InfoHub Logo

Ǵalymbaeva Aısha Ǵarıfqyzy (1917-2008) — keskindemeshi, kınosýretshi, Qazaqstannyń halyq sýretshisi. Qazaq áıelderi arasynan shyqqan tuńǵysh kásipqoı sýretshi. Ol Almaty oblysy Eńbekshiqazaq aýdanynyń Esik aýylynda dúnıege kelgen.

1943 jyly Almaty kórkemsýret ýchılıshesin, 1949 jyly Máskeýdegi Búkilodaqtyq kınematografıa ınstıtýtynyń sán jáne kórkemsýret bólimin bitirgen.

Ǵalymbaeva shyǵarmashylyq qyzmetin «Mahabbat týraly ańyz», «Shabandoz qyz» t.b. fılmderge eskız jasaýdan bastady. Ol ár alýan janrlarda jemisti eńbek etti. Sýretshi — «Aıaqqalqan», «Jaılaý soqpaǵy», «Kóne kózi», «Qobyz», «Sary alma», «Qyzyl aport» t.b. peızajdar men natúrmorttar jáne «Batyr ana», «Qazaqstan ánderi», «Ejelgi keramıka», «Qostanaı. Altyn dán pıramıdalary», «Beıbitshilik» trıptıhy, «Jerdiń syıy», «Bereke» t.b. shyǵarmalardyń avtory. Onyń sándik-monýmenttik saryndaǵy kompozısıalary da kóptep kezdesedi.

Ǵalymbaeva otandyq portret janrynyń sheberi retinde de belgili. Onyń «Jazýshy Ǵ.Mustafınniń portreti», «K.Baıseıitovanyń portreti», «Ulymnyń portreti» t.b. eńbekteri bar.

Aısha Ǵarıfqyzy — «Qazaqtyń ulttyq kıimderi» álbomynyń avtory. Ol Almaty kórkemsýret ýchılıshesinde jáne QazUPÝ-da dáris berdi.

Aısha Ǵalymbaeva — túrli memlekettik syılyqtardyń, Eńbek Qyzyl Tý jáne «Qurmet belgisi» ordenderi men medaldardyń ıegeri.

---