InfoHub Logo

Eskeldiniń úlken atasy Janǵabyl batyr áıgili Álibekuly Tóle bımen bastas, qadirles, quda bolǵan. Tóle bıdiń Ulbıke degen qyzy Eskeldiniń anasy. Eskeldi dúnıege kelip, Tóle bıden súıinshi surapty deıdi.

Sonda Tóle bı: «Tilekti Alla eskerdi, Jalaıyr eline eskeldi, balanyń aty Eskeldi bolsyn. Eliniń esine es qosylyp, halqynyń qamyn oılaıtyn azamat bolsyn!» — dep batsyn beripti.

Eskeldiniń at jalyn tartyp minip, el isine aralasqan kezi — Jońǵar shapqynshylyǵynyń órship, ásirese Jetisýdy qonystanǵan qazaq rý-taıpalarynyń zor kúızeliske ushyraýymen tuspa-tus keledi. Joıqyn shapqynshylyq jyldarynda Jalaıyr eli ata qonysynan aýa kóship, Syr boıyna yǵysýǵa májbúr bolady. osyndaı qıyn-qystaý kezeńde Eskeldi bı óziniń áıgili úzeńgilesteri Balpyq bı, Oraqty batyr, Qaban jyraý sıaqty elge tutqa azamattarmen tize qosa qımyldap júrip, atamekennen jaýdyń irgesiniń túrilýine muryndyq bolady. Eskeldi alǵash ret jońǵarlarmen bolǵan İle-Baqanas shaıqasynda (1723) batyrlyǵymen kózge túsedi. osy soǵysta jońǵarlardyń Jetisýdaǵy eń berik bekinisin buzyp, Eskeldi batyr bastaǵan qol Qabanbaı batyrdyń áskerine qosyldy. Kúsh biriktirgen qazaq qosyndary túrile qashqan jońǵar jaqtaryna Jońǵar qaqpasynyń túbinde soqqy berip, zor shyǵynǵa ushyratady.

 

---