InfoHub Logo

Qaraǵandy qalasyna jumys saparymen barǵan QR Bilim jáne ǵylym mınıstri Erlan Saǵadıev pedagogtarmen kezdesip, Prezıdent Joldaýyndaǵy basymdyqtar týraly aıtty.

Bilim salasy balabaqshalardan bastap jańǵyrtylatyn bolady. Kelesi jyldan bastap-aq tárbıeshilerdiń biliktiligin arttyrýǵa erekshe nazar aýdarylady. Olar úshin qysqa merzimdi kýrstar uıymdastyrylyp, onyń sońynda ulttyq testileý ótedi. Tárbıeshiler úshin jańa jalaqy júıesi qurylady. Jalaqy eńbek ótili men sanatqa baılanysty bolady.

Qaraǵandy oblysy ákimdiginiń baspasóz qyzmetinen málim etkendeı, Erlan Saǵadıev mektepterdegi qaýipsizdik jáne jasóspirimder arasyndaǵy sýısıdtiń aldyn alýǵa erekshe nazar aýdardy. Onyń pikirinshe, bul baǵyttaǵy jumysty bilim ordalaryndaǵy psıhologtardyń sanyn kóbeıtýden jáne olardyń biliktiligin arttyrýdan bastaý kerek. 

«Mektep psıhologtarynda eki problema bar: tómen jalaqy jáne eskirgen bilim. Bul problemalardy biliktilikti arttyrý kýrstary jáne emtıhandar arqyly sheshýdi kózdep otyrmyz. Mektep psıhologtary úshin, sondaı-aq bólek jalaqy júıesi qurylatyn bolady. Buǵan qosa, mektep psıhologtarynyń sany mekteptegi oqýshylar sanyna baılanysty esepteledi. Osylaısha, mamandar sany ulǵaıady», - dedi mınıstr. 

Joldaýda atap ótilgen reformalar joǵary oqý oryndaryndaǵy bilim berýge de áser etetin bolady.

Erlan Saǵadıevtiń aıtýynsha, alǵan mamandyǵy boıynsha jumys istep jatqan túlekterge negizdelgen ýnıversıtetterdiń reıtingisi qurylady. 

«Eger reıtıń joǵary bolsa, ári qaraı bilim bere bersin. Eger jumysqa turǵandar az bolsa, biz JOO-ny osy mamandyq boıynsha lısenzıasynan aıyramyz. Ol beıindeýge alyp keledi. Ýnıversıtetter neden bastady, soǵan qaıtyp keledi: ınjenerlik mamandyqtar, gýmanıtarlyq, tilder jáne taǵy basqalary. Ádette, ondaı salalyq pánder jaqsy oqytylady da, qalǵan mamandyqtardy aqsha tabý úshin jınap alǵan», - dep túsindirdi ol. 
Kezdesý sońynda pedagogtar mınıstrge jalaqyny kóterý jáne jańartylǵan bilim berý júıesine qatysty birqatar suraqtar qoıdy. 

Bilim jáne ǵylym mınıstri Erlan Saǵadıev 15 qazan kúni Qaraǵandy oblysyna jumys saparymen keldi. Ol aldymen «Kolobok» shaǵyn ortalyǵynda jáne tehnıkalyq-qurylys kolejinde bolyp, pedagogtarmen ınklúzıvti bilim máselelerin talqylady. 

QazAqparat

---