InfoHub Logo

QR Ǵylym jáne joǵary bilim mınıstrliginiń ǵylym komıteti jyl saıynǵy ǵylym salasyndaǵy izdenis konkýrsynyń bastalǵanyn habarlaıdy.

Bıyl gýmanıtarlyq, jaratylystaný ǵylymdary, pedagogıka jáne túrkologıa salalarynda 6 syılyq bekitilgen. Sonymen birge 75 memlekettik ǵylymı stıpendıa beriledi, onyń ishinde 50-i talantty jas ǵalymdarǵa arnalǵan.

Ǵylym men tehnıkanyń damýyna úles qosqan ǵalymdar men ǵylymı qyzmetkerlerdi kótermeleý maqsatynda jyl saıyn Ǵylym jáne joǵary bilim mınıstrliginiń ǵylym komıteti syılyqtar men memlekettik ǵylymı stıpendıalar taǵaıyndaıdy.

Memleket úshin basym baǵyttarda irgeli nemese qoldanbaly ǵylymı zertteýler júrgizýge, ǵylymı kadrlar daıarlaýǵa belsendi at salysqan zertteýshiler osy marapatqa úmitker bola alady.

Syılyqtar men ǵylymı stıpendıalar konkýrstyq negizde kelesi baǵyttar boıynsha taǵaıyndalady:

– jaratylystaný ǵylymdary salasyndaǵy úzdik ǵylymı zertteýi úshin Q.I. Sátbaev atyndaǵy bir syılyq;

– gýmanıtarlyq ǵylymdar salasyndaǵy úzdik ǵylymı zertteýi úshin Sh. Ýálıhanov atyndaǵy bir syılyq;

– pedagogıka salasyndaǵy úzdik ǵylymı zertteýi men jumysy úshin Y. Altynsarın atyndaǵy bir syılyq;

– túrkologıa salasyndaǵy asa zor jetistikteri úshin Kúltegin atyndaǵy bir syılyq;

– jaratylystaný ǵylymdary salasyndaǵy úzdik jumysy úshin jas ǵalymdarǵa arnalǵan D.A. Qonaev atyndaǵy bir syılyq;

– gýmanıtarlyq ǵylymdar salasyndaǵy úzdik jumysy úshin jas ǵalymdarǵa arnalǵan M.O. Áýezov atyndaǵy bir syılyq;

– 75 memlekettik ǵylymı stıpendıa, onyń ishinde 50-i talantty jas ǵalymdarǵa arnalǵan.

Ótinim 7 qazanǵa deıin turǵylyqty jeri boıynsha «Azamattarǵa arnalǵan úkimet» memlekettik korporasıasynda qabyldanady.

---