InfoHub Logo

1-synypqa qujattardy 1 sáýirden 1 tamyzǵa deıin ǵana qabyldaý normasy joıylmaq. Bul jaıynda Májilis depýtattarynyń saýalyna Oqý-aǵartý vıse-mınıstri Edil Ospanovtyń jaýabynda aıtylǵan.

«Bastaýysh, negizgi orta jáne jalpy orta bilim berýdiń jalpy bilim beretin oqý baǵdarlamalaryn iske asyratyn bilim berý uıymdaryna oqýǵa qabyldaýdyń úlgilik qaǵıdalaryn bekitý týraly» Bilim jáne ǵylym mınıstriniń 2018 jylǵy 12 qazandaǵy № 564 buıryǵyna sáıkes, 1-synypqa qujattardy qabyldaý 1 sáýirden 1 tamyzǵa deıin júzege asyrylady. Bul norma kvotany ýaqytyly ornalastyrýdy jáne synyp jıyntyqtaryn qalyptastyrýdy júzege asyrýǵa múmkindik beretin bilim berý uıymynyń búdjetin tıimdi bólýdi qamtamasyz etý, sondaı-aq synyp jıyntyqtarynyń tolyp ketýine jol bermeý maqsatynda engizildi», - dep atap ótti vıse-mınıstr.

Onyń aıtýynsha, buıryqqa sáıkes bastaýysh, negizgi orta, jalpy orta bilim berý uıymdary arasynda balalardy aýystyrý úshin qujat qabyldaý kanıkýl kezeńinde (sot sheshimin qospaǵanda, basqa eldi mekenge kóshý, Qazaqstan Respýblıkasynan tys jerlerge turaqty turýǵa ketý) júzege asyrylady. Bul norma oqýshynyń oqý sabaqtastyǵyn jáne toqsandy sátti aıaqtaýyn qamtamasyz etý úshin engizilgen.

«Qazirgi ýaqytta Sıfrlyq damý, ınovasıalar jáne aeroǵarysh ónerkásibi mınıstrligimen birlesip, «İnvisible government» jobasy aıasynda mektepke qabyldaýdyń ómirlik jaǵdaıyn iske asyrý jónindegi is-sharalar jospary ázirlendi. Vedomstvoaralyq jumys toby quryldy. Osyǵan baılanysty, mınıstrlik «Bastaýysh, negizgi orta jáne jalpy orta bilim berýdiń jalpy bilim beretin oqý baǵdarlamalaryn iske asyratyn bilim berý uıymdaryna oqýǵa qabyldaýdyń úlgilik qaǵıdalaryn bekitý týraly» Bilim jáne ǵylym mınıstriniń 2018 jylǵy 12 qazandaǵy № 564 buıryǵyna ózgeris engizý máselesin qaraıdy. Onyń aıasynda sizderdiń usynystaryńyz qaralatyn bolady. Onyń ishinde bastaýysh, negizgi orta, jalpy orta bilim berý uıymdary arasynda bilim alýshylardy bir bilim berý uıymynan ekinshi bilim berý uıymyna kanıkýldan tys ýaqytynda aýystyrý bóliginde ózgerister engiziletin bolady», - dedi Edil Ospanov.

---