InfoHub Logo

Qurǵaq kóz sındromy degenimiz, ádette, etıologıasy ár túrli aýrýlardyń belgilerin kórsetetin termın. Bul syrqattardyń sebepteri san-alýan.

Kompúterde jumys istegen nemese teledıdar kórgen soń kózińiz ashyp, ishine qoqys túskendeı jaısyzdyq sezinesiz, kóz qyzaryp, zattar buldyrap kórinedi, biraq kózińizdi biraz jypylyqtatqannan keıin bári qaıtadan qalpyna keledi. Bunyń bári qurǵaq kóz sındromynyń belgileri. Ádette kózdi jaýyp turǵan qurǵaǵan plenka kózdi jypylyqtatqanda ylǵaldanady da joǵaryda aıtylǵan qolaısyz sezimder joǵalady. Eger kózdiń titirkenýi jıilep ketse, al kózdi jypylyqtatý kómektespese, kóz dárigerine barý kerek.

«Qurǵaq kóz sındromy» degen naqtama qoıylatyn naýqastar sońǵy ýaqytta kóbeıip ketti. Ádette, bul aýrý kózdiń betkeıin ylǵaldandyryp, ony juqa qabatpen jaýyp turatyn kóz plenkasy, ıaǵnı úldiri sapasynyń buzylýynan týyndaıdy. Plenka kóz almasyn kebýden jáne patogendi mıkrobtardan qorǵaıdy, onda móldir qabyqty qorektendiretin zattar bolady.

Kózdiń qurǵaqtyǵy birqatar sebepterden týyndaıdy. Bul sebepterge den qoıýdy talap etetin oqý, kompúterde jumys jasaý jatady.   Keseldi temeki shegý, úı-jaıdaǵy aýanyń qurǵaqtyǵy, kóshedegi paıdalanylǵan gazdar, janaspaly lınzalar kıý, dárýmeni az sapasyz tamaqpen qorektený de týdyrady.

Qurǵaq kóz sındromy qart adamdarda jıi. Óıtkeni alpys bes jastan asqan soń bizdiń organızmimiz maı sólin óndirýdi 40 paıyzǵa azaıtady, bul kóz jasy úldiriniń tez kebýine alyp keledi. Qurǵaq kóz sındromynyń týyndaýyna sondaı-aq klımaks, menopaýza, júktilik, bala emizý, keıbir dárilerdi ishý kezinde jáne adamda belgili bir aýrýlar bolǵan jaǵdaıda baıqalatyn estrogender tapshylyǵy da yqpal etedi. Biraq qurǵaq kóz sındromy kezinde naýqas adam sezinetin patologıalyq ahýaldardyń sıpaty, ádette, bárine ortaq: kózdiń ashýy, kúıip turǵandaı sezim, qatty qurǵaýy nemese, kerisinshe, jas aǵý. Naýqas adam kózge qum túskendeı sezimge, aýyrsynýǵa, qatty jaryqtan qozýǵa, oqyǵan kezde eńbek qabiletiniń tómendeýine, kóz kórgishtiginiń nasharlaýyna shaǵymdanady. Kóbine syrtqy belgiler baıqalmaıdy, keı adamdarda kóz qyzarady.

Kózdiń qurǵaýynyń negizgi sebebi — kóz jasy suıyqtyǵyn óndiretin jas bezderi jumysynyń nasharlaýy. Buǵan áser etetin sebepter birnesheý:

— jasqa baılanysty gormondyq ózgerister;

— alergıaǵa qarsy, nesep aıdaıtyn, tamyr taryltatyn, gıpotenzıvtik dárilerdi qoldaný;

— sozylmaly aýrýlar — revmatoıdty artrıt, sklerodermıa, qyzyl jegi, qantty dıabet, baýyr qyzmetiniń buzylýy;

—  tektik beıimdik.

Kózdiń qurǵaqtyǵyna sebep bolatyn basqa jaǵdaılar mehanıkalyq sıpatta. Kóbine salaýatty ómir súrmeýden bolady. Bul jaǵdaılarda kóz jasy bezderi qalypty jumys jasaıdy, biraq kóz jasy suıyqtyǵy kóz betinen tez býlanyp ketedi. Sonymen qatar kóz jasy suıyqtyǵynyń tez býlanýyna kózdi sırek jypylyqtatý, jylytqysh, jeldetkish qoldaný, kompúter men teledıdar aldynda kóp otyrý, kóz jaraqattary, temeki shegilgen bólmede bolý, qabaq qurylymynyń patologıasy da áser etedi. Sonymen birge kóz jasy suıyqtyǵynyń sapalyq kuramynyń nasharlaýyna maısyz emdám, júktilik, bala emizý, avıtamınoz, baýyr men búırek qyzmetiniń nasharlaýy da sebep.

Durys naqtamany jáne onyń sebebin tek dáriger ǵana qoıady. Qurǵaq kóz sındromyn emdeýdiń keń taraǵan ádisi — jasandy kóz jasy tamshylaryn qoldaný. Bul preparattardy júıeli túrde qoldaný naýqastarǵa biraz jeńildik ákeledi. Jasandy jas quraldary kóbine suıyq bolady, olar az ýaqyt áser etedi, al qoıý túrleriniń áseri uzaǵyraq. Bundaı dárilerdiń quramynda konservanttardyń bolmaǵany jón. Sonymen qatar titirkenýdi jáne kózdiń qyzarýyn tez basatyn dármekterdi paıdalanýdyń qajeti joq. Óıtkeni bundaı dáriler konúnktıva tamyrlaryn tarylta otyryp tez áser etedi, biraq jetkilikti dárejede ylǵaldandyrmaıdy, sondyqtan máseleni ushyqtyra túsedi. Sonymen qatar geldi dáriler de bar. Qalaı bolǵanda da naýqastyń jaǵdaıyn baǵalaı otyryp, dárini dáriger tańdap beredi. Óz betinshe emdelýden aýlaq bolý kerek, sebebi ózdiginshe qoldanǵan dárilerdiń kóbi ýaqytsha oń áser beredi de keıin kózdiń shyryshty qabatyn keptirip, tipti onyń semýine de alyp kelýi múmin. Dáriger taǵaıyndaǵan dáriniń ózin bes kúnnen artyq tamyzýǵa bolmaıdy. Syrqattyń aldyn alý úshin kózdi jıi-jıi jypylyqtatý, sondaı-aq kózge arnalǵan basqa da jattyǵýlardy jasaý paıdaly.

B. B. Djardemova oftalmolog-dáriger

Oqýǵa keńes beremiz:

Konúnktıvıt

Kóz jasy qaltasynyń qabynýy (dakrıosıstıt)

Keratıt

Janaspaly lınza

Alystan kórmeýdiń damý sebepteri jáne emi

Kóz lınzasymen uıyqtaý qaýipti me?

Durys tamaqtaný kóz saýlyǵyna sep

Teledıdardyń kózge zıandary

Kózge arnalǵan jattyǵýlar

Kóz jaraqattary

Kózge arnalǵan ıoga: kózińizdiń qyraǵylyǵyn arttyratyn 8 qarapaıym jattyǵý

 

---