InfoHub Logo

2022 jyly erekshe bilim berý qajettilikteri bar talapkerlerge UBT tapsyrý úshin qosymsha ýaqyt beriledi.

Bilim jáne ǵylym mınıstri Ashat Aımaǵambetovtiń tapsyrmasy boıynsha Ulttyq testileý ortalyǵy erekshe qajettilikteri bar talapkerler UBT-ny qolaıly jaǵdaılarda ótýi úshin birqatar shara qabyldaıtyn boldy. Vedomstvonyń málimetinshe, kelesi jyly kórý, estý, tirek-qımyl apparatynyń fýnksıalary buzylǵan oqýǵa túsýshiler negizgi 240 mınýttan basqa testileý tapsyrmalaryn oryndaý úshin qosymsha 40 mınýt alady. Iaǵnı, olar UBT - ny basqalarǵa qaraǵanda uzaǵyraq - 4 saǵat 40 mınýt ishinde tapsyra alady.

«Biz úshin jumystyń eń basty baǵyty – talapkerlerdiń múddesi. Biz UBT-ny jylyna birneshe ret ótkizemiz. Biz talapkerlerdiń, sonyń ishinde erekshe bilim berý qajettilikteri bar talapkerlerdiń testileýdi yńǵaıly tapsyrýy úshin jaǵdaı jasaýdy jalǵastyramyz. Olar úshin UBT tapsyrý ýaqyty taǵy 40 mınýtqa uzartylady. Sonymen qatar erekshe qajettilikteri bar talapkerlerge arnalǵan tapsyrmalardyń mazmunyna da ózgerister engiziledi. Olar úshin syzbalarsyz, dıagramsyz test nusqalary jasaldy. Osyǵan deıin bilim jáne ǵylym mınıstri A.Aımaǵambetov bizge osyndaı tapsyrma bergen bolatyn. Bul ózgerister olar úshin UBT - dan ótýdi aıtarlyqtaı jeńildetedi», — dep atap ótti Ulttyq testileý ortalyǵynyń dırektory Rýslan Emelbaev.

Bul rette, testileýdi tapsyrý kezinde ashyqtyq qaǵıdatyn qamtamasyz etý mańyzdy. Osyǵan deıin mınıstrlik keshendi sharalar qabyldaǵan bolatyn. Kelesi jyly testileý «1 kompúter - 2 kamera - 1 testilenýshi» qaǵıdaty boıynsha júrgiziledi. Oqýǵa túsýshiniń jumys ornynda negizgi kameradan basqa, testilenýshiniń dybysyn jazý jáne qozǵalysyn tirkeý úshin qosymsha aldyńǵy veb-kamera ornatylady. Frontaldy veb-kamera oqýǵa túsýshiniń jeke basyn sáıkestendirýge jáne UBT kezinde bógde adamdardyń kirýin boldyrmaýǵa múmkindik beredi. Sondaı-aq bul emtıhan tapsyrý barysyna baqylaý júrgizý jáne testileýdiń ashyqtyǵyn qamtamasyz etý úshin qajet.

UBT-2022 aıaqtalǵannan keıin kúntizbelik jyldyń sońyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese basqa da buzýshylyq faktileri anyqtalǵan jaǵdaıda, oqýǵa túsýshiniń UBT nátıjeleri joıylady.

Aıta keteıik, 2022 jyly UBT elektrondy formatta ótedi. Oqýǵa túsýshiler dástúrli túrde 3 mindetti pándi (Qazaqstan tarıhy, matematıkalyq saýattylyq, oqý saýattylyǵy) jáne 2 beıindi pándi tapsyrady.

---