InfoHub Logo

Almatyda «Qazatomónerkásip» UAK» AQ jáne «Q.I.Sátpaev atyndaǵy QazUTZÝ» KeAQ arasyndaǵy «Halyqaralyq atom ónerkásibi ǵylymı-oqytý ortalyǵyn» qurý týraly kelisimge qol qoıý rásimi bolyp ótti, dep habarlaıdy kompanıanyń baspasóz qyzmeti.

Otalyqtyń mindeti - Qazaqstannyń atom salasy úshin joǵary bilikti mamandar daıarlaý, sonyń ishinde sheteldik stýdentterdi oqytý. Oqý orny Qazatomónerkásipke qajetti baǵyttar boıynsha ádister men tehnologıalardy jetildirýmen, sondaı-aq atom ǵylymy men óndirisiniń mańyzdy máseleleri jónindegi ǵylymı-zertteý jáne tájirıbelik-konstrýktorlyq jumystarmen shuǵyldanady.

Kelisimniń sharttaryna sáıkes, QazUTZÝ magıstranttary Qazatomónerkásip bólimshelerinde tájirıbeden óte alady. Sonymen qatar, kompanıa ýnıversıtet stýdentteri men qyzmetkerleriniń ǵylymı zertteýleri, kýrstyq jáne dıplomdyq jobalarynyń úzdik nátıjelerin óndiriske engizýine kómektesetin bolady.

Pánderdi oqytý úshin Ortalyq janynan ulttyq atom kompanıasynyń ardagerleri men qyzmetkerlerinen «Aqsaqalder keńesi» qurmetti profesorlar qaýymdastyǵy quryldy. Oqytý baǵdarlamasy geologıa jáne ýran ken oryndaryn barlaý, sırek jáne sırek jer metaldar metalýrgıasy, óndiristik prosesterdi avtomattandyrý sıaqty negizgi pánderdi qamtıdy. Sonymen qatar, pánderdiń kóp bóligi aǵylshyn tilinde oqytylady.

«Halyqaralyq atom ónerkásibi ǵylymı-oqytý ortalyǵy - joǵary bilikti mamandar daıyndaýdyń biregeı alańy. Ǵylym men óndiristegi kásipqoı kadrlardyń birlesken is-qımyly atom salasynyń odan ári damýyna sınergetıkalyq nátıje beredi», - dep atap kórsetti Iskander Beısembetov. 

---