InfoHub Logo

QR Bilim jáne ǵylym vıse-mınıstri Elmıra Sýhanberdıeva elordadaǵy №59 mekteptegi 14 jasar Temirulan Dıhanbaevtyń ólimine soqtyrǵan qaıǵyly oqıǵaǵa oraı túsinikteme berdi.

«Qazir qandaı da bir sebebin aıtýǵa bizdiń quqyǵymyz joq. Óıtkeni, sotqa deıingi tergeý amldary júrgizilip jatyr. Qańtardyń basynda saraptama daıyn bolady, ony qazir krımınalıser tekserip jatyr. Men onda úlken top bar ekendigin, buǵan qosa oǵan Almaty men Astanadan shaqyrylǵan mamandardyń bar ekendigin bilemin. Balanyń ómiri nelikten qıylǵandyǵyn, shyndyqty anyqtaý úshin úlken komısıa jumys isteýde», - dep atap ótti ol Ortalyq komýnıkasıalar qyzmetindegi brıfıńte BAQ ókilderiniń saýalyna oraı.

Sonymen qatar vıse-mınıstr balalardyń arasynda tóbelestiń bolǵan-bolmaǵandyǵyn anyqtaý sharalary da júrgizilip jatqandyǵyn aıtty. Astana qalalyq bilim basqarmasy da óz tergeý amaldaryn júrgizip jatyr. Búgingi kúni qaıǵyly oqıǵa oryn alǵan sátte muǵalimniń bolmaǵandyǵy anyqtalǵan.

«Ózderińizde bilesizder, balalardan birdeńe suraý ońaı emes. Tipti áńgimeleskenniń ózinde ata-anasy, mektep psıhology, muǵalimi bolýy qajet. Tóbeles boldy ma? Balalardyń basym bóligi bolǵan joq deıdi. Keıbir balalar boldy deıdi. Jeke qyzmettik tergeý júrgizilýde. Shyndyǵynda, oqıǵa kezinde muǵalim synyptan shyǵyp ketken. Mundaı jaıt bolǵan. Sondyqtan qazir biz bir nárse jaıynda aıta almaımyz. Óıtkeni, balanyń neden ólgenin bilmeımiz», - dedi Sýhanberdıeva.

Esterińizge sala ketsek, Astana qalalyq İİD aqparatyna sáıkes,  14 jastaǵy balanyń zorlyq-zombylyq belgisi joq múrdesi 30 qarasha kúni saǵat 13.00-de №59 mekteptiń oqý synybynda tabylǵan.

---