen taq. Baqty baǵalaǵan halyqty bastaıtyn taq ıesi de bolýy kerek dep oılaımyn. Basty biriktirer basshysyz el bolý qıyn. Táýel­sizdigimizdi alǵannan keıin halyqtyń basyn biriktirip, óz aldyna el qylýdy oılaǵan Nursultan Ábishuly Nazarbaev qazaq halqynyń Tuńǵysh Prezıdenti boldy. Sol kisiniń bastaýymen elimiz álemge tanyldy.

 Qazaqstan Respýblıkasynyń árbir azamaty táýelsiz elin maqtan tutatyn jóni bar. Ata - babalarymyzdyń ǵasyrlar boıy ańsap ótken Táýelsizdikke qol jetkizgeli beri talaı - talaı asqarly asýlar baǵyndy. Elimizde ulttar dostyǵy qanat jaıyp keledi. Bul jetistikte sóz joq elimizdiń tuńǵysh prezıdenti Nursultan Ábishuly Nazarbaevtyń sińirgen úlken eńbegi bar. Basshy basqarǵan el - eń baı memleket, halqy - eń baqytty halyq. Elbasymyzdyń jyl saıynǵy halyqqa Joldaýy –  bizdiń adaspaıtyn jolymyz, aıqyn baǵdarymyz. Elbasynyń árbir sózinde mán – maǵyna bar. Tálim alar, taǵylym bolarlyq qundylyqtar jeterlik. Táýelsizdiktiń jıyrma jeti jylynda elimiz álemge tanyldy. Ǵalam baǵalaıtyn qýatty elge aınaldyq. Elbasy jasóspirimderge «Elimizdiń erteńi – sendersińder, sondyqtan qazaqtyń tarıhyn bilińder, sabaqty jaqsy oqyńdar dep árqashan ósıet aıtady. Qazir meni «Bolashaqta elim úshin ne isteı alamyn?» degen oı tolǵandyrady. Al osy suraqqa jaýapty tek kóp izdený men mol bilimniń arqasynda tabýǵa bolatynyn túsinemin. Sondyqtan meniń basty maqsatym – talmaı oqý, bilimniń bıik shyńdaryn baǵyndyrý.

Men osyndaı danagóı, asyl qasıetke baı elde dúnıege kelgenime, qazaq ekenime maqtanamyn jáne elimizdi el etip, jerimizdi jer etip, ólsheýsiz eńbek etýiniń arqasynda, Qazaqstandy álemdik bıik belesterge kóterýge ólsheýsiz áreket etip jatqan Elbasyna erekshe iltıpatpen qaraımyn.

Elbasynyń eleýli isterin bir shyǵarmanyń  barysynda  qamtý  múmkin emes. Sondyqtan  búkil ultymyzdyń aıbyn­dy abyroıy, kıesi atana alǵan Elbasymyzdy maqtan ete otyryp, bizder, óskeleń jas urpaq, onyń armanyn iske asyratyn tiregi bolyp, elimizdiń Kók Baıraǵyn bıiktete bereıik!

Elimiz tynysh, halqymyz aman, táýelsizdigimiz tuǵyrly bolsyn degen nıetpen óz oıymdy júrekjardy óleń joldarymen aıaqtaǵym keledi:       

Gúldensin, kórkeısin jerimiz,

Baqytty bolsyn tek elimiz.

Elbasym -  elimniń tiregi,

Birgemiz, máńgilik bir elmiz. 

oryndaǵan: Muqash Jansaıa, 8 synyp oqýshysy, 14 jas

Jetekshi: Gúljıan Serikbaıqyzy Begaıdarova

---