Ǵalym qazaqsha ymdaý tilin tanýdyń ıntellektýaldy júıesin oılap tapty
Ǵalym Nurzada Amangeldi qazaqsha ymdaý tilin tanýdyń ıntellektýaldy júıesin jasap shyǵardy. Biregeı ázirleme erekshe qajettilikteri bar adamdarǵa arnalǵan.
L. Gýmılev atyndaǵy Eýrazıa ulttyq ýnıversıteti aqparattyq tehnologıalar fakúltetiniń oqytýshysy Nurzada Amangeldi 5 jyldan beri zertteý júrgizgen. Ǵylymı joba jasandy ıntellektke negizdelgen jáne sóıleý men estý qabileti buzylǵan adamdarǵa baǵyttalǵan. Júıe qazaqsha ymdaý tiline beıimdelgen, bul – onyń basty biregeıligi.
Júıeni ázirleý barysynda Nurzada Amangeldi bir ymnyń birneshe nusqasyn daıyndaǵan. Ǵalym olardy kórsetilý kúrdeliligi boıynsha toptarǵa bólip, árqaısysy úshin jasandy neırondy jeli modelin ázirlegen.
Júıe bolashaqta ym álipbıin, ym tilin biletin sýrdoaýdarmashylardy daıyndaı alady. Mundaı mamandar túrli memlekettik uıymdarǵa qajetti. Búgingi tańda biz mobıldi qosymsha jasaýǵa kiristik. Onyń kómegimen ym tilimen ózara sóılesýge bolady. Sóıleýdi mátinge, mátindi ymǵa jáne kerisinshe túrlendiretin júıe qurylady. Osy jobamnyń arqasynda erekshe qajettilikteri bar adamdardyń mektepte yńǵaıly oqýy, medısınalyq jáne memlekettik mekemelerde qyzmet alýy jáne erkin sóılesýi men úshin óte mańyzdy. Osy taqyrypty zerttep, óz úlesimdi qosý – azamattyq boryshym, - deıdi ǵalym.
Zertteý nátıjesi boıynsha Nurzada Amangeldi avtorlyq kýálikke ıe boldy jáne álemdik reıtıńi joǵary jýrnaldarda 3 maqala jarıalady. Ótken jyly ýnıversıtettiń «JANA ASU» ishki granttyn alǵan.
«Qazaqstandyq sańyraýlar qoǵamy» qoǵamdyq birlestiginiń vıse-prezıdentimen kezdesý barysynda olardyń balalardy oqytýǵa qatysty máselelerin bildim. Qazaqsha jáne basqa tilder boıynsha ymdaý tilin úıretýge arnalǵan zıatkerlik trenajer – Qazaqstannyń sańyraý qoǵamyndaǵy estý qabileti buzylǵan balalarǵa zor kómek kórsete alatyn qajettilik. Mundaı oqytý júıesi balalarǵa ymdaý tilin úırenýge jáne qorshaǵan ortada qarym-qatynas jasaýdy úırenýge múmkindik beretin tıimdi qarym-qatynas quraldarymen qamtamasyz ete alady. AQSH pen Qazaqstannyń ǵalymdar toby bizdiń eldegi estý jáne sóıleý qabileti buzylǵan adamdar úshin bilim berý jáne oǵan qoljetimdilik salasynda birqatar zertteý bastady. Bizdiń birlesken jumysymyz elimizde ǵana emes, Ortalyq Azıada paıdaly bolatyn úlken ǵylymı jobaǵa aınalady dep senemiz, - deıdi Nurzada Amangeldi.
Ol ǵylymı ázirlemesin komersıalandyrýdy qolǵa almaq. Ǵylym qorynyń baıqaýyna qatysý úshin ótinim joldaǵan.
You Might Also Like
-
Oqý-aǵartý mınıstri Ǵanı Beısembaev jańa oqý jylyna oraı bilim berý baǵdarlamasyndaǵy ózgeristerge qatysty pikir bildirdi.
-
Mektep kitaphanashylaryn «pedagog» laýazymyna teńestirý máselesi pysyqtalady. Bul týraly Májilis depýtattarynyń saýalyna Premer-Mınıstrdiń orynbasary – Eńbek jáne halyqty áleýmett...
