InfoHub Logo

2025 jylǵa deıin memlekettik bilim granttarynyń sany 50 paıyzǵa artady. Bul jaıynda Májilis depýtattarynyń saýalyna Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń jaýabynda aıtylǵan.

«Joǵary bilimge keń qoljetimdilikti qamtamasyz etý úshin birqatar sharalar qabyldanýda. Atap aıtqanda, 2019 jyldan bastap Ulttyq biryńǵaı testileý jylyna 4 ret ótkiziledi. Sondaı-aq shekti bal jınamaǵan talapkerler JOO-ǵa shartty túrde aqyly negizde qabyldanyp, UBT-ny birinshi kýrs oqyp júrip, qaıta tapsyra alady. Sonymen qatar jyl saıyn joǵary bilimi bar kadrlardy daıarlaýǵa memlekettik tapsyrys kólemi (2019 jyly – 50 901, 2020 jyly – 51 071, 2021 jyly – 56 561 grant, 2022 jáne 2023 jyly – 73 061 grant) ulǵaıady. Sońǵy bes jylda bakalavrıatqa memlekettik tapsyrys kólemi 31 paıyzǵa ósti. 2025 jylǵa deıin granttardyń sany 50 paıyzǵa artady. Nátıjesinde keminde 75 myń jas qazaqstandyqtar memlekettik qoldaýǵa ıe bolady», - delingen Tamara Dúısenovanyń jaýabynda.

Osy oraıda mınıstr joǵary bilim berý júıesiniń negizgi mindeti ekonomıka salalaryn ınovasıalyq damytý úshin joǵary bilikti mamandar daıarlaý ekendigine nazar aýdartady.

Joǵary oqý oryndary jumysynyń sapasy túlekterdiń naryqtaǵy básekege qabilettiligimen ólshenedi. Ol úshin talapkerlerdi sapaly irikteý qajet. Bilikti mamandardy daıarlaý úshin talapkerlerden belgili bir biliktilik deńgeıi (daǵdylar men qabiletter) talap etiletindikten joǵary oqý oryndaryna qabyldaýdyń qoldanystaǵy UBT mehanızmi sapaly irikteýdi qamtamasyz etedi», - dedi ol.

Sonymen qatar Tamara Dúısenova konkýrstan keıin qalǵan bos bilim berý granttary UBT nátıjeleri boıynsha baldary joǵary talapkerler arasynda qaıta bólinetindigin atap ótedi.

---