InfoHub Logo

Jalyndaǵan jastar qaýymyna qashanda qoldaý kórsetip, olardyń belsendilikterin arttyrýda otandyq joǵarǵy oqý oryndarynyń aldyńǵy qataryndaǵy ál-Farabı atyndaǵy Qazaq Ulttyq Ýnıversıtetiniń mańyzy aıryqsha zor. Fılologıa jáne álem tilderi fakúltetiniń qazaq tili men ádebıeti mamandyǵynyń 2-kýrs stýdentterimen ótken «Fılologıa jáne smart tehnologıalar» sabaǵyndaǵy keń kólemdi pikirsaıys - bul sózimizdiń bultartpas dáleli.

«Ǵalamtor jastar kózimen» atty pikirsaıysta stýdentter eki topqa bólinip, ǵalamtordyń artyqshylyqtary men kemshilikterin, paıdasy men zıanyn sóz etti. 1-top ókili Nazym Saparova ǵalamtordy kóp qoldanǵanymen, kitapty odan anaǵurlym artyq sanaıtyndyǵyn aıtty. Al, qarsy toptyń namysyn qorǵaǵan Symbat Jylqaıdar durys paıdalana bilgenge onyń eshqandaı zıany joq, kerisinshe, berer múmkindigi kóp ekendigin tilge tıek etti. Belsendilik tanytqan ózge de qatysýshylardyń ishinde ǵalamtor jaıly toptama óleńderin oqyp bergen Abaı Aqbaı erekshe este qaldy. Sonymen qatar,  qoljetimdi aqparat alýdaǵy ǵalamtordyń róli, onlaın-sabaqtardyń tıimdiligi syndy ózekti máseleler de taqyryptan tys qalmady.  Sabaq sońynda pán oqytýshysy Gúlmarıa Turysbekqyzy stýdentter qaýymyna «Ǵalamtor maǵan ne beredi?» degen atpen esse jazýǵa tapsyrma berdi. Búgingi kúnniń eń ózekti máselesin sóz etken  bul pikirsaıys jastar kózqarasyn bilýdiń qanshalyqty mańyzdy ekenidigin kórsetti. Sonymen qatar, paıymdy pikirler men dáıekti derekterge súıengen stýdentter ózderiniń tanym kókjıekteriniń keńdigin barynsha tanyta bildi desek, artyq aıtqanymyz emes.

Qandaı máselede bolmasyn, jańasha oılaıtyn jastar qaýymynyń ózindik pikirin tyńdap, olardyń da usynys-tilekterine qulaq túre bilsek, elimizdiń  alǵa jyljı bereri sózsiz. Endeshe, jastarmen oı almasyp, san túrli saýaldarǵa birge jaýap izdeıtin    osyndaı is-sharalardy kóptep ótkizgenimiz abzal.

---